Prjedy hač móža ludźo přichodnu sobotu w Nuknicy 18. jolka-swjedźeń dožiwić, je njesměrnje wjele přihotow trěbne. Wšědnje je Brězanec bróžnja nětko wječor dołho wobswětlena, dokelž so tam wjele pilnych rukow gratu přima.

Nuknica (SN/MWj). Swěca w předstanje a pawiljonje je hižo wotdaloka widźeć. W bróžni noša mužojo a młodostni drjewjane dźěle tam a sem. Na sćěnach wisaja jewišćowe wobrazy z jolka-swjedźenjow zašłych lět a dopominaja na lońšu temu šlarafija, na Asterix před třomi lětami, na wulkan a Kubu. A wosrjedź wšeho diskutujetaj Michał „Černo“ Brězan a Michał Cyž, kak najlěpje blida a ławki stajeć a hač jewišćo snano tola hišće něšto metrow přesunu. „Pjatk popołdnju budźe generalka programa. Připołdnju dyrbja wšitke přihoty wotzamknjene być“, praji šeforganizator Michał Brězan. Wčera su ­jewišćo za hudźbnu skupinu Serbeat natwarili a halu wupyšili, dźensa chcychu techniku zatwarić a zbywace lampy spowěšeć, baru natwarić a wězo blida a ławki stajeć.