Haleluja křižerjow je runje hakle womjelkło a hižo steješe Pančičanski klóšter Marijina hwězda znowa w srjedźišću zajima. Wčera běchu swójby na nalětni dožiwjenski dźeń do klóšterskeje zahrody přeprošene a su we wulkej ličbje přichwatali.
Pančicy-Kukow (JK/SN). Najebać aprylske wjedro je so wjele swójbow wčera podało do zežiwjenskeje a zeloweje zahrody klóštra Marijineje hwězdy w Pančicach-Kukowje na swójbny dožiwjenski dźeń. Organizatorojo z klóštra, zarjadniskeho zwjazka Při Klóšterskej wodźe, dźěłarnjow za zbrašenych a Miłočanskeho Křesćansko-socialneho kubłanskeho skutka kaž tež klóšterska zahroda běchu zaso wobšěrny a spodobny program zestajeli. Dołhož je wjedro dowoliło, pytachu dźěći na zelowej zahrodźe za jutrownymi jejkami, kotrež běchu mjez rostlinami schowane. Magnet popołdnja bě hnydom při zachodźe do zahrody zaměstnjeny: Hórčanski wowčer Gerat Šmit powědaše wo swojim powołanju. Dźěći smědźachu psaj a jehnjata tež pomajkać.
