Njeswačidło (ML/SN). Kónc apryla 1945 bu při ćežkich třěleńcach wojakow 2. pólskeje a sowjetskeje armeje přećiwo nadběhowacym jednotkam hitlerskeho wójska 85 procentow twarjenjow w Njeswačidle sylnje wobškodźene abo zničene. Někotre we wjesnym srjedźišću njejsu hač do dźensnišeho znowa natwarjene. Wo tym móža so wopytowarjo we wustajeńcy w tamnišim domizniskim muzeju přeswědčić, kotraž je hač do 15. nowembra přistupna. Nawoda muzeja Arnd Lehmann je minjenu sobotu třeći króć tójšto zajimcow po wsy wjedł a jim škody a straty bojow na městnje rozłožił. Wodźenje započa so při radnicy, kotraž bě něhdy napřećo 1890 twarjenemu dwórnišću wila inženjera Huga Herrmanna. Při wojowanjach 1945 bu wila z tykowanymi swislemi z lěta 1912 runje tak zničena kaž susodne hospodarske twarjenja Pěčkec, nětko Guttec statoka. Na jich městnje je parkowanišćo při radnicy.