Domchowanka w Čornym Chołmcu do dnja regionow zapřijata była
Čorny Chołmc (AK/SN). Domchowanka dopomina na kulturu dźakowanja, na kulturu jědźe a na hódnotu žiwidłow. „Za nas je to tohorunja dźakownosć našim swěrnym wopytowarjam napřećo. Zo su woni přišli njeje samozrozumliwe“, podšmórny předsyda towarstwa Krabatoweho młyna Tobias Čižik sobotu připołdnju na domchowance w Čornochołmčanskim Krabatowym młynje. Samo z Berlina, Drježdźan a z Durinskeje běchu zajimcy přijěli. Woni připosłuchachu moderaciji Čorneho młynka (Dieter Klimek), kantorki (Pia Dobisch) w jeje swjedźenskej drasće a młodeho Krabata (Ole Dobisch) a zwjeselichu so nad rejemi a spěwami z musicala „Krabat“ Wojerowskeje hudźbneje šule. Towarstwo Krabatoweho młyna a Domowina stej zhromadnje na domchowanku přeprosyłoj. Podpěrowało je ju Załožba za serbski lud, 30 čestnohamtskich pomocnikow a towarstwa ze wsy.