Krótkopowěsće (30.10.15)

Freitag, 30. Oktober 2015
Artikel bewerten
(0 Stimmen)

Myto serbskej wědomostnicy

St. Louis. Concordia Historical Institute w ameriskim St. Louisu mytuje serbsku wědomostnicu Trudlu Malinkowu za wudawaće knihi „Jan Kilian (1811–1884) – Pastor, Poet, Emigrant“. Předmjet slědźenišća su stawizny Lutherskeje cyrkwje w Sewjernej Americe. 12. nowembra jej w St. Louisu myto spožča.

Nowum w LND

Budyšin. Znaty Towaršny spěwnik předleži nětko jako app. Tak je móžno, teksty spěwow spěšnje na wobrazowce měć. App hodźi so w Google Play Store jako light-wersija darmotnje downloa­dować, połna wersija płaći 3,99 eurow. Při zwoprawdźenju projekta je LND podpěrało Böhmak it-poradźowanje, technisku realizaciju přewza develAPPers UG.

Nowa čara za lěsnu železnicu

Běła Woda. Ze symboliskim prěnim zarywom zahajichu wčera nowotwar nimale štyri kilometry dołheje čary Mužakowskeje lěsneje železnicy k wěži při Ćežkej horje w Běłej Wodźe. Nowe kolije maja narunać dźěl tych, kotrež dyrbjachu Wochožanskeje brunicoweje jamy dla wot­stronić. Šef lěsneje železnicy Friedemann Tischer naprawu wita, dokelž so techniski pomnik tak zachowa.

Sankowar Langenhahn dobył

Altenberg. Andi Langenhahn, štwórty Olympiskich zymskich hrow w Sočiju, je wčera w Altenbergu třeći kwalifikaciski běh němskich sankowarjow za swětowy cup dobył. We woběmaj přechodomaj poradźi so jemu najlěpši čas. Druhi bu olympiski dobyćer Felix Loch. Pola žonow přesadźi so Natalie Geisenberger, dobyćerka w Sočiju, před Tatjanu Hüfner.

Wuspěšny comeback

Edmonton. Lodohokejistej němskeje narodneje wubranki Leonej Draisaitlej je so w ameriskej profijowej lize NHL wuspěšny comeback poradźił. Při dobyću 4:3 Edmonton Oilers přećiwo mustwu Montreal Canadiens bě rodźeny Kölnjan dwoje wrota třělił, 62 sekundow do wothwizdanja samo dobyćerske. Němski narodny hrajer bě do toho za Bakersfield Condors w lize AHL zasadźeny.

Veröffentlicht in Krótkopowěsće
Bitte anmelden, um einen Kommentar zu posten

Anzeige