Hakle spočatk tohole lěta běchu sej Hórčenjo wjesne towarstwo Při skale załožili. Mjeztym su tam někotrežkuli zarjadowanje na nohi stajili. Wčera přeprosychu wobydlerjow na premjeru.
Hórki (aha/SN). Z prawom horda je předsydka 20 čłonow wopřijaceho towarstwa Marlis Młynkowa, štož su jej poboku agilni čłonojo předsydstwa w běhu krótkeho časa na dobro wjesneje zhromadnosće w Hórkach zeskutkownić zamóhli. Hač běchu to filmowy wječor, zhromadnje zarjadowany ze župu „Michał Hórnik“, abo přednoškaj kaž tež sportowe popołdnjo – stajnje swědčeše dobry wopyt wo wulkim zajimje za stajeny zaměr. Dźakowano towarstwu su Hórki lětsa tež prěni raz nazymski koncert dožiwili.