Krótkopowěsće (31.08.15)

Montag, 31. August 2015
Artikel bewerten
(0 Stimmen)

Nukstock z nowosćemi

Nuknica. Wjace ludźi hač zašłe lěta – dohromady něhdźe 600 – je kónc tydźenja 17. festiwal Nukstock dožiwiło. Při Nukničanskej skale zahra dźewjeć hudźbnych skupin z kraja a wukraja. Prěni raz su sobotu dźěćacy program organizowali. Dalša nowosć bě, zo su biologisce wottwarjomne nopaški a talerje wužiwali. Lětsa rozdawachu na Nukstocku tohorunja antirasistiske nalěpki.

Pašowarjo ludźi zajeći

Wien. Po zahajenju raznišich kontrololow při madźarskej mjezy je awstriska policija dotal pjeć pozdatnych pašowarjow a wjace hač 200 ćěkancow našła, polici­ja dźensa zdźěli. Cyłkownje 54 zastojnikow je zasadźenych, zo bychu přećiwo pašowarjam ludźi postupowali. Tež bayer­ska policija kontrole zesylnja. Historiski datum wotkryty

Rumburk. Najsewjerniša europska kapałka typa loreto, napodobnjaca chěžu swjateje Marije w Nacareće, steji w čěskim Rumburku. Při tučasnym restawrowanju molerskeho wupyšenja barokneho twara ze spočatka 18. lětstotka wotkrychu zapisany datum 17. septembra 1945 kaž tež mjenje sudetoněmskeju molerja a blidarja, kotrajž běštaj kapałku tehdy ponowiłoj. Wobeju pozdźišo prawdźepodobnje wotsunychu.

Worklečanscy hašerjo dobyli

Pěskecy. Worklečanscy wohnjowi wobornicy su pjatk wječor hašenske wubědźowanje w Pěskecach dobyli. Woni wostachu jako jeničcy z 29,81 pod hranicu 30 sekundow. Cyłkowne hódnoćenje zarjadniskeho zwjazka pak nawjeduje dale wobora z Konjec-Šunowa před Worklečanskej a Róžeńčansko-Sernjanskej.

Molitor złoto dobyła

Peking. Na poslednim dnju swětowych mišterstwow w lochkoatletice je Němka Katharina Molitor ze swojim poslednim pospytom złoto w mjetanju hlebije dobyła. Za 31lětnu sportowču z Leverkusena je to najwjetše dobyće karjery. Wona přesadźi so z dalokosću 67,69 metrow­ přećiwo Huihui Lyu z Chiny, kotraž docpě 66,13 metrow.

Veröffentlicht in Krótkopowěsće
Bitte anmelden, um einen Kommentar zu posten

Anzeige