Worklečansku gmejnu bjez Franca Bruska móžeš sej runje tak ćežko předstajić kaž na přikład tamniši hat bjez kupy. Hižo dlěje hač 40 lět steji Brusk na čole komuny, hač do lěta 2000 jako hłownohamtski, mjeztym jako čestnohamtski a přistajeny zarjadniskeho zwjazka Při Klóšterskej wodźe. Što je w tym času wšitko na dobro Worklečanskeje gmejny zwoprawdźił, je ćežko naličić. Wjesny konsum, přitwar šule, sportownja, pěstowarnja, žłobik, płunowód, nowe dróhi a kolesowanske šćežki su jenož někotre z wulkich přikładow.
Njelochki bě předewšěm čas po politiskim přewróće, jako hrožachu Worklecy socialnje trochu wusnyć. Tehdy je Franc Brusk w poslednim wokomiku wotwobarał, zo wjesny konsum zawru. Po wjacorych lětach prócowanja je so poradźiło, zo do hrodu ambulantna słužba maltezow zaćehnje, po tym zo bě chorownja wu- a do Kamjenca přećahnyła. A najnowši wuspěch je, zo su za hosćenc noweho wobsedźerja namakali a zo móža so mjeztym tež nad saněrowanym hosćencom wjeselić.