Nowe stele wodźenskeho systema dwurěčnje wuhotowane
Budyšin (CK/SN). Turisća w Budyšinje móža so nětko lěpje orientować. Wyši měšćanosta Alexander Ahrens (njestronjan) je wčera při parkowanskim domje „Centrum“ prěnju stelu noweho wodźenskeho systema za pěškow wotkrył. Wona je dwaj metraj wysoka, třiceći centimetrow šěroka, wobsteji z aluminija a je na woběmaj bokomaj němsce kaž tež serbsce popisana. Widźeć su na njej wotpowědny wurězk z měšćanskeho plana a pokiwy na bliske turistiske cile. Stela při parkowanskim dome wjedźe wopytowarjow k nowej wodarni, k NSLDź, k dwórnišću a do stareho města. Přełožk do serbšćiny měješe Serbski institut na starosći. W času smartphonow rozsudźichu so za formu, z kotrejž móža so tež technisce mjenje zajimowani w měsće orientować, rjekny Alexander Ahrens. „Wažne je, zo so Budyšin za wopytowarjow hišće zajimawši stanje a zo swoje cile tež bjez techniskeje pomocy namakaš.“
