Mjeztym 13. raz je Stanij Ryćer wčera wułójenje rybow zjawnje předstajił. Syły ludźi wužichu składnosć, dojěć sej při najrjeńšim nazymskim wjedrje k před 55 lětami wot Bóščanskeje gmejny a Wětrowskeje šamotownje zapołoženemu kupanskemu hatej, kotryž Ryćer mjeztym hižo 17 lět za plahowanje wšelakich družin rybow wužiwa.
Bóšicy (aha/SN). Po tym zo běchu wčera dopołdnja Bóščanscy dujerjo na hońtwjerskich róžkach hižo nahladnu ličbu zajimcow witali, wupołoži wosom rybarjow syće. Woni předstajichu, kak z małym kranom stajnje něhdźe 75 kg ryby ze syće do za to předwidźaneho basenka z hata wućahuja. Cyłkownje su něhdźe třištwórć tony linow, pjerskow a přewažnje karpow wułójili. Najwjetši karp wažeše 31 kilogramow. Na městnje móžachu so wopytowarjo wo słodźe pječeneho a warjeneho karpa, ale tež słódneje rybjaceje poliwki přeswědčić. Tola tež wjacore móžnosće dźiwinowych jědźow sy sej k wobjedu we wulkim stanje popřeć móhł.