Diplomowe dźěło młodeho Serba zazběh wulkeho projekta
Pančicy-Kukow (SN/MWj). Poprawom knježi srjedu popołdnju w Lipju w Pančicach-Kukowje wokoło pomnika Jakuba Barta-Ćišinskeho idyliski měr. Pod padacym lisćom so hewak skupinki zbrašenych wuchodźuja, druhdy něchtó z kolesom nimo jědźe abo z psom swoje koło dźe. Wčera pak stejachu při młynskej hrjebi hnydom wjacore transportery, młodźi ludźo wućahowachu dźiwje narosćene štomiki z kerčiny, druzy z motorskej piłu hałzy rězachu. To bě zazběh wulkeho projekta přichodnych pjeć do dźesać lět, z kotrymž ma ze zarosćeneho Lipja zaso woprawdźity park nastać.