Nimo cyrkwjow su tež farske domy něme swědki stawiznow. Ze swojej lětnjej seriju so po serbskich a dwurěčnych ­ katolskich a ewangelskich wosadach rozhladujemy a předstajamy někotre fary – dźensa Budestečansku.

Runja wšěm druhim wosadam běše Budestečanska hač do reformacije katolska. Prěnjotnje jewi so pisomne naspomnjenje Budestec lěta 1331 jako Bustewicz. Po tym zo bě Martin Luther 31. oktobra 1517 we Wittenbergu 95 tezow na durje tamnišeje cyrkwje přibił, su Budestecy tři lěta pozdźišo jako jedna z prěnich wosadow našeje kónčiny jeho wučbu přiwzali. W historiskich dokumentach je zapisane, zo bě čěski kral 3. septembra 1611 w Budestecach na farje wobjedował. Te­hdyši farar Michał Šwach sej wot krala, kiž bě runje ze swojimi ludźimi derje pojědł­ a bě najlěpšeje nalady, wuprosy, směć při ewangelskej wěrje wostać.