Budyšin (SN/mwe). Byrnjež w Budyskim wokrjesu hač do 8. februara (aktualny staw) 61 ludźi na wirusowu gripu schorjeło, wotpowěduje to po zdźělenju krajnoradneho zarjada „bjezdwěla k typiskemu, normalnemu wuwiću za počas“.

Nowinska rěčnica krajnoradneho zarjada Budyšin Madlen Paul podšmórny, zo dóstachu wot 1. do 4. tydźenja lětsa 36 padow influency přizjewjenych. Wot 30. do 53. tydźenja 2015 bě to pjatnaće. Wot wirusoweje gripy potrjechene su tuchwilu wšitke starobne skupiny wot jednoho hač do 76 lět.