Wojerecy (AK/SN). Kónc julija ma we Wojerowskim starym měsće wobydlerski centrum Konrada Zuseho, hdźež bu 1912 Domowina załožena, zakónčeny być. Spočatk awgusta poslednje twarske dźěła překontroluja. Wot 10. awgusta móžetej přichodnej podružnikaj a wužiwarjej – přirodowědno-techniski dźěćacy a młodźinski centrum NATZ a kulturna fabrika – zaćahnyć. 5. septembra chcedźa wobydlerski centrum wotewrěć. Tónle časowy wotběh zdźěli nawoda twarskeho wotrjada Wojerowskeho měšćanskeho zarjadnistwa Dietmar Wolf na wčerawšim posedźenju měšćanskeje rady.
Tuchwilu su suchotwar, poslednje woclotwarske, molerske a špundowanske dźěła na rjedźe. Runočasnje přihotuja wupisanje za wšitke zamki w domje kaž tež za wodźenski system. Tón ma po wčerawšich wuprajenjach Dietmara Wolfa tež serbskorěčny być, tak zo serbscy wopytowarjo tež w swojej maćeršćinje zhonja, dokal maja w domje hić, hdyž chcedźa tam něšto wobstarać. Dohromady dyrbja hišće nadawki za nimale 150 000 eurow rozdawać.