18 požadarjow azyla – 17 Syričanow a jedyn Irakčan – wot póndźele we Wojerowskim domje ćěkancow stawkuje a wjac njejě. Tak skedźbnjeja na swoje njeznjesliwe połoženje.
Wojerecy (KD/SN/JaW). Wjacori syriscy mužojo, mjez nimi Ahmad Quedir, čakaja hižo dlěje hač lěto na rozsud, hač smědźa w Němskej wostać abo nic. Ahmad je swoju domiznu wójny dla wopušćił. Jeho swójba wosta doma, wón Serbskim Nowinam wčera powědaše.
Štož na mnohich ćěkancow w Němskej čaka, je měsacy trajaca njewěstosć, hač smědźa wostać abo nic. Wo tym rozsudźa Zwjazkowy zarjad za migraciju a ćěkancow. Přilubjeny čas wobdźěłanja próstwow, dwaj tydźenjej, su runje pola jednoho dodźerželi, praješe Ahmad Quedir. Njeznjesliwa situacija bě tuž přičina, zo wobdźěli so sydom Syričanow kónc zašłeho měsaca na protestnym campje w Kamjenicy, zo bychu wobdźěłanje próstwow wo azyl pospěšili.
