Krótkopowěsće (29.06.16)

Mittwoch, 29. Juni 2016 geschrieben von:

Raduš chce swjedźeń wuhotować

Wětošow. Błótowska wjes Raduš chce so wo wuhotowanje 14. braniborskeho wjesneho a žnjoweho swjedźenja požadać, kaž delnjoserbski rozhłós rozprawja. Wotměć ma so krajny swjedźeń w septembrje 2017. Na přichodnej zhromadźiznje měšćanskeje rady Wětošowa, kotrehož wjesny dźěl Raduš je, chcedźa wo požadanju serbskeje wsy rozsudźić.

Nowa fararka w sławnej cyrkwi

Drježdźany. Farar ewangelskeje cyrkwje Našeje knjenje w Drježdźanach Se­bastian Feydt dóstanje žónsku sobuwojowarku. Druhe farske městno zabjerje přichodnje Angelika Behnke. To zdźěli krajna cyrkej w Drježdźanach. Z Braniborskeje pochadźaca 43lětna naslěduje Holgera Treutmanna, kiž je wot februara społnomócnjeny krajneje cyrkwje pola rozhłosoweho sćelaka MDR.

Přibrjóh na naměsće

Krótkopowěsće (28.06.16)

Dienstag, 28. Juni 2016 geschrieben von:

Truskalcy so derje radźili

Dohna. Z wotmachom w Sakskej tuchwilu truskalcy žněja. Dźakowano słónčnym dnjam a najebać nachwilny dešć w někotrych kónčinach su so wone lětsa derje radźili, zdźěli krajny zwjazk Sakski sad dźensa w Dohna. Wjace hač 30 ratarjow po zdźělenju zwjazka truskalcy na 295 hektarach w 20 wšelakich družinach plahuje. Połojca płoniny je za samošćiparjow.

Pčołarjow dale podpěrać

Drježdźany. Sakska chce pčołarjow kraja dale podpěrać a přewostaja za to hač do lěta 2019 wjace hač 280 000 eurow. Po informacijach ratarskeho ministerstwa ličba pčołarjow tež dźakowano spěchowanju minjenych lět dale přiběra. Pjenjezy maja so za dalekubłanje pčołarjow nałožić.

Staršiski pjenjez spěšnišo

Praha. Čěscy starši móža po narodźe dźěsća wot stata garantowany staršiski pjenjez 8 150 eurow nic kaž dotal hakle w běhu dweju lět, ale hižo w šěsć měsacach wučerpać. Po słowach ministerki za dźěło a socialne naležnosće Michaele Marksoveje měła nowela pomhać wosebje maćerjam ze snadnymi dochodami kaž tež wšěm tym, kotřiž dyrbja abo chcedźa so zaso do dźěła nawróćić.

Krótkopowěsće (27.06.16)

Montag, 27. Juni 2016 geschrieben von:

Serbska literatura słowaksce

Budyšin. W najnowšim čisle słowakskeho časopisa Slovenské pohlady je wozjewjeny přełožk Jurja Brězanoweho „Lista wnučkam“. Prěni raz steješe tón w antologiji „Wobraz ze skibami“, wušłej lěta 2001 w Ludowym nakładnistwje Domowina. Přełožił je list Peter­ Čačko, kiž hižo lětdźesatki prawi­dłownje serbsku literaturu słowakskim čitarjam spřistupnja.

Wopomnja Jana Kiliana z taflu

Delany. Při ródnym domje fararja Jana Kiliana w Delanach pod Čornobohom (Döhlen) připrawi Bukečanska ewangelska wosada wopomnjensku taflu. Wo tym informuje farar Thomas Haenchen. Wotkryć chcedźa taflu 13. awgusta. Kilian bě lěta 1854 najwjetšu skupinu serbskich wupućowarjow texaskeho Serbina nawjedował.

Pokazaja dokumentaciju

Lubnjow. Telewizijny sćelak Phoenix wusyła zajutřišim, srjedu, w 20.15 hodź. dokumentaciju wo Błótach. Tak pokazuja archiwne natočenja a rozmołwy z časowymi swědkami stawizny Błótow. 45minu­towsku dokumentaciju z produkcije sćelaka RBB stej Lutz Rentner a Frank Otto Sperlich zestajałoj.

Lionel Messi přestanje

Krótkopowěsće (24.06.16)

Freitag, 24. Juni 2016 geschrieben von:

Dalši 5. lětnik

Wodowe Hendrichecy. Prěni raz po lěće 2012 rozžohnuje so dźensa 5. lětnik Wyšeje šule Wodowe Hendrichecy do lětnich prózdnin. Tež za přichodne lěto maja tam hižo 28 přizjewjenjow, kaž rěčnica Budyskeje wotnožki­ Sakskeje kubłan­skeje agentury zdźěli. Tuchwilu planuja we Wodowych Hendrichecach zawěsćenje šulskeje wučby.

Sakske lětanišća woblubowane

Kamjenica. Ze sakskich regionalnych lětanišćow je loni telko lětadłow startowało a tam přizemiło kaž hižo dołho nic. Cyłkownje bě to něhdźe 130 000 króć, kaž ze statistiki Sakskeje krajneje direk­cije wuchadźa. Lěta do toho zličichu 115 000 do 120 000 pohibow. Jeničce lěta 2011 bě na regionalnych lětanišćach nimale telko mašinow po puću kaž loni.

Čěska stolica rozrosće

Praha. Ličba wobydlerjow čěskeje stolicy so po měnjenju demografow w přichodnych dekadach raznje powjetši. Z dźensa zličenych 1,25 milionow ludźi móhła wona w lěće 2050 na wjace hač 1,6 milionow rozrosć. Fachowcy z instituta za planowanje a wuwiće rozmysluja tuž hižo nětko wo nowych štwórćach, hladajo tež na potrjebu wjace małych bydlenjow za samostejacych.

Krótkopowěsće (23.06.16)

Donnerstag, 23. Juni 2016 geschrieben von:

Nowy poradźowanski centrum

Zhorjelc. Wjelči poradźowanski centrum Zwjazka w Zhorjelcu je dźěłać započał. Nětko zestajeja tam nowu datowu banku, kotraž ma kónc lěta w interneće při­stupny być. Centrum poradźuje krajne zarjady nastupajo wo­tewrjene prašenja kołowokoło wjelka. Wšelake instituty, kotrež so z dźiwim zwěrjećom zaběraja, w centrumje hromadźe dźěłaja.

Nichtó z NPD njezastupjeny

Budyšin. W Budyskej měšćanskej radźe njeje hižo žanoho zapósłanca, kotryž bu lěta 2009 jako kandidat strony NPD woleny. Tehdy běštaj dwaj na lisćinje strony, Günter Steinert pak je hižo 2015 z NPD wustupił. Dalša bywša kandidatka Daniela Stamm je nětko wo to prosyła ju z čestnohamtskeho dźěła wuwjazać, čemuž je měšćanska rada wčera jednohłósnje přizwoliła.

Ze serbskej knihu do prózdnin

Krótkopowěsće (22.06.16)

Mittwoch, 22. Juni 2016 geschrieben von:

Wo přichod Bombardiera šło

Berlin. Přichod Bombardiera z wotnožkomaj w Budyšinje a Zhorjelcu bě dźensa tema wuradźowanja jednaćelstwa a zastupnistwa sobudźěła­ćerjow koncerna. Při tym dźěše tež wo planowane wotstronjenje dźěłowych městnow w Němskej. Zastupjerjo dźěłarnistwa IG metal a cyłkowna zawodna rada chcychu próstwu wo inowaciske spěchowanje Sakskeje předstajić. Dalše wobstaće stejnišćow pak měło garantowane być.

Nowe stejnišćo w Kodersdorfje

Drježdźany. Předewzaće Elbe Flugzeugwerke tzwr ze sydłom w Drježdźanach chce druhe produkciske stejnišćo we wuchodosakskim Kodersdorfje wotewrěć. Cyłkownje 40 milionow eurow za to nałoži. Předwidźane je, klětu z produkciju započeć. Hač do kónca přichodneho lěta ma něhdźe sto nowych dźě­łowych městnow nastać.

Postawa so nawróći

Krótkopowěsće (21.06.16)

Dienstag, 21. Juni 2016 geschrieben von:

Darja towarstwu pjenjezy

Budyšin. We wobłuku olympiskeju projektoweju tydźenjow na Serbskej zakładnej šuli Budyšin je 154 dźěći běh sponsorow přewjedło. Z nazběranych 3 600 eurow chcedźa wone 1 000 eurow Drježdźanskemu towarstwu Słónčna pruha darić, zo bychu jeho wulki angažement hódnoćili. Mjenowane towarstwo podpěruje mjenujcy šulerjow, kotřiž su na raka schorjeli.

Rozmołwy bjez wuslědka

Zhorjelc. Rozmołwy wo wróćenju přemysłoweho dawka koncernej Vattenfall su so wčera w Zhorjelskim krajnoradnym zarjedźe bjez wuslědka skónčili. Wjesnjanosća Hamora, Slepoho, Trjebina, Rěčic a wyši měšćanosta Běłeje Wody běchu zhromadnje z krajnym radu Berndom Langu (CDU) a ze zastupjerjemi sakskeho knježerstwa za móžnosćemi pytali, financny deficit gmejnow pomjeńšić.

Ze swobodu wobchadźeć

Krótkopowěsće (20.06.16)

Montag, 20. Juni 2016 geschrieben von:

Žony znowa podleželi

Sand in Taufers. Serbska koparska wubranka žonow je dźensa připołdnju w Sandźe in Taufers Němkam z Južneho Tirola z 0:5 podležała. W druhej skupinskej hrě pokazachu Serbowki angažowany wukon. Po partiji su wone z ně­hdźe 200 serbskimi fanami swjećili. Štwórtk budźe serbske koparske mustwo žonow wo 5. městno hrać.

Chcedźa wučerstwo studować

Budyšin. Absolwenća Serbskeho gymnazija Jocelin Pusch, Marie-Monique Tempel, Luiza Schadec, Juliana Wawrikec, Nadine Cižankec, Florian Bräuer a Józef Donat přijachu sobotu z rukow Bosćija Handrika, zamołwiteho za serbske šule w Budyskej wotnožce Sakskeje kubłanskeje agentury, a wot předsydki Serbskeho šulskeho towarstwa Ludmile Budarjoweje dojednanje z kubłanskej agenturu, zo bychu wučerstwo studowali.

Skulptura Baselitza wotkryta

Krótkopowěsće (17.06.16)

Freitag, 17. Juni 2016 geschrieben von:

Europeada so zahaji

Bruneck. W južnotirolskim Brunecku wotewru jutře wječor europeadu 2016, třeće koparske mišterstwa europskich narodnych mjeńšin. Na njej wobdźěli so 23 muskich a šěsć žónskich mustwow. Serbscy mužojo hraja njedźelu přećiwo Němcam z Danskeje, serbske žony samsny dźeń přećiwo Okcitanjankam. Zapadotrakiscy Turkojo su njejapcy swoje wobdźělenje na europeadźe wotprajili.

Starosć wo perspektiwu

Choćebuz. Choćebuski wyši měšćanosta Holger Kelch (CDU) žada sej wot braniborskeho ministerstwa za kubłanje wjace zamołwitosće a sensibilitu za serbske šulske prašenja. W lisće ministerej Güntherej Baaske (SPD) rozłožuje Kelch starosć wo dalewjedźenju Witaj-projekta na Choćebuskim Delnjoserbskim gymnaziju. Wosebite dźělenje wučby na kubłanišću njezda so jemu směrodajne.

Wučba serbšćiny budźe

Krótkopowěsće (16.06.16)

Donnerstag, 16. Juni 2016 geschrieben von:

Tilich wopory wopominał

Drježdźany. Krótko do róčnicy ludoweho zběžka w NDR dnja 17. junija 1953 je sakski ministerski prezident Stanisław Tilich (CDU) namołwjał, wopory politiskeho přesćěhanja wopominać. Zhromadnje z krajnym społnomócnjenym za podłožki stasi Lutzom Rathenowom sej wón wčera w Drježdźanach žadaše, so dale za demokratiju a swobodu zasadźeć.

Wuměłske twórby kupjene

Lipsk. Kulturna załožba Sakskeje je wot lěta 2005 wuměłske twórby w hódnoće 1,6 milionow eurow kupiła. Po tutym puću wona po swójskich informacijach něhdźe 280 wuměłcow, njewšědne wuměłske formy a nadźijapołne talenty spěchowaše. Lětsa su 37 wuměłcow k spěchowanju wuzwolili. Za to maja 170 000 eurow k dispoziciji.

Nowe kołće přepodate

Drježdźany. Sakski krajny sejm ma wotnětka tři pčolace ludy z hač do 35 000 pčołkami. Tak chcedźa plahowanje pčołkow widźomnje podpěrować, prezident krajneho sejma Matthias Rößler (CDU) wčera při přepodaću kołćow potwjerdźi. Wo pčołki, kotrež su na ležownosći sejma njedaloko plenareje žurle zaměstnjene, staraja so Drježdźanscy pčołarjo.

Anzeige