Radwor (SN/MkWj). Zarjadnistwo Radworskeje wyšeje šule „Dr. Marja Grólmusec“ dóstanje nowy kompjuter a moderny serwer. Tole su gmejnscy radźićeljo na swojim wčerawšim posedźenju wobzamknyli. Tuchwilu wužiwany kompjuter pochadźa z lěta 2003 a njeje dźensnišim žadanjam hladajo na organizowanje šulskeho wotběha hižo zrosćeny, kaž radźićeljo a hosćo zhonichu. Žadanje jednoho z radźićelow, šulu hladajo na stajnje zaso trěbne wudawki gmejny radšo do nošerstwa wokrjesa přepodać, žadyn wothłós njenańdźe.

Wjace diskusije zbudźi plan wobhospodarjerjow składa plastowych wotpadkow w Drobach. Tam chcedźa tři nowe hale twarić, zo móhli wotběhi lěpje organizować. Přitomni wobydlerjo Drobow so hóršachu, zo njemóža w lěću swoje terasy wulkeho mnóstwa muchow dla hižo wužiwać. Zamołwići skedźbnichu na swoje prócowanja, muchi z wotpowědnymi srědkami zaničować. Klětu nalěto chcedźa na dźeń wotewrjenych duri do zawoda přeprosyć.