Sven Barthel nowy naměstnik Rakečanskeho wjesnjanosty

Rakecy (aha/SN). Na wčerawšej zhromadźiznje Rakečanskeje gmejnskeje rady wotpowědowachu jednohłósnje próstwje radźićela Gerda Schiebera (Swobodne wolerske zjednoćenstwo), zo swoju funkciju złoži. Po Sakskim komunalnym zakonju je to móžno, hdyž sy starobu 65 lět docpěł. Dokelž bě wón runočasnje tež naměstnik wjesnjanosty, běše wčera trjeba, naslědnika do tejele funkcije wolić. Z dweju namjetowaneju so z 15 přitomnych jědnaćo za Svena Barthela – kaž dotalny ze samsneje frakcije – rozsudźichu.