Přichodny sociokulturny centrum při Wojerowskim torhošću ma „Wobydlerski centrum Piwarska 1“ rěkać. Měšćanska rada je wčera zrěčenje z přichodnym wobhospodarjerjom wotzamknyła.

Wojerecy (AK/SN). Dom, w kotrymž bu 1912 Domowina załožena, ma přichodnje přirodowědnemu a techniskemu zwonkašulskemu dźěłu z dźěćimi a młodostnymi słužić. Za to je Wojerowska mě­šćan­ska rada wčera wotzamknyła zrěčenje ze so­ciokulturnym centrumom kulturna fabrika, kotraž so wotnětka wo wob­hospodarjenje twarjenja stara. Druhi wužiwar budźe přirodowědne a techniske srjedźišćo NATZ.

„Dołhi a napinacy puć minjenych lět je so zadanił. Kulturna fabrika słuša zaso do centruma města a mjeno Wobydlerski centrum Piwarska 1 so derje hodźi“, wjeseleše so wčera Inge Ilin, předsydka towarstwa Piwarska 1 po posedźenju měšćanskeje rady. Hižo wjele lět so towarstwo za to zasadźa, dom w starym měsće wobnowić.