Krótkopowěsće (05.06.15)

Freitag, 05. Juni 2015 geschrieben von:

Předewzaćelske myto 2015

Budyšin. Dwacety raz chcedźa lětsa hornjołužiske předewzaćelske myto spož­čić. Wot lěta 1996 wuznamjenjeja z nim wuspěšne a angažowane přede­wzaćelki a předewzaćelow. Za lětuše myto je dwanaće zawodow namjetowane. Dobyćerjow počesća składnostnje srjedźostawskeho dnja 30. junija w Budyskim Němsko-Serbskim ludowym dźiwadle.

Kurth za jednotnu maturu

Drježdźany. Sakska kultusowa ministerka Brunhild Kurth (CDU) ma jednotnu maturu po wšej Němskej dołhodobnje za trěbnu. Móžnosć přirunanja polěkuje samsnym šansam a sprawnosći, rjekny ministerka Kurth po­wěsćerni dpa. Maturitne wuslědki a přerězki znamkow su wažne kriterije při rozdawanju studijnych městnow.

Sawdi-Arabska hněwna

Krótkopowěsće (04.06.15)

Donnerstag, 04. Juni 2015 geschrieben von:

Třěcha kina so sypnyła

Kamjenc. Třěcha bywšeho Kamjenskeho kina je so dźens w nocy sypnyła. Wobydlerjo słyšachu wulki wrjeskot a widźachu mróčel kura. Zranił so na zbožo nichtó njeje. Wohnjowa wobora a tech­niski pomocny skutk běštej na městnje. Fachowcy pruwowachu, hač wokolnym twarjenjam strach hrozy. Dom njebu hižo wjacore lěta wužiwany.

Zasudźa nadpad

Drježdźany/Wojerecy. Migraciskopolitiska rěčnica frakcije Zelenych w krajnym sejmje Petra Zais nadpad na dom požadarjow azyla we Wojerecach raznje zasudźa. „Je zrudne, ale wěrno, zo njemóža so ćěkancy w Sakskej hižo wěsći čuć“, rěka w jeje zdźělence. Njeznaći běchu w nocy na srjedu spytali dom zapalić, štož pak so jim njeporadźi.

Stawk přetorhnjeny

Berlin. Stawk pěstowarkow w komunalnych dźěćacych přebywanišćach je přetorhnjeny. Dźěłarnistwo ver.di a komunalni dźěłodawarjo běchu dźensa rano po zwrěšćenju jednanjow zwólniwi, posrědkowanske jednanje zahajić. W tym času njeje dowolene stawkować. Posrědkować ma něhdyši Hannoverski wyši měšćanosta Herbert Schmalstieg.

Krótkopowěsće (03.06.15)

Mittwoch, 03. Juni 2015 geschrieben von:

Nowe towarstwo załožili

Budyšin. „Willkommen in Bautzen“ rěka towarstwo, kotrež su wčera w Budyskim Kamjentnym domje załožili. Iniciatorojo su čłonojo zwjazkarstwa „Budyšin wostanje pisany“. Za předsydu wuzwo­lichu Svena Scheidemantela. W Fisch­bachu bydlacy je sobustaw Budyskeho wokrjesneho sejmika za frakciju Lěwica.

Biskop Koch woteńdźe

Berlin/Drježdźany. Katolski biskop Drježdźansko-Mišnjanskeje diecezy dr. Heiner Koch ma so po informacijach powě­sćernje dpa z nowym Berlinskim arcybiskopom stać. 59lětny nastupi naslědnistwo Rainera Marije Woelkeho, kiž bě loni w septembru do Kölna wotešoł. Heiner Koch je wot lěta 2013 biskop w Drjež­dźanach a je sej tam mjeztym wjele připóznaća zdobył.

Čěska česći Jana Husa

Praha/Husinec. W zwisku z bližacej so 600. róčnicu spalenja nabožinskeho reformatora Jana Husa wotměwaja so w Čěskej republice wjacore zarjadowanja na jeho česć. Čěska telewizija wusyłaše minjene dny nowy třidźělny hrajny film wo idealach a tehdyšej dobje Husa. W jeho ródnym měsće Husinecu su wopomnišćo ponowili.

Krótkopowěsće (02.06.15)

Dienstag, 02. Juni 2015 geschrieben von:

Tilich biskopej gratulował

Drježdźany. Sakski ministerski prezident Stanisław Tilich (CDU) je nowemu biskopej Ewangelsko-lutherskeje krajneje cyrkwje Sakskeje Carstenej Rentzingej k wuzwolenju gratulował. Pokazujo na to, zo su ewangelscy wěriwi w Sakskej sobu­ najwjetše zjednoćenstwo wěriwych, přeje Tilich jemu wjele mocy, tež nastupajo přihot 500. jubileja reformacije 2017.

Nowa dźěćaca knižka wušła

Budyšin. Za młodych serbskich staršich a jich najmłódšich pjerachow je nětko w LND wušła nowa knižka z twjer­de­ho papjerca pod titulom „Moje naj­lubše powědančka wo zwěrjatach“. Dwanaće krótkich powědančkow, spisane wot Christy Kempter, je wjelelětna Witaj­pěstowarka Jadwiga Wejšina do hornjoserbšćiny přenjesła.

Rybowe tydźenje kiwaja

Krótkopowěsće (01.06.15)

Montag, 01. Juni 2015 geschrieben von:

Serbska hudźba w interneće

Budyšin. Nowe rozhłosowe wusyłanje „Wočiń woči“ budźe wot jutřišeho kóždu wutoru wot 17 do 19 hodź. w inter­netnym sćelaku LaBa (Lauter Bautzner) słyšeć. Je to reakcija na přewšo wuspěšne zarjadowanje ze samsnym mjenom w Budyskim Kamjentnym domje, kaž zamołwići sćelaka zdźěleja (http://laut.fm/lauterbautzner).

Proša wo wjace žiwidłow

Berlin. Hladajo na přiběrace ličby ćěkancow prosy Zwjazk taflow Němskeje wo wjace darjenych žiwidłow a žada sej wjace statneje podpěry. „Darjene žiwidła hižo w tej měrje njepřiběraja kaž ličby potrěbnych“, zwurazni předsyda zwjaz­ka Jochen Brühl dźensa w Berlinje. Stat njesměł so jenož na čestnohamtskich pomocnikow při taflach spušćeć.

Čěske honjaki do Islandskeje

Praha. Wjednistwo NATO prosy Čěsku republiku, zo by w juliju a awgusće powětrowy rum Islandskeje škitała. Podobnu lětadłowu misiju su Češa tam z pjeć honjakami JAS-39 Gripen hižo loni nazymu zwoprawdźili. Nětko maja w Islandskej dotal stražowace kanadiske lětadła narunać. Plan dyrbi čěske knježerstwo hišće schwalić.

Krótkopowěsće (29.05.15)

Freitag, 29. Mai 2015 geschrieben von:

Wědomostnicy w Błótach

Choćebuz. Wědomostnicy z dźesać krajow swěta přebywaja dźensa w Błótach. Wulět k Łužiskim Serbam w Braniborskej je dźěl witanskeho programa slědźerjow. Mjez nimi staj stipendiataj programa BRAIN, sociologa a slědźer wo mjeńšinach Giovanni Picker z Italskeje a specialist za słowjanske rěče Boban Arsenijević ze Serbiskeje.

Zaso 40 000 wobydlerjow

Budyšin. Ličba wobydlerjow Budyšina je lětsa w prěnim kwartalu zaso hranicu 40 000 překročiła. Dnja 31. měrca běchu dokładnje 40 004 z hłownym bydlenjom w měsće přizjewjeni, kaž Budyski statistiski wotrjad piše. Hłowna přičina je přiběraca ličba požadarjow wo azyl. Pozitiwny trend zwěsćeja tež nastupajo porody.

Katamaran so dliji

Zły Komorow. Wot 1. junija běchu jězby z katamaranom wot Złokomorowskeho na Lejnjanski jězor předwidźane. Nowa wosebita łódź pak dotal hišće hač do Złeho Komorowa dojěła njeje. Kaž jednaćelka łódźnistwa Marianne Löwa praji, přewjedu tam jězby z wosebitej łódźu najskerje hakle wot 15. junija. Łódź ma 5. abo 6. junija z wosebitym transportom dojěć.

Hry znowa napjate byli

Krótkopowěsće (28.05.15)

Donnerstag, 28. Mai 2015 geschrieben von:

Wulka česć Šimanej

Drježdźany. Zwjazkowy wonkowny minister Frank-Walter Steinmeier (SPD) je zapósłanca CDU w Sakskim krajnym sejmje Marka Šimana powołał za čłona přirady Němsko-čěskeho rozmołwneho foruma. Šimana jako předsydu dźěłoweho kruha za europsku politiku jeho frakcije namjetował bě sakski ministerski prezident Stanisław Tilich (CDU).

Cyrkwinski azyl skónčeny

Budyšin. Po nimale štyrjoch měsacach je so skónčił dotal jenički pad cyrkwinskeho azyla w Sakskej. Swójba ćěkancow z Irana dósta nětko tak mjenowanu dowolnosć přebywanja a smě so wo azyl w Němskej požadać. W ewangelsko-lutherskej wosadźe Budyskeje Strowotneje studnje měješe swójba wot februara schow a škit před wotsunjenjom.

Za nowe perspektiwy

Podstupim. Braniborski krajny sejm pyta nowe perspektiwy za wjesne regiony. Wot nazymy ma enquetna komisija sejma z wěcywustojnymi wo naprawach přećiwo woteběracej ličbje wobydlerjow wuradźować. Tež zawěsćenje wobstaća šulow, strowotniskeho zastaranja a bliskowobchada ma so wobkedźbować.

Tenistka Lisicki koło dale

Krótkopowěsće (27.05.15)

Mittwoch, 27. Mai 2015 geschrieben von:

Wulki zajim za listowe wólby

Choćebuz. Požadanska doba k zapisanju do wolerskeho zapisa za wólby Rady za serbske naležnosće Braniborskeje je so swjatki njedźelu skónčiła. Wólbny wuběrk je swjatki póndźelu poslednje wólbne podłožki póstej k rozpósłanju přepo­dał. Kaž předsyda wuběrka Jörg Masnik na na­prašowanje zdźěli, bě so něhdźe 1 600 braniborskich Serbow zapisać dało.

Kniha wo kóncu wójny wušła

Budyšin. Ludowe nakładnistwo Domowina je wudało knihu Křesćana Krawca­ „Hdźe je kóčka wostała?“. Na jara putace, ale tež awtentiske wašnje powěda­ spisowaćel dźěćom wot šěsć lět wo kóncu wójny – a to z wida dźěsća. Uwe Häntsch je powědku barbnje ilustrował. Kniha wuńdźe składnostnje 70. róčnicy zakónčenja Druheje swětoweje wójny­.

ABIchallenge Łužiskeje uni

Choćebuz. Braniborska techniska uniwersita Choćebuz-Zły Komorow pyta znowa najfitnišeho, najkreatiwnišeho a najmudrišeho abiturienta. 1. julija zahaji so 8. ABIchallenge na centralnym campusu w Choćebuzu, hdźež móža šulerjo­ pokazać, što w nich tči.

Wobě hrě live na MDR

Krótkopowěsće (26.05.15)

Dienstag, 26. Mai 2015 geschrieben von:

Čěskemu koleze so dźakował

Berlin. Prezident zwjazkoweho sejma Norbert Lammert (CDU) je so swojemu čě­skemu koleze Janej Hamáčekej při toho wopyće w zwjazkowym sejmje za parlamentariski program wuměny stipen­diatow dźakował, kotryž je tež w čěskim domje zapósłancow wuspěšnje zaběžał. Při tym dojednaštaj so dale na direktne kontakty čěskich a němskich zapó­słancow.

Chinske kupjele na Morawje

Brno. Chinska prowinca Hebei pola Pekinga chce w Pasohlávkach na južnej Morawje kupjelowy kompleks twarić. Projekt w hódnoće 80 milionow eurow měł za tři lěta hotowy być. Pacienća kupjelow maja być zastarani z klasiskimi europskimi procedurami; inwestorojo chcyli tež elementy tradicionelneje chinskeje mediciny poskićeć.

Zaso wjace samostatnych

Krótkopowěsće (22.05.15)

Freitag, 22. Mai 2015 geschrieben von:

Zajim za powołanski projekt

Budyšin. W Rěčnym centrumje WITAJ předstajištej wčera wučerka Katka Bukowa a lektorka Bianka Wjeńcyna wučerjam serbskich wyšich šulow ze Slepoho, Kulowa, Radworja, Ralbic, Budyšina a Worklec projekt k powołanskej orientaciji. Jón běštej wonej loni prěni raz we Worklecach přewjedłoj. Z toho nasta dwurěčna dokumentaciska mapa.

Pólske wuhlo Čechow traši

Liberec. Pólska chcyła pola Bogatynje, blisko hranicy Čěskeje republiki, brunicowu jamu rozšěrić. Po planach měła najbliša čěska wjes, Uhelná pola Hrádeka nad Nisou, potom jenož 500 metrow wot brunicoweje jamy zdalena być. Zamołwići Liberecskeho regiona tohodla protestuja, dokelž bychu pomjezne wsy potom wulke problemy z dnownej wodu měli.

Tarifowy zakoń schwaleny

Anzeige