Jězdźenki wot awgusta dróše
Budyšin. „Rozrost wudawkow nastupajo personal, ćěriwa, narunadła a wudźeržowanje zwiskow“ je Zaměrowemu wobchadnemu zwjazkej Hornja Łužica-Delnja Šleska (ZVON) z přičinu, jězdźenki wot 1. awgusta zdźěla podróšić. Potrjechene bilety za jednotliwca płaća potom znajmjeńša 10 a maksimalnje 80 centow wjace. Přerěznje powjetša so płaćizny wo 8 procentow.
Na FUEN-kongres
Flensburg. Federalistiska unija europskich narodnych skupin (FUEN) wotměje wot 7. do 10. septembra 2023 swój 67. kongres. Tónkróć zetkaja so zastupjerjo mjeńšinow w madźarskim měsće Pécs, kotremuž Němcy Fünfkirchen a Chorwaća Pečuh rěkaja. Zajimcy móža so hišće hač do 4. awgusta přizjewić a wuradźowanja live a po live-streamje sćěhować.
Testowa čara přepodata
Přihot na wustajeńcu
Wojerecy/Choćebuz. Nawoda měšćanskeho muzeja Northeim, Stefan Teuber, so wot dźensnišeho w srjedźnej a Delnjej Łužicy za eksponatami-požčonkami za wustajeńcu wo Serbach wot oktobra rozhladuje. Wojerowska županka Gabi Linakowa jeho přewodźa. Stacije su mjez druhim Krabatowy młyn, Patokec bróžnja na Horach, Serbski muzej w Choćebuzu a domizniski muzej Dešno.
Wuspěch za region
Plzeň/Budyšin. Hubert Wagner z Budyskeho towarstwa KBV je europski mišter w trojoboju za mocosport, kotryž je wón w ramiku europskich masters mišterstwow w čěskim měsće Plzeň dobył. Złoty metal je sej wón mj.dr. za čapawki z 277,5 kilogramow ćežidła zawěsćił. 42lětny sportowc je ze swojim wuspěchom dobyće narodneho mustwa zawěsćił.
Festiwal diwersnosće
Čas pandemije derje přetrali
Bóšicy. Po słowach předsydki Zwjazka serbskich rjemjeslnikow a předewzaćelow Móniki Cyžoweje, njeje mjez čłonami žadyn zawod, kotryž dyrbi statne pomocne srědki w času korona-pandemije wróćo płaćić. „Wjetšina předewzaćow pak je so sama starała a tutón čas bjez financneje podpěry přetrała – my Serbja wšak smy jara skedźbliwy lud“, wona doda.
Z AfD pragmatisce wobchadźeć
Drježdźany. W rozmołwje z nowinu FAZ je so ministerski prezident Sakskeje Michael Kretschmer (CDU) wčera za pragmatisku strategiju we wobchadźe z AfD na komunalnej runinje wuprajił. Zdobom pak warnuje tež před bagatelizowanjom prawicarskeho populizma. Podobnje běše so njedźelu CDU-šef Friedrich Merz w lěćnym interviewje ze sćelakom ZDF wuprajił a z tym kontrowersnu debatu wubudźił.
Atrakcija dale priwatna
CDU chce rozsud wobydlerjow
Budyšin. Frakcija CDU w Budyskej měšćanskej radźe na tym wobsteji, zo ma wobydlerstwo města wo Sprjewinym mosće rozsudźić. Wona je wotpowědnu próstwu wyšemu měšćanosće Karstenej Vogtej (CDU) posrědkowała. Wo tym informuje měšćanski radźićel CDU Tobias Schilling na swojej facebook-stronje. Kónc septembra ma rada zasadny rozsud wo twarje mosta tworić.
Klima a stare drjewjane hrjady
Drježdźany. Wot februara přewjedźe krajny zarjad za pomnikoškit Sakska (LfD) třilětny slědźerski projekt, kiž so ze sćěhami klimoweje změny za stare wjerchi z drjewowych hrjadow zaběra. Zapřijeći do projekta, kotryž Zwjazkowa załožba za wobswět (DBU) spěchuje, su mjez druhim Ewangelska-lutherska krajna cyrkej Sakskeje, restawratorojo a rjemjeslnicy.
Hišće swobodne FSJ-městna
Kónc wubědźowanja idejow
Budyšin. Wubědźowanje „Rěč zwjazuje – Rěc zwězujo – Sorbisch verbindet“ so nachila. Jenož hišće hač do jutřišeho móža zajimcy swoje ideje Załožbje za serbski lud posrědkować. Wobdźělnicy, kotřiž su hižo namjety zapodali, ale „techniskeho problema dla“ wobkrućenje njedóstali, měli so „wospjet pola załožby přizjewić, zo njeby so žana ideja zhubiła“.
Nowu klasu słóncow dopokazali
Heidelberg. Slědźerjam Centruma za astronomiju uniwersity Heidelberg je so z pomocu instrumentow Europskeje južneje hwězdarnje w Chile poradźiło, prěni raz „wuzutu hwězdu“ identifikować. Dotal ryzy hypotetisce klasifikowane objekty toho razu su „hwězdy, kotrychž hornje woršty su so nimale dospołnje pozhubili, tak zo hodźi so žro wobkedźbować“. Fachowcy nadźijeja so z wotkryćom „dopóznaćow nastupajo supernowy“.
Čěska chcyła němske tanki
Alfons Kuring njeboh
Pančicy-Kukow. Wučer, ludowědnik a chronikar Alfons Kuring z Pančic-Kukowa je w starobje 87 lět zemrěł. W Ralbicach, Chrósćicach a Worklecach je serbšćinu a rušćinu wuwučował. Wulke zasłužby zdoby sej jako chronikar najwšelakorišich podawkow w swojej domiznje. Za jeho skutkowanje počesćichu Alfonsa Kuringa z Čestnym znamješkom Domowiny a Mytom Domowiny.
Přeńdźenja přiběraja
Drježdźany. Na sakskich šulach přiběraja pady prawicarsko-ekstremistiskich přeńdźenjow. Tak registrowaše krimalnopoliciska wozjewjenska słužba za lěto 2022 73 njeskutkow z prawicarskim pozadkom. Lěto do toho buchu 53 padow registrowanych. Pady wobsahowachu we wulkim dźělu wužiwanje zakazanych symbolow kaž hokatych křižow a runow ns-organizacije SS.
Pytaja dale inwestora
Lawicu pytali
Berlin. W južnym Berlinje je policija dźensa twochnjene rubježne zwěrjo pytała. Po wšěm zdaću jedna so wo lawicu. Swědkojo běchu pola Kleinmachnowa wobkedźbowali, kak je wona dźiwje swinjo moriła. Zwotkel lawica je, njeje znate. W zwěrjencach a cirkusach žana njepobrachuje. Wobydlerjow su z warnowanskej app na móžne strachu skedźbnili.
Prezidij Domowiny so zešoł
Choćebuz. Do swojeho posedźenja su wčera čłonojo prezidija Domowiny lětne zetkanje ze župnym předsydstwom Delnja Łužica přewjedli. Tema běchu namjety župy k dźěłowym směrnicam třěšneho zwjazka a plan za rewitalizaciju rěče. Na lětuši dźeń Saksow deleguja Serbski kulturny turizm z.t. a Serbski folklorny ansambl Wudwor. Skupina Astronawt pojědźe na serbski wječor do Wrócławja.
Serbske temy na konferency
Smědźa zaso brunicu wudobywać
Waršawa. Pólske wyše zarjadniske sudnistwo je wčera rozsudźiło, zo smě wobhospodar PGE w brunicowej jamje Turjej zaso brunicu wudobywać. Skoržili stej mjez druhim město Žitawa a wobswětowa organizacija Greenpeace z Čěskeje a Němskeje, dokelž mějachu wobmyslenja nastupajo wobswětoškit.
Hrimanja a sylne spadki móžne
Drježdźany. Wobydlerjo w Sakskej maja so w nocy na njewjedra nastajić. Tak su lokalnje hrimanja a sylne zliwki móžne. Kaž meteorologojo Němskeje wjedroweje słužby dźensa zdźěla, wočakuja z blakami tež sylny wichor. Temperatury přichodne dny budu trochu niše. Tak leža jutře mjez 21 do 24 stopnjemi celsiusa. Zajutřišim dyrbja ludźo z dešćom ličić.
Čěski „Colt“ Ukrainu wubróni
Praha/Ottawa. Kanadiske knježerstwo je wozjewiło, zo w zwisku z wojerskej pomocu přepoda wojowacej Ukrainje 21 000 nadběhowych třělbow, 38 mašinskich třělbow kaž tež 2,4 miliony projektilow. Tute brónje a municiju doda předewzaće Colt Canada – jedna ze zamórskich filialow čěskeje firmy Colt CZ Group (do lěta 2022 znateje jako Česká zbrojovka).
Dale škody přez hórnistwo
Turjej. Zeleni sej žadaja, zo ma so w Braniborskej zaso městno za wujednanje z LEAG a LMBV nastupajo škody přez hórnistwo instalować. Njedźelu su sej ludźo na přeprošenje ewangelskeje cyrkwje na wobchodźenje zetkali, zo bychu sej wotpowědny škody chěžow a wěže wohnjoweje wobory wobhladali. Dotalne městno je kónc 2022 dźěłać přestało, po tym zo njeje je kraj hižo financował.
Lětsa z nowymi stacijemi
Zhorjelc. Załožba za wuměłstwo a kulturu w Hornjej Łužicy přewjeduje lětsa znowa akciju „Wuměłstwowy bus Hornja Łužica“. Je to mjeztym dźewjate wudaće. Lětsa přeprošuja organizatorojo zdźěla na nowe zarjadnišća. Tak wobdźěli so na přikład konsumowa galerija w knježim domje w Zarěču. Kartki za bus móžeće sebi online pod www.kunstbus-ol.de kupić.
Chcedźa gurmejow nawabić
Smolerjec kniharnja wotewrjena
Budyšin. Smolerjec kniharnja je wot dźensnišeho, 17. julija, w času wot 11 do 17 hodźin zaso wotewrjena. Nětko wobsteji móžnosć, so w kniharni rozhladować a sej tohorunja knihi z druhich nakładnistwow kupić a skazać. Nawodnica kniharnje Annett Šołćic kupcow zaso po zwučenym wašnju poradźuje. Zdobom hodźa so tež terminy za antikwariski nakup dojednać.
Nowa redaktorka Rozhlada
Budyšin. Wot 17. julija přewozmje Hańžka Wjeselic z Drježdźan nawod redakcije Rozhlada. Wona naslěduje mjez druhim redaktorow Katrin Čornakec a dr. Viktora Zakara. Jako studowana sorabistka a wuměłča ma 27lětna nazhonjenja na polu online-redaktorstwa, připódla pisa beletristiske twórby a zajimuje so za přirodu.
Na campusu zaso dźěłaja
Radwor. Cyłkownje dźesać dźěći z Radworja, Budyšina, Lutobča a Hórki wobdźěla so dźensa a jutře na prózdninskim campusu experiMINT w Radworju. Dr. André Mirtschink spřistupnja jim robotiku, při čimž sej mjez druhim małke awto natwarja. W běhu prózdninow stej dalšej poskitkaj planowanej.
Alcaraz porazy Đokovića