W kruhu swojich štyrjoch dźěći, wosom wnučkow a štyrjoch prawnučkow, přiwuznych, přećelow a znatych swjećeše Marja Blochowa wčera w Kamjencu na Macherowej swoje 90. narodniny.

Marja Blochowa pochadźa z Wotrowa, je rodźena Juršec a jedne ze štyrjoch dźěći. Wosom lět chodźeše do Wotrowa do šule a hromadźe ze sotru Toniju dyrbješe w młodych lětach, po tym zo staj staršej zemrěłoj, skót a něhdźe 16 hektarow pódy zastarać. Jeje bratr Jan bě we wójnje a bratr Beno hišće přemały. W lěće 1955, hižo na Heinza Blocha z Lejna wudata, přesydli so do Pančic-Kukowa, hdźež staj jutry samsneho lěta tamniši hosćenc ­ze žurlu přewzałoj a wotewrěłoj.