Na jubilejnym 40. wjesnym swjedźenju w Nowej Wjesce je předsyda towarstwa Wjesna zhromadnosć Křesćan Korjeńk wčera hosći, kotrychž njebě horce wjedro zatrašiło, w kopatym połnym stanje na połdrahodźinski zabawny program witać móhł.

Nowa Wjeska (aha/SN). W dwaceći programowych dypkach předstaji něhdźe 35 sobuskutkowacych Nowowješćanske wjesne žiwjenje. Najmłódši bě hakle šěsć lět a ze 76 lětami bě drje Jan Pjech najstarši. Manuela Čornakowa, Kathrin Pěčcyna, Monika Klimantowa a Milena Korjeńkec běchu wšěm znate podawki a wjerški w běhu lěta kaž póstnicy, mejemjetanje a hodowne wiki do zajimaweho cyłka zestajeli. Akterojo poslednjeho wobraza běchu rumpodichojo, kotřiž drje so při 40 stopnjach w stanje w swojej drasće najbóle poćachu. Město horceho wina pak mějachu w swojich škleńcach zawěsće zymne napoje.