W Trjebinskej gmejnje pokročuja z twarskimi předewzaćemi
Trjebin (AK/SN). Historiska smolernja blisko Šusterec statoka a historiski wětrnik w Trjebinje stej dotwarjenej. To běštej dalšej wažnej twarskej předewzaći gmejny, podšmórny zamołwity sobudźěłaćer twarskeho zarjada Slepjanskeho zarjadniskeho zjednoćenstwa Enrico Mrusek na wčerawšim posedźenju Trjebinskeje gmejnskeje rady. „Nětko dotwarimy wonkowne připrawy při Młynskim haće a připrawimy tam trěbne šćežki.
Rostlinsku wodočisćernju w Trjebinje mjeztym hižo njetrjebaja, wšako gmejna wopłóčki z ćišćowej rołu centralnje přez Běłowodźanske měšćanske zawody wotwodźuje. Z jednym wzdatym hłosom gmejnscy radźićeljo wčera tuž wobzamknychu, připrawu, kotraž hižo wot lěća 2013 njedźěła, spotorhać. Předwidźane je płoninu zasypać a zrunać. Teren chcedźa přichodnje jako wurunansku płoninu za přirodoškitne naprawy abo za ratarstwo wužiwać. Za to pak su hišće dorěčenja trěbne.
