Krótkopowěsće (22.06.17)
Strach njewjedrow přiběra
Berlin. Riziko njewjedrow dla w běhu wječora tež we Łužicy dale přiběra. Njewjedra traja zdźěla hač do nocy, dokelž nižina Pawoł wot zapada na wuchod přez Němsku ćehnje. Němska wjedrowa słužba warnuje tuž před njewjedrami ze sylnym wichorom, z městnami ze spěšnosću wjace hač 120 km/h. Móžne su krupy z wulkosću hač do třoch centimetrow kaž tež mócne zliwki.
Wusud wozjewjeny
Zhorjelc. W procesu wo rozbuchnjenju w jednym ze Zhorjelskich wjaceswójbnych domow z mortwym dźěsćom a wjacorymi zranjenymi je Zhorjelske krajne sudnistwo zawinowarja dźensa na lěto a šěsć měsacow jastwa zasudźiło. Chłostanje přećiwo 43lětnemu nanej wusadźichu sudnicy na pruwowanski čas.
Archeologow „mobilizowali“
Hradec Králové. Twar awtodróhi pola wuchodočěskeho města Hradec Králové archeologow njewšědnje wužaduje. Woni maja za powostankami wot prawěka hač do rakusko-pruskeje wójny lěta 1866 pytać. Kaž Hradecska uniwersita zdźěli, su nuzneho wurywanja dla samo dwaceći wukrajnych archeologow-praktikantow přeprosyli.
Krótkopowěsće (21.06.17)
Woidke přijědźe do Tšupca
Choćebuz. Braniborski ministerski prezident Dietmar Woidke (SPD) je čestny hósć lětušeho Serbskeho ewangelskeho cyrkwinskeho dnja w Tšupcu. Politikarja wočakuja 2. julija, kaž ze zdźělenki Spěchowanskeho towarstwa za serbsku rěč w cyrkwi wuchadźa. Wopominać chcedźa Tšupčanskeho fararja Albina Mollera, kiž bě 1574 Lutherowy katechizm wudał.
Nowy slědźenski centrum
Pomorcy. Sakski krajny zarjad za wobswět, ratarstwo a geologiju dóstanje nowy slědźenski centrum. Zakładny kamjeń za njón su dźensa w Pomorcach w Bukečanskej gmejnje połožili. Dobre 3,8 milionow eurow drohi kompleks ma klětu hotowy być a dotalnu pospytownju narunać, kotraž modernym narokam hižo njewotpowěduje.
Čěska přećiwo EU
Praha. Nutřkowny minister Milan Chovanec je wozjewił, zo chce Čěska republika na Europskim sudnistwje w Luxemburgu přećiwo njedawno wobzamknjenym směrnicam EU nastupajo wužiwanje bróni skoržić. Čěska sej žada, zo maja so směrnicy zběhnyć. Wone po jeje měnjenju wobsedźerjow bróni z raznymi postajenjemi diskriminuja.
Krótkopowěsće (20.06.17)
Dalše předewzaća rozjimali
Budyšin. Maćica Serbska chce so na ekskursiji do Ochranowa ze serbskim dźělom stawiznow bratrowskeje wosady zeznajomić. To wobzamknychu čłonojo předsydstwa wčera w Budyšinje. Pozitiwnje hódnoćachu woni zasadźenje towarstwa za to, zachować Budyski Serbski dom jako towarstwowe srjedźišćo.
Zeleni kritizuja ministra
Drježdźany. Sakski financny minister Georg Unland (CDU) žněje ze swojim žadanjom za masiwnym wottwarom dźěłowych městnow w krajnych institucijach kritiku Zelenych. Lutowanja su „přiběracy strach za fungowacy stat“, potwjerdźi nutřkowny fachowc Zelenych w krajnym sejmje Valentin Lippmann. Unland chcył dołhodobnje 16 000 městnow šmórnyć.
Zrěčenje podpisałoj
Krótkopowěsće (19.06.17)
Wučerjow w Bayerskej nawabić
Drježdźany. Wot přichodneho šulskeho lěta chcedźa wučerjow z Bayerskeje do Sakskeje přiwabić. Na to stej so zwjazkowej krajej dojednałoj, sakska kultusowa ministerka Brunhild Kurth (CDU) zdźěli. Nawabić chcedźa studentow wučerstwa, kotřiž nimaja w Bayerskej wuhlady na přistajenje. Přichodny tydźeń ma so wotpowědna wabjenska akcija zahajić.
Nadpady politisce motiwowane
Lipsk. Zapalerske atentaty na železniske čary po wšej Němskej steja po posudku operatiwneho wotwobaranskeho centruma w zwisku z wjerškom G 20 w Hamburgu. Dotal su dwanaće nadpadow w Sakskej, Berlinje a druhdźe registrowali, mjez druhim w Lipsku. Zapalerske atentaty su dźensa rano železniski wobchad masiwnje haćili.
Bosch chce w Sakskej twarić
Krótkopowěsće (16.06.17)
Tež serbske wsy pódla
Rowno. Pjeć wsow Zhorjelskeho wokrjesa – mjez nimi Rowno, Jabłońc a Chrjebja-Nowa Wjes – su so za wubědźowanje „Naša wjes ma přichod“ přizjewili. Fachowa jury kónc septembra wsy wopyta a pohódnoći. Dobyćer wokrjesneho wurisanja wobdźěli so na krajnym wubědźowanju a móže so tam za cyłoněmske finale skwalifikować.
Štyri miliony za projekt
Hamor. Zwjazkowe ministerstwo za hospodarstwo a energiju podpěruje nowe ideje za strukturnu změnu w brunicowej kónčinje ze štyrjomi milionami eurow. Składnostnje swojeho wopyta w Hamorje je ministerka Brigitte Zypries (SPD) wčera regionalnym partneram wotpowědne wopismo za modelowy projekt „Předewzaće rewěr“ přepodała.
Plahowanje hribow z ćežemi
Praha. Čěske plahowarnje šampinjonkow a wustričnych hribow bědźa so z problemami. Produkty njejsu w kraju tak woblubowane kaž druhdźe, dokelž Češa hriby radšo sami w lěsu zběraja. Nowy problem za nich je, zo z Pólskeje wo wjele tuńše hriby dowožuja. Wjetšina čěskich hribowych plahowarnjow je hižo zwrěšćiła, nowiny rozprawjeja.
Krótkopowěsće (15.06.17)
Minority SafePack online
Flensburg. Iniciatiwa Federalistiskeje unije europskich narodnych mjeńšin (FUEN) Minority SafePack zběra wotnětka tež online podpisma. Pod www.minority-safepack.eu su lisćiny za 40 krajow podate. Informacije dyrbja we wulkich pismikach a w žadanej rěči zapisane być. FUEN trjeba milion podpismow, zo by iniciatiwa wo škit mjeńšin před EU wuspěšna była.
Čestne čłonstwo spožčene
Budyšin. Serbski ludowy ansambl ma třoch nowych čestnych čłonow. Su to wjelelětna spěwarka a moderatorka SLA Lenka Winarjec-Šołćina, bywša baletna mišterka ansambla Isolde Weiden kaž tež wjelelětny a znaty bywši spěwar ćělesa Pawoł Šołta. Jim su dźensa na zarjadowanju bywšich ansamblowcow na žurli SLA čestne wopismo přepodali.
Mjeno za jězor wobzamknjene
Krótkopowěsće (14.06.17)
Zhromadnje spěwali
Wuježk. Kóždolětnje w juniju přewjeduje Bukečanska Bjesada spěwny wječor we Wuježku. Tam zetka so wčera znowa něhdźe 20 Serbow z Bukec a wokoliny, zo bychu zhromadnje spěwali a bjesadowali. Za přewod a podpěru při spěwanju běchu sej Michała Cyža přeprosyli. Marko Grojlich wobohaći wječork z powěsćemi, kotrež bě při slědźenjach w starych Serbskich Nowinach našoł.
Wobchad na Łobju haćeny
Drježdźany. Niłkeje wody dla je wobchad łódźow na Łobju tuchwilu wobmjezowany. Nakładne łódźe smědźa jenož hišće 20 procentow swojeje kapacity wućežić. Magdeburg wone scyła wjace njedocpěja. Tež wulětne parniki mjenje ludźi sobu bjeru, kaž sakski přistawowy zarjad zdźěla. W Drježdźanach je Łobjo runje hišće 75 centimetrow hłuboke.
Pokuta čěskej železnicy
Praha/Berlin. Statne železniske předewzaće České dráhy dyrbi Němskej železnicy pokutu 1,1 miliona eurow zapłaćić, dokelž njeje kaž přilubjene na čarje Praha–Berlin–Hamburg 93 modernizowanych wagonow zasadźiła. Pokutu chcedźa sej České dráhy nětko wot porjedźernje Pars Nova wróćo žadać.
Krótkopowěsće (13.06.17)
Zakładny kamjeń za kubłanišćo
Drježdźany. W přitomnosći sakskeho ministerskeho prezidenta Stanisława Tilicha (CDU) je Drježdźanska rjemjeslniska komora wčera zakładny kamjeń za nowy wukubłanski centrum w sakskej stolicy połožiła. Kubłanišćo, nastawace w štwórći Albertowe město, płaći něhdźe 40 milionow eurow. Do nowotwara ma mjez druhim Großenhainske wukubłanske stejnišćo zaćahnyć.
Wuslědki předstajili
Běła Woda. Wuslědki přepytowanja hary a procha z lěta 2016 w Miłorazu a Trjebinje brunicoweho hórnistwa dla je dźensa předewzaće Łužiska energija a milinarnje LEAG w Běłej Wodźe rozłožiło. Zdobom předstaji škitne naprawy wokoło Wochožanskeje brunicoweje jamy. Jutře chcedźa wobydlerjow mjenowaneju wsow informować.
Kontrole inkognito
Krótkopowěsće (12.06.17)
Wjele wopytowarjow přišło
Drježdźany. Tysacy ludźi su wčerawši dźeń wotewrjenych duri w knježerstwowych institucijach krajneje stolicy wužiwali. Tak móžachu so w ministerstwch rozhladować a so wo dźěle krajneho knježerstwa informować, kaž rěčnica krajneho knježerstwa zdźěla. Wosebje połne bě w sakskej statnej kencliji. Bě to mjeztym 15. akcija tohole razu.
Sudetska tema nadal w kritice
Liberec. Wobdźělenje Jana Korytářa, naměstnika Liberecskeho měšćanosty, na njedawnym sudetoněmskim zjězdźe w Augsburgu su komunistiscy zastupjerjo w regionalnym sejmiku wótrje kritizowali. Korytář chcył w Liberecu tež wobšěrnu ekspoziciju wo zhromadnych stawiznach a žiwjenju tamnišich Čechow a Němcow wutworić.
Awta so wupalili
Drježdźany. Na wšě štyri awta su so w nocy na njedźelu w Drježdźanach wupalili. Njeznataj skućićelej běštaj spočatnje dosć drohe jězdźidło zapaliłoj. Płomjenja so na tři dalše rozpřestrěchu. Wšitke štyri awta so wupalichu. Njeznataj skućićelej pak ćeknyštaj. Swědcy wołachu wohnjowu woboru. Policija pad přepytuje.
Krótkopowěsće (09.06.17)
Zeleni za „Załožbu přichoda“
Drježdźany/Podstupim. Hladajo na trěbnu strukturnu změnu we Łužicy namjetuja Zeleni wutworjenje „Załožby přichoda“. Je to jedyn z wjacorych klučowych projektow, kotrež běštej frakciji Zelenych w Sakskim a Braniborskim krajnym sejmje zestajałoj. W załožbje móhli so wšelake koncepty za čas po brunicy koordinować, Zeleni dźensa zdźělichu.
Festiwal wjace njebudźe
Drježdźany/Mißlareuth. „Festiwal wosrjedź Europy“ w třikrajowym róžku mjez Sakskej, Bayerskej a Čěskej je doskónčnje nimo. Lěto po zahajenju insolwencneho jednanja njewidźa zamołwići hižo žadyn přichod za koncertowy rjad w pomjeznej kónčinje, powěsćernja dpa rozprawja. Poprawom chcychu loni 25. lětne wobstaće festiwala swjećić.
Nastaja wulkobaterije
