Pančicy-Kukow (SN/MWj). Lětušu sezonu w zežiwjenskim a zelowym centrumje Křesćansko-socialneho kubłanskeho skutka w klóštrje Marijinej hwězdźe w Pančicach-Kukowje zahaja njedźelu, 26. apryla, w 14.30 hodź. Runja zašłym lětam sadźa tam znowa štom lěta, štož je tónkróć pólny klon. Wjace wo nim zhonja zajimcy wot nawody hornjołužiskeho lěsniskeho wobwoda Holma Karraßa. Dale wotewru dwě wustajeńcy. Stej to hóstna přehladka Budyskeho Serbskeho muzeja „Prjedy hač woteńdźeš“ z fotografijemi Maćija Bulanka a pokazka „Přiroda a domizna w formaće listoweje znamki“. Direktorka Serbskeho muzeja Christina Boguszowa kaž tež filatelisća Reinhard Heisig, Jörg Petrenc a Jens Fichte chcedźa na prašenja wopytowarjow wotmołwjeć. Wo hudźbne wobrubjenje postara so Měrćin Weclich.