Wojerecy (SN). Hižo štwórty raz spožčichu klinice za dźěćacu a młodźinsku medicinu Łužiskeje jězorinoweje kliniki Wojerecy cyłoněmski certifikat „Wuběrnje za dźěći“. Dźěsću wotpowědowace zastaranje pacientow běchu tam z wysokimi kwalitnymi kriterijemi fachoweje towaršnosće přepruwowali, rěka w nowinskim zdźělenju chorownje. Šeflěkarka dr. Petra Jesche so wjeseli. „Cyły team dźěćaceje kliniki čuje so česćeny. Nam je samozrozumliwe, zo młodźi pacienća w srjedźišću našeho dźěła steja.“
Dźěćacy kliniski centrum we Wojerecach je po wšej Němskej jedyn z mało, kotrež po wuwiću certifikata lěta 2009 hač do dźensnišeho dźěsću wotpowědowace zastaranje pacientow we wysokej kwaliće zaručeja. Loni su tam pruwowanske kriterije přirunujo z lětomaj do toho hišće zesylnili. „Při přepruwowanju su tež na to dźiwali, kak so tele kriterije w praktiskim dźěle zwoprawdźeja“, dr. Jesche rozłožuje, „tole wuraznje witamy, zo móhli swoje dźěło wobstajnje polěpšeć.“