Při woranju w Kamjenej so žona do domeny muži zwažiła
Kamjenej (BHR/SN). Při najrjeńšim nazymskim wjedrje přewjedźechu minjenu sobotu hižo dźewjate wubědźowanje we woranju. Zo njeje to jenož rjana tradicija, ale mjeztym w regionje připóznate zarjadowanje, dopokaza wulka ličba wobdźělnikow. Dźewjeć entuziastow z traktorom a płuhom z jednej radlicu a pjećo z wjetšimi mašinami a płuhom z dwěmaj radlicomaj, bě so přizjewiło. Přewšo zajimałe popołdnjo bě zaso Kamjenjanska wjesna zhromadnosć z hłownym zamołwitym Měrćinom Bohotom přihotowało. Naspomnjenja hódna wosebitosć bě, zo so prěni króć młoda žona wobdźěli a so z tym do domeny muži zwaži.