Krótkopowěsće (07.03.17)

Dienstag, 07. März 2017 geschrieben von:

Woheń w domje ćěkancow

Wojerecy. We Wojerowskim domje ćěkancow na Thomasa Müntzerowej je wčera popołdnju woheń wulku škodu zawinił. Jedna rumnosć so dospołnje wupali. Třoch wobydlerjow w starobje 20 do 31 lět dyrbješe wohnjowa wobora wuchować. Přičina wohenja njeje hišće wujasnjena. Cyłkownje přebywa w domje ně­hdźe 300 ćěkancow.

Ptača gripa so rozpřestrěwa

Hamor. Tež Bjerwałdski jězor je mrětwy dźiwjeje pjerizny dla nětko zawrjene pasmo. Tole zdźěli Zhorjelski krajnoradny zarjad. Fachowcy běchu pola třoch zahinjenych ptakow strašny wirus H5N8 zwěsćili. Cyłkownje ma wokrjes šěsć zawrjenych pasmow ptačeje gripy dla.

Studija wo stronach we Łužicy

Budyšin. W rjedźe spisow Serbskeho instituta je w LND wušła studija Michaela Richtera „Deutsche Parteien in der sorbischen Oberlausitz 1945–1953“. Awtor rysuje proces, kak so Domowina a strony pod wliwom sowjetskich zaměrow we formje simulowaneje demokratije přez wobsadnisku móc a wot njeje nawjedowaneje SED politisce podrywachu a so do nastawaceje diktatury zawjazachu.

Budissa ma noweho trenarja

Krótkopowěsće (06.03.17)

Montag, 06. März 2017 geschrieben von:

Wjac personala w nawodnistwje

Gütersloh. W sakskich pěstowarnjach pobrachuje wjac hač 1 000 dźěłowych městnow w nawodnistwje. Tole zdźěli dźensa Bertelsmannowa załožba w Güterslohu, hdźež předstaji wotpowědnu studiju. Zo móhli předstawy załožby zwoprawdźić, trjeba Sakska přidatnje 62 milionow eurow za personalne kóšty w dźěćacych dnjowych přebywarnjach.

Muzej dóstanje noweho šefa

Lipsk. Awstričan Alfred Weidinger, kiž je tuchwilu kurator Belvederskeho muzeja we Wienje, ma so z nowym šefom muzeja za tworjace wuměłstwo w Lipsku stać, wozjewja tamniše měšćanske zarjadnistwo. Weidinger je so mjez 29 požadarjemi wo zastojnstwo přesadźił. Nětko ma tomu jenož hišće Lipšćanska měšćanska rada na swojim posedźenju 12. apryla přihłosować.

Škodowki za Indisku

Krótkopowěsće (03.03.17)

Freitag, 03. März 2017 geschrieben von:

Serbowki sylnje zastupjene

Budyšin. Wokrjesny zwjazk Žónskeje unije CDU (FU) je wčera nowe předsydstwo wuzwolił. Po tym zo dotalna předsydka Andrea Pankau hižo znowa njekandidowaše, wuzwolichu Marju Michałkowu za nowu předsydku. Za městopředsydku wuzwolichu Halenu Jancynu z Ralbic. Borbora Hančikowa z Ra­dworja pak wostanje dale pokładnica a tak tež čłonka předsydstwa.

Krótkostawizny w 5. nakładźe

Budyšin. Popularnohistoriska kniha „Kurze Geschichte der Sorben“ dr. Pětra Kunzy je w 5. nakładźe w LND wušła. Nazorna publikacija skići w kompaktnej formje stawizny Serbow, kotrychž najwažniše stacije hodźa so na zakładźe přehlada wo podawkach lochce sćěhować. Přeco zaso prašany je přehlad mjez wopytowarjemi Łužicy kaž tež mnohimi zajimcami za jeje mjezami.

Mostowe myto biskopej

Krótkopowěsće (02.03.17)

Donnerstag, 02. März 2017 geschrieben von:

Opozicija žada sej wěstotu

Drježdźany. Zeleni a Lěwica žadaja sej wot sakskeho krajneho knježerstwa lěpši škit dawkipłaćerjow před móžnymi kóštami wudobywanja brunicy dla. Tak dyrbjało sej knježerstwo wot energijoweho zastaraćela LEAG, naslědnika Vattenfalla, najručišo wěstotne pjenjezy za pad hospodarskeje plajty žadać, zo njetrjebał stat nastate kóšty přewzać.

Inflacija dale přiběrała

Kamjenc. Inflacija w Sakskej je w februaru dale přiběrała. Po dotalnych wob­ličenjach su so twory wo 2,4 procenty podróšili, kaž Kamjenski statistiski zarjad zdźěla. Naposledk běchu tajke po­dróšenje w oktobru 2011 zwěsćili. Dróše su předewšěm žiwidła, bencin a diesel kaž tež tepjenski wolij.

Pitnu wodu potuńšić

Praha. Čěski wobswětowy minister Richard Brabec chcył pitnu wodu za woteběrarjow potuńšić. Po jeho zapodatym namjeće měł so nadhódnotowy dawk za wodu a wopłóčki wot dotal 15 na 10 procentow znižić. Zo bychu ludźo tež woprawdźe mjenje płaćić dyrbjeli, planuje Brabec natwar wosebiteho regulaciskeho zarjada kaž tež nowu formu wobličenja dobytka wodarnjow.

Krótkopowěsće (01.03.17)

Mittwoch, 01. März 2017 geschrieben von:

Snadnuški postup bjezdźěłnosće

Budyšin. W februarje bě we wuchodnej Sakskej 25 290 bjezdźěłnych. Wuwiće na dźěłowych wikach je po słowach Thomasa Berndta „bjez překwapjenjow“. Zo je to jenož 32 wosobow wjace hač měsac do toho, je miłe wjedro wuskutkowało, šef Budyskeje agentury za dźěło dźensa rozłoži. Najebać kwotu 8,8 procentow je bjezdźěłnosć „za kóž­deho potrjecheneho kruta cezura“.

Jan Otto nowy předsyda

Budyšin. Wokrjesny zwjazk Budyšin Němskeho zwjazka dźěłarnistwow (DGB) ma noweho předsydu. W dodatnych wólbach bu Jan Otto wčera w sprjewinym měsće do tohole čestnohamtskeho zastojnstwa wuzwoleny. Wón naslěduje Stephana Henniga, kiž bě funkciju złožił.

Otto dźěła jako hłownohamtski 1. społnomócnjeny IG metal w Budyšinje.

FDP na dobro pomjeznych kónčin

Krótkopowěsće (28.02.17)

Dienstag, 28. Februar 2017 geschrieben von:

Najstarše kino přesadźuja

Choćebuz. Najstarše hišće zdźeržane historiske kino Braniborskeje započachu dźensa přesadźować. Lěta 1911 załožene Choćebuske kino „Weltspiegel“, kotrež steji pod pomnikoškitom, běchu hakle před lětami zasadnje ponowili. Akcija pak bu dróša hač myslene. Nazymu 2014 dyrbjachu tuž insolwencu přizjewić, kaž hamtske sudnistwo zdźěla.

Překwapjacy pjenježny dar

Wojerecy. Zwěrjenc we Wojerecach wjeseli so nad wulkim pjenježnym darom. Jedna so wo šěsćcyfrowu sumu, kotruž bě sobudźěłaćerka zwěrjenca minjeny pjatk na konće coologiskeje zahrody zwěsćiła. Priwatna wosoba chce tam z pjenjezami twar afriskeje sawany podpěrać. Kaž nowinski rěčnik zwěrjenca Felix Pál zdźěli, budu pjenjezy po přeću darićelki wězo jeno za tónle projekt zasadźene.

Misionar z jastwa pušćeny

Krótkopowěsće (27.02.17)

Montag, 27. Februar 2017 geschrieben von:

Dale požadane město filma

Zhorjelc. Na wšě dźesać mjezynarodnych kinowych filmow chcedźa lětsa w Zhorjelcu nahrawać. Tole je wyši měšćanosta Siegfried Deinege (njestronjan) připowědźił. Hižo w měrcu maja so dźěła za nowu filmowu wariantu „Kuzłarskeho wučomnika“ zahajić. Město chce so jako posłužbnik filmoweje branše dale wuwić, kaž Deinege rjekny.

Čaru skónčnje ponowja

Liberec. Železniska čara mjez Liberecom a Žitawu bědźi so hižo wjacore lěta z tři kilometry dołhim wotrězkom na teritoriju Pólskeje. Zanjechanosće dla móža tule ćahi jeno ze spěšnosću 30 km/h jězdźić. Pólska wulkopósłanča w Čěskej republice Grażyna Bernatowicz pak je nětko na zetkanju z hejtmanom Liberecskeho regiona Martinom Půtu přilubiła, zo pólski wotrězk ponowja.

Dynamo so jasnje přesadźił

Krótkopowěsće (24.02.17)

Freitag, 24. Februar 2017 geschrieben von:

Mjenje mortwych na dróhach

Wiesbaden. Ličba smjertnych woporow při wobchadnych njezbožach je w Sakskej loni widźomnje woteběrała. Cyłkownje 162 ludźi je na dróze žiwjenje přisadźiło, zdźěla Zwjazkowy statistiski zarjad we Wiesbadenje. To je 30 mjenje hač lěta 2015. Po wšej Němskej zličichu loni 3 214 smjertnje znjezboženych.

Tysac kulturnych wjerškow

Podstupim. Hač w koncertnych halach, cyrkwjach abo pod hołym njebjom – w Braniborskej chcedźa lětsa wjace hač tysac koncertow, dźiwadłowych předstajenjow, operow, čitanjow, filmow a dalšich zarjadowanjow wotměć. Wone su wažny wobstatk kulturneho turizma a zesylnjeja regiony, potwjerdźi kulturna ministerka Martina Münch (SPD).

Planuja datajowy skład

Hrádek nad Nisou. Liberecska firma „CS spoje“ planuje na přemysłownišću pola Hrádeka nad Nisou natwarić najwjetši skład kompjuterowych datajow w sewjernej Čěskej. W kruće škitanym objekće móhli statne organy, předewzaćeljo kaž tež priwatnicy swoje dataje jako rezerwu składować. Projekt wusměrja so tež na zajimcow w Němskej, kaž čěske medije rozprawjeja.

Krótkopowěsće (23.02.17)

Donnerstag, 23. Februar 2017 geschrieben von:

Wo iniciatiwje wuradźowali

Podstupim. Nutřkowny wuběrk Braniborskeho krajneho sejma je dźensa wo ludowej iniciatiwje přećiwo planowanej wokrjesnej reformje wuradźował. Iniciatiwa wojuje wo to, zachować dotalne 14 wokrjesow a štyri bjezwokrjesne města. Za to je 130 000 podpismow woby­dlerjow znosyła. Knježerstwo chce dźewjeć wokrjesow wutworić.

Wodtke nastupi za Wjelcej

Wjelcej. Hannelore Wodtke z wolerskeje iniciatiwy „Zeleny přichod za Wjelcej“ kandiduje za wólby měšćanosty Wjelceje dnja 7. meje. Na wólbnej zhromadźiznje su ju čłonojo iniciatiwy wčera jednohłósnje nastajili. Ze swojim hesłom „Wodtke za Wjelcej“ chce so něhdyša zarjadniska fachowa přistajena nětko do wólbneho boja podać.

Stres na porodnych stacijach

Drježdźany. Dale přiběraca ličba porodow je chorownjam swobodneho stata dźeń a wjetše wužadanje. Předewšěm we wulkoměstach dźěłaja porodne stacije na hranicy swojich móžnosćow, kaž towaršnosć chorownjow Sakskeje informuje. Zamołwići pak tež kritizuja, zo su minjeny čas wjacore porodne kliniki we wjesnych kónčinach zawrěli.

Krótkopowěsće (22.02.17)

Mittwoch, 22. Februar 2017 geschrieben von:

Schulz w Delnjej Łužicy był

Lubin. Kanclerski kandidat SPD Martin Schulz je dźensa Braniborsku a w tym zwisku tež Delnju Łužicy wopytał. Mjez druhim poby w Lubinje, hdźež jemu „Syć za strowe dźěći“ předstajichu. Tam so čestnohamtscy wo młode swójby staraja. Braniborski ministerski prezident Dietmar Woidke (SPD) Schulza přewodźeše.

Za Dźeń Saksow so přizjewić

Lubij. Towarstwa, zwjazki, institucije a dalše móža so hišće hač do srjedy, 1. měrca, za lětuši Dźeń Saksow w Lubiju přizjewić. Po mjenowanym terminje próstwy wo spěchowanske srědki hižo njewobkedźbuja, kaž statna kenclija w Drježdźanach zdźěli. Swobodny stat spěchuje wobdźělenje z přiražkami za jězbne wudawki, zastaranje a přenocowanje.

Nowe zawrjene pasma

Budyšin. Po tym zo běchu tydźenja při Olbaskim jězorje a w Rakecach dalšej padaj ptačeje gripy zwěsćili, je Budyski krajnoradny zarjad za wobě kónčinje škitne naprawy wukazał. Tak njesmědźa psy a kóčki hižo bjez dohlada wonka być. Plahowarjo pjerizny a wikowarjo mjasa maja přidatne naprawy wobkedźbować. Ludźo maja so w interneće wobhonić.

Anzeige