Krótkopowěsće (24.08.15)

Montag, 24. August 2015
Artikel bewerten
(0 Stimmen)

SLA swjedźenski tydźeń zahajił

Bórkowy. Z koncertom w Bórkowskej ewangelskej cyrkwi je Serbski ludowy ansambl sobotu wječor swjedźenski tydźeń składnostnje 700lětneho wobstaća błótowskeje metropole zahajił. Na nic cyle wupředatym zarjadowanju zaklinčachu nimo „Štyrjoch počasow“ Antonija Vivaldija tež twórby Jurja Pilka, Jana Pawoła Nagela a Bjarnata Krawca.

Protestuja tunjeho mloka dla

Hohenwestedt. Po protestach ratarjow w Francoskej a Belgiskej so nětko tež němscy burja spadowacym płaćiznam mloka wobaraja. W schleswigsko-holsteinskim Hohenwestedće podachu so dźensa z traktorami na staflowu jězbu, kotraž ma so 1. septembra w Mnichowje skónčić. Plahowarjo dejkow žadaja sej 40 centow na liter mloka, tuchwilu dóstawaja runje 26 centow.

Ruska poskitk zaso cofnyła

Praha. Składnostnje róčnicy sowjetskeje inwazije do Čěskosłowakskeje dnja 21. awgusta 1968 chcyše čěska statna telewizija najnowšu rusku dokumentaciju wo tymle podawku kupić a wusyłać. Historisku wěrnosć skomolacy film pak běchu w Čěskej republice chětro kritizowali. Ruska telewizija je tuž poskitk, film předać, bjez wujasnjenja zaso cofnyła.

Rjelka/Lipič dale njeporaženaj

Róžant. W serbskej beachvolleyballowej lize přewjeduja tučasnje jenož mało hrow druheje połserije. Dotal njeporažena dwójka Marcel Rjelka/Jurij Lipič přesadźi so w napjatej partiji přećiwo Jurjej Bjeńšej/Benediktej Smole z 2:0. Dalši duel dobyštaj Bjeńš a Smoła přećiwo Šołćic bratromaj Benej a Metodej z Róžanta jasnje z 2:0. Srjedu planuja dalše hry.

Złoto a slěbro w kulostorku

Peking. Christina Schwanitz je sobotu we wobłuku swětowych lochkoatletiskich mišterstwow w Pekingu prěnje złoto­ za Němsku dobyła. 29lětna storči kulu na 20,37 metrow. Po třoch titulach za Astrid Kumbernuss je Schwanitz nětko­ druha Němka, kotraž je w tutej discipli­nje mišterka swěta. Treningowy partner David Storl doby slěbro.

Veröffentlicht in Krótkopowěsće
Bitte anmelden, um einen Kommentar zu posten

Anzeige