Nimo cyrkwjow su tež farske domy něme swědki stawiznow. Ze swojej lětnjej seriju so po serbskich a dwurěčnych katolskich a ewangelskich wosadach rozhladujemy a předstajamy někotre fary – dźensa Baćońsku.
Stawizny farskeho domu w Baćonju kryja so nimale časowje z twarom tamnišeje cyrkwje. W Katolskim Posole 1869 namjetowaštaj Michał Hórnik, tehdy kanonik Serbskeje cyrkwje w Budyšinje, a Tadej Natuš, administrator Róžeńčanskeje putniskeje cyrkwje, pak w Baćonju pak w Čornecach nowu cyrkej natwarić. W nowembru samsneho lěta je Budyski tachantski konsistorij zběranje srědkow za twar cyrkwje schwalił.
