Krótkopowěsće (20.03.23)
Tilman Zülch njeboh
Göttingen. Załožer „Towaršnosće za wohrožene ludy“ (GfbV), Tilman Zülch, je w starobje 83 lět zemrěł. To je organizacija kónc tydźenja zdźěliła. Burkhard Gauly, předsyda GfbV, njeboćičkeho jako „wizionara dźěła za čłowjeske prawa“ hódnoćeše. Tež Serbam běše Zülch wospjet solidarisce poboku, nic naposledk w zwisku z wotbagrowanjom serbskich wsow.
Dźěłowe městna nješmórnu
Budyšin/Zhorjelc. Koncern Alstom najprjedy raz 500 dźěłowych městnow na stejnišćomaj Budyšin a Zhorjelc nješmórnje. Zawčerawšim je so koncern ze zastupjerjemi dźěłarnistwa IG metal na to dorozumił. Tole pak je jenož přechodne rozrisanje. Tak matej zawodaj w přichodźe dopokazać, zo stej wubědźowanjakmanej. Wo wuslědkach jednanjow chcyše Alstom w běhu dnja informować.
Šule su hosćencam konkurenca
Krótkopowěsće (17.03.23)
Zaso wjace turistow w jězorinje
Zły Komorow. Loni je so wjac turistow do Łužiskeje jězoriny podało hač do pandemije. 2022 zličichu 848 735 přenocowanjow, to je 1,7 procentow wjac hač 2019. Přirunujo z lětom 2021 je běrow Turistiskeho zwjazka Łužiska jězorina w Złym Komorowje stopnjowanje wo 21,8 procentow wobkedźbował.
Kupnicu w Lipsku tola njezačinja
Lipsk. Kupnicu „Galeria Karstadt Kaufhof“ w Lipsku porno njedawnej připowědźi (SN su rozprawjeli) tola njezačinja. To samsne płaći za wotnožki w Bayreuće, Erlangenje, Oldenburgu a Rostocku. Po aktualnym stawje změje 47 filialow předawać přestać, 82 stejnišćow móže wostać. Korektura je tež wuslědk jednanjow z wobsedźerjemi domow wo nišu podruž.
Na lětanišćo z ćahom
Praha. Hižo wot 1990tych lět je w Čěskej rěč wo potrjebje natwara moderneho železniskeho zwiska na Praske lětanišćo. Nětko skónčnje twarić započnu. Čara w hódnoće dweju miliardow eurow zwjaza centrum čěskeje stolicy nic jenož z lětanišćom Václava Havela na zapadnej mjezy města, ale tež z městom Kladnom z nimale 70 000 wobydlerjemi. Nowu železnicu chcedźa w lěće 2030 za wobchad přepodać.
Krótkopowěsće (16.03.23)
Helmut Kurjo njeboh
Bluń. Wutoru je we Wojerowskej klinice woblubowany dołholětny braška Helmut Kurjo, w starobje 88 lět, zemrěł. Lawreat Myta Domowiny, kotryž je so tež lětdźesatki dołho w třěšnym zwjazku angažował, běše posledni nošer Blunjanskeho dialekta. Wuběrny znajer a zběrar wšěch dźělow narodneje drasty regiona móžeše wšě wjesne narěče Wojerowskich Serbow rozeznawać (wjac jutře w nekrologu).
Wjace wuknjacych w Sakskej
Wiesbaden. Ličba šulerkow a šulerjow w Sakskej je přiběrała. W tuchwilnym šulskim lěće 2022/2023 wuwučuja 511 500 wuknjacych na powšitkownokubłacych a powołanskich šulach kaž tež na šulach strowotnistwa. Tu su tři procenty wjace hač w minjenym šulskim lěće. Na to skedźbni dźensa Statistiski zwjazkowy zarjad we Wiesbadenje.
Regionalisća so wjesela
Krótkopowěsće (15.03.23)
Za solarny park hłosowali
Hamor. Předewzaće Łužiska energija a milinarnje (LEAG) smě w Hamorje nowy solarny park twarić. Tomu je gmejnska rada póndźelu přihłosowała. Hižo zańdźeny tydźeń je energijowe předewzaće zamołwitemu twarskemu dohladowanskemu zarjadnistwu próstwu zapodało. Dotal LEAG z toho wuchadźa, zo móža park lětsa w septembrje twarić započeć.
„Nowe“ a „klasiske“ medije
Budyšin. Wzajomne skutkowanje „klasiskich“ a „nowych“ medijow, róla socialnych syćow a měnjace so nadawki žurnalizma za čas „njefiltrowaneje komunikacije wšitkich ze wšěmi“ tworjachu ćežišća wčerawšeje podijoweje diskusije pod hesłom „Social media w konteksće protestnych hibanjow“ w Budyskim młodźinskim klubje Kurti. Referentaj běštej Daniel Lehmann a Osman Oğuz.
Měrja so na „Serbske impresije“
Krótkopowěsće (14.03.23)
Stejnišćo wagonownje zachować
Niska. Mjeztym hižo 18. króć chcychu přistajeni wagonownje w Niskej dźensa popołdnju napominansku stražu wotměć, žadajo sej konkretne připrajenja za stejnišćo. Hižo před štyrjomi dnjemi su zastupjerjo zawoda list zwjazkowemu hospodarskemu a wobchadnemu ministerstwu pósłali. Po nim měłoj so ministerstwje za stejnišćo wagonownje zasadźić.
Do dźěłoweje skupiny powołani
Choćebuz. Choćebuski wyši měšćanosta Tobias Schick (SPD) je wčera wosom čłonow do dźěłoweje skupiny „Serbske pomniki města Choćebuz“ za dobu hač do lěta 2026 powołał. Mjez nimi su tež zastupjerjo Serbskeho muzeja, Serbskeho instituta a župy Delnja Łužica. Gremij nawjeduje Anna Kosacojc-Kozelowa, zamołwia za serbske naležnosće Choćebuza.
Krizowy stab so wobhonił
Krótkopowěsće (13.03.23)
Z elektroawtami po puću
Budyšin. W Budyskim krajnoradnym zarjedźe maja wot dźensnišeho prěnje elektroawta typa Volkswagen ID3. Wone narunaja pjeć wozydłow z dieselowym motorom, kotrychž doba leasinga bě wotběžała. Wozydłowy park krajnoradneho zarjada wopřija mjez cyłkownje 70 wozydłami wosom elektriskich. Klětu dalše na elektriske wuměnjeja.
Pisa filmowe stawizny
Los Angeles. Z dźewjeć nominowanjemi běše film po romanje Ericha Maria Remarqua „Na zapadźe ničo noweho“ wulki faworit na wčerawšim mytowanju Oscarow. Němski antiwójnski film režisera Edwarda Bergera je při 95. Academy Awards štyri myta dobył, tak Oscar za najlěpši mjezynarodny film, za kameru, scenowy wobraz a filmowu hudźbu. Tak je produkcija Netflix dotal najwuspěšniši němski film při mytowanju z Oscarami.
Łužiske „sydomstowki“ přewinyć
Krótkopowěsće (10.03.23)
Zetkanje serbskich institucijow
Budyšin. Na kwartalnym posedźenju serbskich institucijow w Budyšinje a online su so zaso z centralnej serbskej protyku zaběrali. Zarjad załožby dźěła na tym, kak móhli wšelake techniske systemy institucijow mjez sobu zwjazać. Za nawabjenje dorosta chcedźa zhromadnu digitalna sćěnowinu wuhotować, na kotrejž móža so zajimcy centralnje wo dźěłowych poskitkach informować.
Historisku wědu wužiwać
Budyšin/Lipsk. Wědomostnica Serbskeho instituta dr. Jenny Hagemann je na podijowej diskusiji Leibnizoweje slědźenskeje syće „Historiska wěda a změna strukturow w energijowych krajinach“ dźensa w Lipsku mjez druhim dopóznaće wuzběhnyła, zo móža historisku wědu wo pohórnistwowych krajinach we Łužiskim rewěrje wužiwać, zo bychu regionalnu identifikaciju skrućili a rozjimali.
Kritizuja dlijace so wobdźěłanje
Krótkopowěsće (09.03.23)
„Radu přichoda“ wuzwolili
Berlin. Rozhłosowa komisija zwjazkowych krajow Němskeje je so na poradźowanski gremij za přichod zjawnoprawniskeho rozhłosa dojednała. „Radźe přichoda“ přisłušeja mjez druhim šwicarski publicist Roger de Weck, zwjazkowy sudnik na wuměnku Peter M. Huber a žurnalistka Maria Exner. „Temporarnje skutkowacy gremij“ ma „dołhodobne perspektiwy za zjawnoprawniske medije wuwić“ a „zdźěłać poručenja za stopnjowanje jich akceptancy“.
Nowy 5. lětnik bjez problemow
Budyšin. Z ličbow přizjewjenjow šulerjow za 5. lětnik serbskich šulow w Hornjej Łužicy njejsu žane problemy wuwidźeć, ani přewulka ani njepřizwolena rjadownja, praji na naprašowanje SN kubłanska referentka Domowiny Katrin Suchec-Dźisławkowa. Po powěsći serbskeho rozhłosa maja na wyšej šuli w Slepom a w Budyskim Serbskim gymnaziju najwjace přizjewjenjow (56).
Krajansku skupinu njezabyć
Krótkopowěsće (08.03.23)
Z nowym labelom za žony
Drježdźany. Techniska uniwersita Drjež- dźany młode žony w zwisku ze studijom přirodowědow a technikowědow z mnohostronskimi projektami podpěra. Tute nětko pod labelom Campus Johanny Weinmeister zwjazuja a wozjewjeja. Weinmeister bě jedna z dweju studentkow, kotrež běštej so 1907 – nětko za žony w Sakskej oficialnje dowolene – za studij zapisałoj.
SKT z wabjenskim krótkoklipom
Slepo. Wo wutwarje kolesowanskeje šćežki „Serbske impresije“ we wobłuku wuwića strukturow je so předsydstwo towarstwa Serbski kulturny turizm (SKT) tele dny wuměniło. Kaž projektowy manager Franc Golchert zdźěli, su dale finalne dźěła za prěni wabjenski krótkoklip wo serbskich jutrownych nałožkach přihotowali a dźěławosć w dźěłowym kruhu „Serbska kupa“ rozjimali.
Złóstnistwa dokumentować
Krótkopowěsće (07.03.23)
Termin wólbow postajili
Trjebin. Wobydlerjo Trjebinskeje gmejny wola 27. awgusta noweho wjesnjanostu. To su gmejnscy radźićeljo wčera wobzamknyli. Přičina je, zo je dotalny wjesnjanosta Waldemar Locke (CDU) strowotnych přičin dla zastojnstwo złožił. 60lětny bu 2017 za wjesnjanostu wuzwoleny. Ćežišća jeho dźěła běchu přesydlenje Miłoraza, wutwar spěšneho interneta a wopłóčkowa syć w Trjebinku.
Stawki dale rozšěrja
Zhorjelc. Dźěłarnistwo ver.di je nětko tež přistajenych zjawneje słužby w Běłej Wodźe, Rózborku a Niskeje namołwjało stawkować. Tak wostachu dźensa mjez druhim měšćanske a gmejnske zarjady a pěstowarnje zawrjene. Manifestaciju wotměchu před dwórnišćom w Běłej Wodźe. Tež jutře su stawki předwidźane, potom přizamknu so sobudźěłaćerjo zjawneje słužby Budyskeho wokrjesa.
Schubert přećiwo wutwarej A 4
