Serbska literatura w Lipsku
Lipsk. Nowe wudaće časopisa za južnoněmsku literaturu a wuměłstwo Bawülon „Die Welt und ihre Dichter – Sorben und ihre Freunde“ předstaja 17. měrca na Lipšćanskich knižnych wikach. Nimo předsłowa Petera Handki wobsahuje zešiwk tež teksty dr. Měrćina Wałdy, Bena Budarja, Měrany Cušcyneje a Benedikta Dyrlicha, kiž jón w nakładnistwje Pop wuda.
Wěža jako symbol
Varnsdorf. Na horje Špičák nad sewjeročěskim Varnsdorfom nastanje nowa wuhladna wěža. 25 metrow wysoki twar ze šěsć splećenych woclowych spiralow ma nastaće města přez zjednoćenje šěsć gmejnow lěta 1849 symbolizować. Wjeršk wuhladneje wěže budu LED-swěcy wobswětleć. Trěbne financy přinošuje euroregion Nysa.
Ministerka njewitana
Athen. W krizy ćěkancow dla napjatosće mjez Grjekskej a Awstriskej dale přiběraja. Dźensa su w Athenje próstwu awstriskeje nutřkowneje ministerki Johanny Mikl-Leitner wotpokazali, Grjeksku wopytać, zo by so wo połoženju požadarjow azyla wobhoniła. Grjekska Awstriskej wumjetuje, zo njebu na konferencu ćěkancow dla do Wiena přeprošena.