Wjace bliskosće k wobydlerjam a wjace wotewrjenosće w gmejnskej radźe, we wuběrkach a w zarjadnistwje – tole stej wažnej zaměraj Ronalda Woschicka. Za wolerske zjednoćenstwo za Łazowsku wulkogmejnu nastupi wón 24. apryla k wólbam wjesnjanosty. Wot 2014 přisłuša wón gmejnskej radźe a je nimo toho předsyda towarstwa Łazowska strowota.

40lětny Łazowčan je powołanje zawodneho hospodarja nawuknył a pozdźišo w tymle směrje studował. Tuchwilu dźěła wón w Drježdźanskej imobilijowej firmje Impro. Bjez dźiwa, zo jemu hospodarske spěchowanje na wutrobje leži. „Po wućeženej přemysłowej přestrjeni G2 měli so dalše płoniny za zasydlenje firmow wupisać“, praji Woschick.