Budyšin (SN/MiR). Nowy Budyski wyši měšćanosta Alexander Ahrens (SPD) je wčera w sukelnicy prěni króć posedźe­nje­ měšćanskich radźićelow nawjedował a jich kaž tež hosći němsce a serbsce postrowił. Nawoda hłowneho zarjada Christoph Kasper přepoda jemu hamtski rjećaz. Z pozběhnjenej prawej ruku Ahrens spřisaha, zo chce so na dobro města a jeho wobydlerjow zasadźeć a wšitke nadawki swěru spjelnić. Dr. Heinz Heyser (Lěwica) jako najstarši čłon rady je jemu spřisahanski tekst předčitał. W nastupnej narěči Ahrens zwurazni, zo chce so wosebje za wožiwjenje města na dobro młodeje generacije angažować. „Budyšin je juwel z turistiskim potencialom. Tónle profil chcu znowa rjadować“, Ahrens rjekny. Zdobom chce wuwiće hospodarstwa pohonjeć, štož njeda so wot swójbow dźělić. Za wulke wužadanje ma wón tež přichad dalšich ćěkancow. „Chcu być prěni słužownik města. Wěm, zo přewo­zmu derje worane polo. A za to dźakuju so měšćanskej radźe a zarjadnistwu.“