Brěžki (AK/SN). Něhdźe 30 wučomnikow maja tuchwilu w Brěžčanskim meblowym zawodźe Maja. Su to industrijowi překupcy, drjewowi mechanikarjo, mechatronikarjo a studenća Drježdźanskeje powołanskeje akademije. „Chcemy młodostnym dołhodobnu perspektiwu dać“, podšmórny personalna šefina Antje Schneider minjenu sobotu na zawodowym dnju wučomnika. „Klětu wobsadźimy 20 wukubłanskich městnow.“ W jednotliwym budu to třo mechatronikarjo, pjeć wodźerjow mašinow a připrawow, jedna informatiska překupča, tři industrijowe překupče, pjeć drjewowych mechanikarjow a třo młodostni přez dualny system powołanskeje akademije w směrje drjewowa technika.

Na wšelakore wašnje so Maja wo dorost stara. Tak organizowachu dźeń za powołansku orientaciju. Ze spočatnje 20 zajimcow zwostaštaj dwaj, kotrajž wuknjetaj nětko powołanje drjewoweho mechanikarja. Spočatk nowembra přewjedźechu dalekubłanje za wučerjow. „Jim předstajichmy naše wukubłanske směry a žadanja na nje. Wučerjo za powołansku orientaciju móža šulerjow nětko lěpje poradźować“, Antje Schneider rozłoži.