Won do swěta rěkaše moje předewzaće za lěto 2014. Běch drje časćišo ze swójbnymi w dowolu w juhowuchodnej Europje a studuju nětko 600 kilometrow wot do­mizny zdalene – přiwšěm chcych na dlěši čas do cuzby, zo bych so z druhimi kulturami a mentalitami zeznajomiła. Nastajich so tuž kónc februara 2014 na tři tydźenje ze studijnej přećelku na puć­ do Marokka. Njejsmój ničo wulce planowałoj, chcychmoj sej tam cyle jednorje kraj wobhladać. Na kóncu jězby po Marokku pak dyrbjachmoj zaso dypkownje na lětani­šću w třećim najwjetšim měsće kraja Fés być.

Kóžde lěto hnojić hižo trjeba njeje

Jako nabywaše srjedź zańdźeneho lětstotka wulkohospodarstwo na wsach dźeń a wjetšeje hódnoty, rěkaše, zo je to bjezzmyslne. Jako ći Zeleni na politiskej runinje na mocy přibychu a chcychu mjez druhim z přirodu zawjazk měra docpěć, zastopnjowachu jich mnozy za tajkich bjez šansy.

Pro a kontra nima so tule wobswěćić, přiwšěm je woboje krok do směra zachowanja žiwjenskich zakładow čłowjestwa. Wobhospodarjenje wulkich ratarskich płonin wostanje drje tež dale zakład zežiwjenja rosćaceho wobydlerstwa. W tendency pak spěchuje wone tež monokulturu, nadpřerězne hnojenje a njedowolene zhusćenje pódy z ćežkim gratom. Tendency pak hodźi so dźensa wuspěšnje znapřećiwić, tuchwilu wšak jeno dźělnje, přichodnje snano we wulkim stilu.

Kroča po swójskim puću

Serbske kapały wuhotuja w meji wosebity koncert w Budyskim sociokulturnym srjedźišću

Budyski Kamjentny dom je spočatk lěta z eksila na Alberta Schweitzerowej zaso do swojeho domu na Kamjentnej přećahnył. Dawno njeje twarjenje tajke, kaž je mnozy z minjenych lětdźesatkow znaja. Město ćmowych chódbow je tam dźensa wšudźe swětło, rumnosće a běrowy su nowowuhotowane. Tež žur­lu­ ze 400 městnami a z najmodernišej digitalnej techniku lědma hišće spóznaješ. Najebać to maja mnozy, tež Serbja z Budyšina a wokoliny, na stary Kamjentny dom přewšo rjane dopomnjenki, wšako móža so hišće derje na wjesołe hodźiny swój čas w tymle srjedźišću dopomnić. Mnohim měšćanam a dalšim wopytowarjam bě Budyski Kamjentny dom tajke něšto kaž druhe doma. Tak bě sej tójšto hólcow a holcow tež swójbnych problemow dla wšědnje a wosebje na swjatych dnjach kaž hody do sociokulturneho centruma wosrjedź Budyšina wućeknyło. Tam móžachu z druhimi wo swojich starosćach rěčeć.