Pěskecy (HS/SN). Derje wopytany bě sobotu dźeń lěsnistwoweho wobwoda Hornja Łužica, wotměwacy so we wobłuku 8. sakskich lěsnych tydźenjow w Pěskecach. Na tamnišim sportnišću wjerćachu so ramikowy program a poskitki wustajerjow kołowokoło domjaceho lěsa. Hižo při wotewrjenju móžeštaj nawoda lěsnistwoweho wobwoda Holm Karraß a Njebjelčanski wjesnjanosta Tomaš Čornak (CDU) tójšto zajimcow witać.
Mjez wustajerjemi prezentowaše so Žuričan Alojs Šołta ze swojimi filigranymi wudźěłkami z drjewa. Zastupjerjo wuchodosakskeho zwjazka sokołarjow pokazachu swoje pazoraki, dźěći dožiwichu klankohru wo kašporu a paduchu drjewa a zarjad za wobswětowe kubłanje znazorni, zo su loni jeničce w lěsnistwowym wobwodźe Hornja Łužica 88 tonow wotpadkow a njerjada rumowali.
