Krótkopowěsće (10.11.22)
Dalše namjety trěbne
Budyšin. Dobu za zapodaće kandidaturow ze Sakskeje za přichodnu wólbnu periodu załožboweje rady hač do kónca nowembra podlěšić je prezidij Domowiny na swojim wčerawšim posedźenju jednohłósnje namjetował. Dotal pjeć personalnych namjetow předleži, trěbnych pak je znajmjeńša wosom za štyrjoch rjadnych a štyrjoch zastupowacych radźićelow. Jich wólby su na wurjadnym posedźenju zwjazkoweho předsydstwa 13. januara 2023 předwidźane.
Budyšan předsydari kuratorijej
Drježdźany. Budyski kachlicarski mišter a wokrjesny radźićel Mike Hauschild předsydari kuratorijej Wilhelma Külzoweje załožby, liberalneho kubłanskeho skutka w Sakskej. Čłonojo gremija su jeho 5. nowembra wuzwolili.
Snadne wuskutki
Krótkopowěsće (09.11.22)
„Eksil a wuznam wjacerěčnosće“
Drježdźany. Dalmatiska basnica Marica Bodrožić je předwčerawšim z prěnim čitanjom w centralnej bibliotece Drježdźanskeho kulturneho palasta Chamisso-docenturu poetiki Sakskeje akademije wuměłstwow 2022 nastupiła. Jeje ćežišća, na kotrež chce z dalšimaj čitanjomaj stajnje póndźelu nawjazać, běchu „domizna, eksil a wuznam wjacerěčnosće“ .
Najwjetši slědźerski projekt
Lipsk. Zhromadna wědomostna konferenca Zwjazka a zwjazkowych krajow je wčera „Slědźerski portal BACH“ Sakskeje akademije wědomosćow přizwoliła. Z tym móže dotal najwjetši projekt k wuslědźenju wuznamneje hudźbneje dynastije w januarje 2023 startować. Projekt ma 25 lět běžeć a je dźěl akademijoweho programa, kotryž je aktualnje najwjetši duchowno- a kulturnowědny dołhodobny slědźerski program Němskeje.
Morawske wědomje žiwe
Krótkopowěsće (08.11.22)
Pop raz hinak
Budyšin. Wosebite hudźbne chłóšćenki poskića serbska hudźbna skupina Brankački. W kooperaciji z radijowym sćelakom MDR Jump poskićeja jako skupina Popsorben na Instagramje hudźbny kwis z coverami znatych spěwow w stilu polki.
Nowy wučer za kurs čěšćiny
Chrósćicy. Nowy rěčny kurs čěšćiny je wčera w Chrósćicach z nowym wučerjom Jiřijom Jonákom startował. Wón je naslědnik Jana Breindla, kotryž bě dotal w nadawku Rěčneho centruma WITAJ dźěći kaž tež dorosćenych w čěšćinje wuwučował. 47lětny Jiři Jonak pochadźa z Ústíja nad Labem a je w minjenych 16 lětach w Brüsselu wuwučował.
Hišće njerozjasnjene prašenja
Drježdźany. Na wčerawšim 3. sakskim energijowym wjeršku zastupjerjow sakskeho knježerstwa a zwjazkow wšelakich branšow běchu hišće wotewrjene prašenja nastupajo zwoprawdźenje wot Zwjazka planowanych wolóženjow k złahodnjenju energijowych płaćiznow. Hospodarski minister Martin Dulig (SPD) připowědźi podpěru swobodneho stata, dyrbjał-li pomocny fonds Zwjazka za małe a srjedźostawske předewzaća hišće dźěry wotkryć.
Krótkopowěsće (07.11.22)
Fachowe zetkanje dźiwadłow
Brest. Na zetkanju mjezynarodneho mjeńšinoweho dźiwadłoweho projekta „Phōnē – mjeńšinowym rěčam hłós dać“ minjeny kónc tydźenja w francoskim Bresće wuradźowachu zastupjerjo marketingowych wobłukow wobdźělenych jewišćow wo „komunikaciskich strategijach“ a předstajichu internetowu stronu projekta. Reprezentantka Němsko-Serbskeho ludoweho dźiwadła bě Anna Měrćinowa.
Inwestuja něhdźe miliardźe eurow
Choćebuz. Za planowane zaměstnjenje medicinskeje fakulty z dohromady 60 profesurami a wutwar komunalneje Carla Thiemoweje chorownje w Choćebuzu na uniwersitny klinikum maja so 1,9 miliardow eurow ze strukturneho fondsa Zwjazka za brunicowe regiony nałožować. Projekt je dźěl wutworjenja modeloweho regiona „Strowota Łužica“.
Myta Grünbauma spožčili
Krótkopowěsće (04.11.22)
Dźewjeć projektow přizwolenych
Wojerecy. We wobłuku strukturneje změny je regionalny přewodźacy wuběrk Łužiskeho rewěra na swojim třećim posedźenju wčera w Hórnikečanskej Energijowej fabrice dźewjeć projektam přizwolił. Po projektowych podłožkach ma z nich něhdźe 440 nowych dźěłowych a wukubłanskich městnow nastać, dalšich wobstejacych 110 zawěsćeja.
Blokaj syći zaso připinjenej
Janšojce. Dwaj energijoweje krizy dla reaktiwowanej blokaj Janšojskeje brunicoweje milinarnje stej syći po mylenju wot srjedy zaso připinjenej, kaž rěčnik LEAG wčera zdźěli. Před nimale tydźenjomaj bě předewzaće wo mylenju bloka F a jeho wotpinjenju informował, kotryž pak něšto dnjow pozdźišo zaso produkowaše. Na kotole bloka E su škodu wotstronili, bjez toho, zo bu ze syće wzaty.
„Czechia“ so přesadźuje
Krótkopowěsće (03.11.22)
Kulturny potencial rozjimali
Slepo. Župa Jakub Lorenc-Zalěski je we wobłuku wčerawšeje bjesady w Slepom wo přichodźe Serbskeho kulturneho centruma diskutowała. Něhdźe 30 čłonkow a čłonow je sej potencial w swojej kónčinje wuwědomiło, wuzběhujo mjez druhim mnohe aktiwne towarstwa, dudakowy festiwal a wubědźowanje wo najlěpši warjeny twarožk lěta.
Dotal žanych dopóznaćow
Budyšin. Po palerskim nadpadźe na planowany kwartěr za ćěkancow „Sprjewiny hotel“ minjeny pjatk w Budyšinje wobšěrne přepytowanja traja. Kaž krajny kriminalny zarjad (LKA) informowaše, njeje žanych nowych dopóznaćow skućićelow nastupajo. Tuchwilu su zwěsćowarjo přičiny wohenja městnosć přepytowali a slědy zawěsćili, praji rěčnica LKA wčera na naprašowanje.
Za demokratiju a integraciju
Krótkopowěsće (02.11.22)
Scholz nowu twornju wopytał
Carny Gózd. Zwjazkowy kancler Olaf Scholz (SPD) je planowany wutwar produkcije miliny w Němskej potwjerdźił. „Chcemy produkciju miliny hač do kónca lětdźesatka na 800 terawattowych hodźin wutwarić“ , wón wčera na wopyće noweje twornje za baterijowe komponenty chemijoweho koncerna BASF na stejnišću Carny Gózd wuzběhny. Předewzaće so zaměrnje na energijowej změnje wobdźěli.
Termin za Europeadu 2024 jasny
Berlin. Po europeadźe je do europeady. Časowy ramik za přichodne koparske europske mišterstwa narodnych mjeńšinow je postajeny. Wot 28. junija do 7. julija 2024 so w němsko-danskej pomjeznej kónčinje pod hesłom ,,Mjez morjomaj“ zaso do bula kopa. Serbske mustwo so znowa wobdźěli.
Snadny přirost bjezdźěłnosće
Krótkopowěsće (01.11.22)
Połdra tysac přihladowarjow
Chróšćicy. Na cyłkownje pjeć wupředatych předstajenjach přewažnje wot dźěći a młodostnych zwoprawdźeneje spěwohry „Z Tobu – Bohu swjećene lěto“ w Chróšćanskej wjacezaměrowej hali „Jednota“ zličichu dohromady něhdźe 1 500 wopytowarjow. Hłowna organizatorka Sabina Lanzyna a komponist Měrćin Weclich běštaj po poslednim předstajenju wčera z wothłosom „přewšo spokojom“.
Druhi najćopliši oktober
Offenbach/Drježdźany. Lětuši oktober je w Sakskej po nachwilnym wuhódnoćenju Němskeje wjedroweje słužby (DWD) druhi najćopliši po zahajenju wjedrowych zapisowanjow. Přerězna temperatura bě 12,2 stopjenjej celsiusa. Ćoplišo běše jenož w lěće 2001, hdyž zwěsćichu přerěznu temperaturu 12,4 stopjenjow celsiusa, kaž DWD wčera informowaše.
Swětowy kongres cymbalistow
Krótkopowěsće (28.10.22)
Ministerka hospituje w jastwje
Drježdźany/Zhorjelc. Sakska justicna ministerka Katja Meier (Zwjazk 90 / Zeleni) je w Zhorjelskim jastwje přistajenych cyły dźěłowy dźeń přewodźała. Wona přizna dźěło w jastwje jako cyłotowaršnostnje wuznamny nadawk. W Sakskej je aktualnje 2957 zajatych – 171 z nich w Zhorjelskim jastwje.
Kupjel kónc tydźenja zawrjena
Kamjenc. Płuwarnja w Kamjencu budźe wot 1. nowembra nachwilnje zawrjena. Budyski wokrjes bě to jako nošer kupjele wobzamknył. Přičina zawrjena je wotpohlad lutować energiju. Kupjel je tuž aktualnje wot póndźele do pjatka 6.30 do 22.00 hodź wotewrjena. Wužiwanje sawny je w tutym času wot 14 do 22 hodź. móžne.
Žadneho konja wuchowali
Praha/Ulaanbaatar. Mongolski prezident Uchnaagiin Chürelsüch spožči direktorej Praskeho coowa Miroslavej Bobekej „Rjad polarneje hwězdy“ za njewšědne zasłužby zwěrjenca nastupajo wjelelětne prócowanja wo zachowanje dźiwjeho Przewalski-konja. Praski zwěrjenc zwoprawdźi hižo dźewjeć lětadłowych transportow z dźesatkami w Čěskej wuplahowanych koni do zapadneje Mongolskeje.
Krótkopowěsće (27.10.22)
Dyrbja terarij zawrěć
Drježdźany. Terarij w Drježdźanskim zwěrjencu ma so wysokich energijowych kóštow dla hižo zašo dospołnje zawrěć hač poprawom planowane, a to hižo 1. nowembra. Někotre z tam zaměstnjenych zwěrjatow wostanu w zwěrjencu, dalše budu nowym wobsedźerjam wotedać.
Wjac dźělneho studija
Gütersloh. Studowacy w Sakskej móža přiběrajcy tež dźělnje studować. Tole wuchadźa ze studije centruma za wysokošulske wuwiće. Přirunujo z tamnymi šěsnaće zwjazkowymi krajemi leži Sakska z tym na pjatym městnje. Najwjetši poskitk maja studowacy w předmjetach wuměłstwo, hudźba, design kaž tež rěčne a kulturne wědomosće. Tu ležeše dźělnočasowa kwota lětsa hač dotal zwjetša nad 56 procentami.
Ptačka lěta wolili
Berlin/Hilpoltstein. Přirodoškitny zwjazk Němskeje a Bayerski krajny zwjazk za škit ptačkow a přirody stej dźensa „Ptačka lěta 2023“ wozjewiłoj. Pjeć kandidatow nastupi wubědźowanje wo titul: bruna ročka (Braunkehlchen), pólny wrobl (Feldsperling), srokopjel (Neuntöter), wódna kokoška (Teichhuhn) a žarowanski šnapak (Trauerschnäpper).
