Ličba wužiwarjow Onleihe w Hornjej Łužicy wobstajnje přiběrała

Budyšin (SN/mwe). „Smy na jara wažnym dypku, dokelž so Onleihe po třoch lětach natwara lětsa kónc decembra zakónči“, wuzběhnje projektowy manager Matthias Barthel z Wóslinka. Tři lěta bě wón wot sakskeho ministerstwa za wědomosć a wuměłstwo kaž tež wot kulturneho ruma Hornja Łužica spěchowany projekt přewodźał. Wot toho časa su sej tysacy ludźi 116 200 medijow přez Onleihe Hornja Łužica kaž słuchoknihi, magaciny, awdio a mnohe dalše medije digitalnje wupožčowali. Wosebje požadana bě přez cyłu dobu beletristika. „Mnohich zajimowachu e-booki, kotrež nochcychu sej w knihownjach wupožčić. Na přikład bě to erotiska literatura“, praji Barthel. Wšo dohromady ma Onleihe 10 831 medijow w poskitku, tuchwilu pak žane serbske. Přičina toho je, zo chce zwjazk hornjołužiskich bibliotekow wobstatk serbskich e-bookow darmotnje do swojeho sortimenta přiwzać. „To pak nam z hospodarskich přičin móžno njeje“, Domenico Gruhn, w Ludowym nakładnistwje Domowina za nowe medije zamołwity, na naprašowanje SN rjekny.