Krótkopowěsće (15.02.19)

Freitag, 15. Februar 2019 geschrieben von:

Prěnjej lawreataj z Ruskeje

Berlin/Choćebuz. We wobłuku filmoweho festiwala Berlinala wuhotowaneho rjadu East European Brunch su organizatorojo Choćebuskeho filmoweho festiwala prěnjeju lětušeju lawreatow swojeho zarjadowanja wozjewili. Wobaj staj z Ruskeje. Spěchowanske myto přiznaja producentce Larisy Gljebowej; myto Global Pitch Award dóstanje loni z „Lubinu“ počesćeny režiser Sergej Dworcewoj.

Klěšćow dla rizikowa kónčina

Drježdźany. Roberta Kochowy institut je wokrjes Saksku Šwicu-wuchodne Rudne horiny jako dalšu rizikowu kónčinu schorjenja na FSME zastopnjował. To zdźěla dźensa sakske ministerstwo za socialne a škit přetrjebarjow. Klěšće su so tež tam tak rozšěrili, zo móža strašne za strowotu­ ludźi być. Dotal su wokrjesy Budyšin, Zwickau, Vogtland a Rudne horiny jako rizikowe kónčiny postajene.

Maćerny dowol kontra karjerje

Krótkopowěsće (14.02.19)

Donnerstag, 14. Februar 2019 geschrieben von:

Na bazy sej jednotu žadaja

Drježdźany. Rozestajenje wo tym, štó Serbow zastupuje, ma so zakónčić. Swoje wuprajenje jako hósć na njedawnym posedźenju Serbskeho sejma „zjawnosć za ćahańcu mjez sejmom a Domowinu žane zrozumjenje nima“, je Wojerowski župan Marcel Brauman napřećo powěsćerni dpa wčera wospjetował. Nadawk Domowiny je, wšěch za serbstwo angažowacych so zjednoćić.

Kandidaća za literarne myto

Lipsk. Wjeršk Lipšćanskich knižnych wikow je spožčenje literarneho myta. Dźensa bu lisćina nominowanych wozjewjena. Mjez druhim mataj tež němsce pisacy čěski awtor Jaroslav Rudiš a Feridun Zaimoğlu wuhlady na wuznamjenjenje w kategoriji beletrija. Jasny je hižo dobyćer spěchowanskeho myta nakładnistwow, kotrež přiznachu towarstwu Lesewelt Berlin za spěchowanje čitanja.

Rusojo Čěskej božemje praja

Krótkopowěsće (13.02.19)

Mittwoch, 13. Februar 2019 geschrieben von:

Tarifowe jednanja

Zhorjelc. Tuchwilne stawki wučerjow potrjechja posrědnje tež Zhorjelsku wo­krjesnu hudźbnu šulu. Tamniši kubłarjo žadaja sej domjacy tarif, kiž so na tym zjawneje słužby orientuje. Dołhož jednanja mjez krajnoradnym zarjadom a dźě­łarnistwom­ ver.di běža, stej so wobě stronje na to dojednałoj, zo stawk njebudźe.

Dźiwadło serbsce wita

Drježdźany. Do Dźiwadła młodeje generacije w Drježdźanach při zachodźe nětko tež w serbskej rěči witaja. Wo tym informuje dźensa Serbski rozhłós. Připrawjene je witanje za předwidźanu swójbnu njedźelu spočatk měrca, kotruž Budyske NSLDź a Drježdźanske towarstwo Stup dale zhromadnje wuhotujetej. NSLDź předstaji klankohru „Kito husličkar“ a AG serbšćina w krajnej stolicy hru „Módry banćik“.

Pjenjezy za sakske komuny

Krótkopowěsće (12.02.19)

Dienstag, 12. Februar 2019 geschrieben von:

Aktiwisća dale w jatbje

Choćebuz. Tydźeń po protestnych akcijach w brunicowymaj jamomaj Janšojcy a Wjelcej-juh su třo wobswětowi aktiwisća dale w přepytowanskej jatbje. Kaž Choćebuske zarjadniske sudnistwo wčera zdźěli, nochcedźa mužojo swoju identitu přeradźić. Z akciju tydźenja běchu aktiwisća přećiwo rozprawje wuhloweje komisije protestowali. Jědnaće žonow a dwanaće muži bu nachwilnje zajatych.

Měrowe myto Vietnamjance

Drježdźany. Kim Phúc Phan Thị je wčera Drježdźanske měrowe myto přijała. Němske towarstwo Friends of Dresden počesći tak aktiwistku za „njesprócniwy angažement za wujednanje a wodaće“. Znata bu wona přez foto, pokazowace ju w dźěćatstwje jako wopor napalma we Vietnamskej wójnje. Dźensa předstaji Kim Phúc w sakskej stolicy swoju nowu knihu „Do wutroby palene“.

Z Čěskeje tunjo do Němskeje

Krótkopowěsće (11.02.19)

Montag, 11. Februar 2019 geschrieben von:

Dźe wo „Złoteho mjedwjedźa“

Berlin. Najwjetši filmowy festiwal Němskeje Berlinala je wotewrjeny. Hač do soboty wubědźuje so we hłownej kate­goriji 17 mjezynarodnych produk­cijow wo „Złoteho mjedwjedźa“ za najlěpši pask. Předsydka jury je francoska dźiwadźelnica Juliette Binoche. Z 69. raz wuhotowanym festiwalom rozžohnuje so zdobom Dieter Kosslik, kiž je zarjadowanje minjene 19 lět nawjedował.

Dalši zastojnicy powołani

Budyšin. Pjeć wučerjow ze serbskich a serbšćinu podawacych šulow w Sakskej přija dźensa wopismo zastojnika. Statny minister za kultus Christian Piwarz (CDU) je jim kaž tež dalšim němskim pe­da­gogam dokument we wobłuku swje­dźenskeho zarjadowanja w Budyskim zarjedźe Sakskeho krajneho zarjada za šulu a kubłanje přepodał.

Nyča a Krawc nominowanaj

Krótkopowěsće (08.02.19)

Freitag, 08. Februar 2019 geschrieben von:

Kelch sejmarjow zetkał

Choćebuz. Choćebuski wyši měšćanosta Holger Kelch (CDU) je wčera zastupjerjow Serbskeho sejma na dźěłowu rozmołwu přijał. W jeje wuslědku budźe město Choćebuz hosćićel jednoho z přichodnych posedźenjow Serbskeho sejma. Nimo toho su wosebite posedźenje za serbske naležnosće zamołwiteho wuběrka zhromadźizny měšćanskich zapósłancow ze sejmarjemi namjetowali.

Sylniši fokus na wuchod

Großhennersdorf. Wotnětka přistupna je brošurka „Njepřitomny: wuchodo- a srjedźoeuropski film w kinje“. Publikacija je wuslědk loni we wobłuku Filmoweho festiwala Nysa wuhotowaneje fachoweje konferency. Přinoški wobswětluja tuchwilny staw distribucije a předstajeja koncepty, kak połoženje polěpšić.

Programaj rozšěrić

Krótkopowěsće (07.02.19)

Donnerstag, 07. Februar 2019 geschrieben von:

Łužiski zawod rozšěrja

Carny Gózd. Zawod chemijoweho koncerna BASF w Carnym Gózdźe (Schwarzheide) budźe přichodnje rozšěrjeny. Tole staj braniborski ministerski prezident Dietmar Woidtke (SPD) a nawoda předsydstwa BASF łužiskeho stejnišća Uwe Liebelt dźensa zdźěliłoj. Tam 1 778 při­stajenych chemikalije za wobdźěłanje drjewa, papjery abo kumštnych maći­znow zhotowja.

Norwegowku wuznamjenja

Zhorjelc. Norwegska hudźbnica a dźiwadźelnica Bente Kahan, tuchwilu skutkowaca a bydlaca we Wrócławju, je lawreatka lětušeho Mjezynarodneho mo­stoweho myta Europskeho města Zhorjelc-Zgorzelec. We wobkrućenju rěka, zo wu­znamjenja „zahoritu Europjanku, kotraž so wobstajnje za wobchowanje jidiskeje lyriki a spěwa zasadźuje a tomu zadźěwa, na tutu ludowu kulturu pozabyć.“

Wosebite myto Kamjencej

Krótkopowěsće (06.02.19)

Mittwoch, 06. Februar 2019 geschrieben von:

Domaška předsyda wuběrka

Pančicy-Kukow. Runja zašłym lětam změja gmejny zarjadniskeho zwjazka Při Klóšterskej wodźe za lětuše komunalne a europske wólby kaž tež za wólby Sakskeho krajneho sejma zhromadny wólbny wuběrk. Jeho předsyda je Měrko Domaška. Zo wón runočasnje za wokrjesny sejmik kandiduje, so tomu njespřećiwja. Kaž wón wčera na posedźenju zarjad­niskeho zwjazka rjekny, je wokrjes tole prawnisce pruwował.

Prěnjej čestnaj čłonaj

Bórkowy. Domowinska župa Delnja Łužica je prěni raz čestne čłonstwo spožčiła. Jako čestneju čłonow su Manfreda Starostu a Erwina Hanuša za jeju wjelelětne prócowanje wo zachowanje a pěstowanje delnjoserbskeje rěče, mjez druhim za zestajenje słownikow, na hłownej zhromadźiznje minjeny pjatk w Bórkowach wuznamjenili.

Faworića so zakopolili

Krótkopowěsće (05.02.19)

Dienstag, 05. Februar 2019 geschrieben von:

Spěchowanje dóstali

Budyšin. Za přetwar swojeho twarjenja w Pančicach-Kukowje je zarjadniski zwjazk Při Klóšterskej wodźe wčera w Budyšinje spěchowanje sakskeho ministerstwa za ratarstwo a wobswět we wobjimje 900 000 eurow dóstał. Za 1,2 milionaj eurow chcedźa dom přetwarić a přistup bjez zadźěwkow polěpšić. Dźensa chcedźa zastupjerjo gmejnow prěnje planowanske dźěła přepodać.

Nowy superintendent

Budyšin. Drježdźanski farar Tilmann Popp budźe nowy superintendent cyrkwinskeho wobwoda Budyšin-Kamjenc. Wón naslěduje Wernera Waltsgotta, kotryž poda so 1. junija na wuměnk. Synoda cyrkwinskeho wobwoda je 52lětneho Poppa, tuchwilneho fararja Drježdźanskeje studentskeje wosady, minjeny pjatk z 45 hłosami wuzwoliła. Dalši kandidat dr. Sebastian Schurig dósta 29 hłosow.

Planuja „wjelče kwoty“

Krótkopowěsće (04.02.19)

Montag, 04. Februar 2019 geschrieben von:

Serbske filmy w Berlinje

Berlin. Serbsko-němske koło łužiskich filmowcow wuhotuje z podpěru župy Delnja Łužica we wobłuku festiwala Berlinale „Serbsku filmowu zymu“. Sobotu, 16. februara, pokazaja w Berlinskim kinje paski Anny-Kathrin Rentsch, Tonija Bruka, Romana Pernaka a Maje Nagloweje. Wšitcy režiserojo chcedźa so na wječoru wobdźělić.

Wustajeńca w Slepom

Slepo. Pućowaca wustajeńca „Wuchodna Hornja Łužica“ je wotnětka w Kul­turnym centrumje Slepo přistupna. Přehladka přirodoškitneje stacije Dołha Boršć předstaji ze zběrku plakatow hač do kónca měrca w zwučenych wote­wrjenskich časach centruma swoje nadawki kaž tež swojich sobudźěłaćerjow.

Kultus dawa pjenjezy

Anzeige

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019