Łaz (AK/SN). Dobry wodźer mydłoweje kisty trjeba zmužitosć. „Dyrbiš wodźidło runje dźeržeć a je po móžnosći mało hibać. Ćim mjeńši so činiš, ćim spěšnišo jědźeš“, měnitej Emilie Stoppel z Małych Horow a Cora Hegedüs z Kinajchta. Wonej startowaštej sobotu z jězdźidłom „Berndowe myški“ na druhim wubědźowanju tajkich mydłowych kistow na Łazowskej kart-čarje a docpěštej z 11,0 sekundami najlěpši čas. Dohromady 14 cyłkow z Łaza, Wojerec, Kamjenca a Drježdźan so wobdźěli. Hódnoćili su najspěšniše a najdalše koło kaž tež najlěpši cyłkowny wobraz.
„Chcemy pokazać, zo njeje na kart-čarje jenož wótře, ale zo hodźi so wona tež za swójbne zarjadowanje. Nimo toho je to dźak tym, kotřiž so tule wo wěstotu staraja“, praji Matthias Lesch, kiž wot lěta 2006 kart-čaru wotnaja. Nimale 20 lět wón sam z kartom jězdźi a bě wjacekróć němski mišter. Dźensa wón zahoriće mydłowe kisty twari. „Najwažniše je, zo su wone stabilne. Při tym ma kóždy twarc hinašu filozofiju. „Wodźer a model dyrbitej harmoniju tworić, runje tak kaž kolesa a karosa. To je jězdźidłotwar w poprawnej formje.“