Serbske šule mjez wobdźělnikami akcije Lessingoweje biblioteki

Kamjenc (SN/mwe). Hač do kónca lětnich prózdnin, 21. awgusta, maja dźěći a młodostni w starobje jědnaće do 16 lět hišće přiležnosć, so na knižnym lěću Kamjenskeje Lessingoweje biblioteki wobdźělić. Kóždy zajimc móže sej z bohateho poskitka tři knihi wupytać, zo by je pře­­čitał.

Wšojedne, hač su to tołše abo ćeńše eksemplary, powědančka abo fantazijowa literatura, kóždy móže sej po swojim přeću a móžnosćach wotpowědne wudaće wuzwolić. Tak mjenowany knižny basenk hólcam a holcam při tym pomha. Z njeho móža sej zajimcy najnowše dźěćace a młodźinske publikacije wupytać, kotrež nimaja ničo ze šulu činić.

Na kóncu dóstanje kóždy, kiž je tři knihi přečitał, wotpowědny certifikat, a to wot sakskeho kultusoweho ministerstwa. Wobdźělnicy prózdninskeje akcije Kamjenskeje měšćanskeje knihownje móža jón potom wučerjej němčiny předpołožić. W padźe, zo steji šuler při hódnoćenju wukona na přikład mjez jedynku a dwójku, móže kubłar wosebity certifikat do lěpšeje censury sobu zapřijeć.