Hamor (JoS/SN). Wjele słowow dźaka a mnohe dopomnjenske dary sposrědkowachu minjeny pjatk wjelelětnemu Hamorskemu wjesnjanosće Rolandej Trunschej (njestronjan). Po 30 lětach je wón zastojnstwo złožił. Bjez dźiwa, zo dźakowachu so jemu za „žiwjenski skutk“, z kotrehož profituja wobydlerjo a pěstowarnje runje tak kaž wobornicy, rjemjeslnicy a předewzaćeljo. Wulke zbožo we wšěch lětach wězo bě, zo maja z Bjerwałdskim najwjetši jězor Sakskeje před nosom a w gmejnje z Hamorskej milinarnju wulkeho dawkipłaćerja.

Roland Trunsch je rodźeny Wojerowčan, kotrehož bě lubosć k mandźelskej do Hamora přiwabiła. Jako twarski inženjer dźěłaše w milinarni a je so na dobro gmejny čestnohamtsce angažował. Jako trjebachu 1985 noweho wjesnjanostu, chcyše so wón spočatnje dwě lěće zadźěłać. Dokelž pak jeho předchadnik njejapcy schorje, dyrbješe wot 1. nowembra 1985 gmejnu sam nawjedować.