Krótkopowěsće (29.07.16)

Freitag, 29. Juli 2016 geschrieben von:

Tójšto wukubłanskich městnow

Kamjenica. Krótko do zahajenja noweho wukubłanskeho lěta w Sakskej ma kóždy požadar znajmjeńša jedne měst­no k dispoziciji. Ze 7 161 njewobsadźenych městnow wolić móže 5 878 młodostnych, kotřiž hišće wukubłanske zrěčenje nimaja. To zdźěli dźensa krajna agentura za dźěło. Potrjecheni dyrbjeli so spěšnje poradźować dać.

Liča z 250 000 wopytowarjemi

Neugersdorf. Jedyn z najwjetšich ludowych swjedźenjow Hornjeje Łužicy, Jacobijowe wiki w Neugersdorfje, su dźensa wotewrěli. Zarjadowarjo wočakuja w přichodnych šěsć dnjach hač do 250 000 wopytowarjow. Na swjedźenišću při něm­sko-čěskej mjezy je 250 wikowarjow a zabawjerjow. Mjeztym 288. Jacobijowe wiki traja hač do 3. awgusta.

Schweinsteiger wotstupi

Krótkopowěsće (28.07.16)

Donnerstag, 28. Juli 2016 geschrieben von:

Sakska najbóle profituje

Drježdźany. Sakska wot minimalneje mzdy bóle profituje hač druhe wucho­doněmske zwjazkowe kraje. Tole wuchadźa z přepytowanja hospodarskeho ministerstwa. W swobodnym staće je wjace firmow wot noworjadowanja potrjechenych hač druhdźe. To płaći tež za ličbu sobudźěłaćerjow, kotřiž wot lońšeho 8,50 eurow na hodźinu dóstawaja.

Arcybiskop Hrušovský njeboh

Nitra. Słowakski arcybiskop Dominik Hrušovský je 90lětny zemrěł. Tole zdźěli Słowakska biskopska konferenca. Hrušovský bě za čas socializma w romskim eksilu. Po přewróće wróći so do domizny, hdźež su jeho za generalneho sekretara biskopskeje konfereny wuzwolili. Lěta 1996 sta so z pósłancom bamža Jana Pawoła II. w Běłoruskej.

Policist nima tetowěrowany być

Praha. Štóž chcył so w Čěskej z policistom stać, njesmě tetowěrowany być. To je­ jedne z wuměnjenjow přistajenja. Mjeztym přiběrajcy kritizuja, zo zakaz tójšto zajimcow wot policajskeje słužby wottraša. Po najnowšim woprašowanju pak njeby 90 procentow ludźi w kraju z tetowěrowanymi policistami žadyn problem měło.

Krótkopowěsće (27.07.16)

Mittwoch, 27. Juli 2016 geschrieben von:

Nowe delnjoserbske Spěwarske

Berlin/Choćebuz. „Tyca“ (tučel) je titul nowych Spěwanskich w delnjoserbskej rěči, zdźěli wčera Ewangelska cyrkej Berlin-Braniborska-šleska Hornja Łužica. Spěwnik, na kotrymž su pjeć lět dźěłali, wopřija 75 načasnych kěrlušow. Wuzwolili su je tež młodostni a wučerka nabo­žiny Choćebuskeho Delnjoserbskeho gymnazija.

Budu ranjenych lěkować

Praha. Čěske zakitowanske ministerstwo zdźěli, zo chce kóždolětnje 30 ćežko zranjenych z wukraja lěkować. Při tym mysla na ukrainskich wojakow, ranjenych we wojowanjach z proruskimi rebelemi, abo na Kurdow, potrjechenych w bojach z teroristiskej milicu Islamski stat. Kóšty transporta a lěkowanja jednoho ranjeneho wobličeja ze 40 000 eurami.

Mjenje motorskich znjezbožiło

Krótkopowěsće (26.07.16)

Dienstag, 26. Juli 2016 geschrieben von:

Duchowny w cyrkwi morjeny

Rouen. Při nadpadźe na katolsku cyrkej njedaloko sewjerofrancoskeho města Rouena staj atentatnikaj dźensa 84lětneho duchowneho wosady moriłoj. Dalšeho zastajenca wonaj ćežko zraništaj. Policiju nadpadnikow zatřěli. Francoski prezident François Hollande je w běhu dnja městno atentata wopytał a „hrózbny teroristiski njeskutk“ zasudźił.

Krućiše wěstotne naprawy

Drježdźany. Reagujo na nadpady w Bayerskej je agentura Semmel Concerts wěstotne naprawy za Drježdźanske koncerty při Łobju přiwótřiła. Wopytowarjo měli so na konsekwentne kontrole při wrotach nastajić a toboły a nachribjetniki doma wostajić, kaž připowědźichu. Semmel Concerts zahaji tam pjatk rjad štyrjoch koncertow Rolanda Kaisera.

Miliony za slědźerski projekt

Krótkopowěsće (25.07.16)

Montag, 25. Juli 2016 geschrieben von:

Mjenje njeskutkow na kěrchowach

Drježdźany. Ličba padustwow a njeskutkow wandalizma na kěrchowach Sakskeje woteběra. Kaž krajny kriminalny zarjad zdźěla, su prěnje poł lěta 126 tajkich njeskutkow zličili. Loni w samsnym času bě jich 209. Registrowana škoda so wot 70 000 na 20 000 eurow pomjeńši. Přičinu tohole wuwića njeznaja.

Ze strony wustupiła

Praha. Wšelakich nahladow w zwisku z politiku ćěkancam napřećo je čěska zapósłanča Kristýna Zelienková z liberalno-populistiskeje strony ANO wustupiła, kaž nowiny rozprawjeja. „Wona sej přeje, zo přiwozmje tři miliony ćěkancow“, je předsyda strony Andrej Babiš rozsud 41lětneje sarkastisce komentował. Babiš sam ćěkancow wotpokazuje.

Chmjel so derje radźił

Querfurt. Plahowarjo chmjela w Sakskej, Durinskej a Saksko-Anhaltskej móža so dosć dobrych žnjow nadźijeć. Po słowach prezidenta Zwjazka plahowarjow chmjela Jörga Kamprada liča z něhdźe 55 000 centnarjemi wunoška. Po dobrych žnjach minjenych lět su ratarjo lětsa płoninu za chmjel rozšěrili. Dźakowano dobrej płaćiznje na wikach je plahowanje rostliny wunošne.

Krótkopowěsće (22.07.16)

Freitag, 22. Juli 2016 geschrieben von:

Nuzowe zastaranje wobćežne

Frankfurt n. W. Nuzowa medicina po­dłu němsko-pólskeje mjezy ma njedostatki. Puće do přichodneje chorownje su častodosć předołhe, rjekny direktor Frankfurtskeho klinikuma Thomas Funk. Za krótši puć do chorownje na tamnym boku rěki pak pobrachuje kooperaciske zrěčenje. Němsko-pólske dojednanje je na kóždy pad trěbne, Funk potwjerdźi.

Rekordne žně hromaka

Podstupim. Telko hromaka kaž hišće ženje su lětsa w Braniborskej nažnjeli. Ratarjo nakałachu cyłkownje 19 600 tonow tuteje zeleniny. To je 27,8 procentow wjace hač loni, zdźěla tamniši statistiski zarjad­. Mnóstwo je zdobom rekord. Poprawom běchu plahowarjam skerje snadne žně wěšćili. Hromak plahowali su lětsa na 3 400 hektarach.

Kitesurfing dowoleny

Hamor. Kitesurfowarjo smědźa přichodnje tež Bjerwałdski jězor wužiwać. Sakska krajna direkcija je wodosportej na wotmjezowanym arealu přizwoliła, kaž dźensa rěkaše. Gmejna Hamor ma do toho wěstotne naprawy přewjesć a čaru markěrować. Kitesurfing je sport, při kotrymž mały parašut surfowarja po wodźe ćehnje.

Krótkopowěsće (21.07.16)

Donnerstag, 21. Juli 2016 geschrieben von:

Vattenfall dale z minusom

Stockholm. Šwedski energijowy koncern Vattenfall je w 2. kwartalu lěta straty třoch miliardow eurow nadźěłał. Tež wobrot je dale woteběrał, kaž šef koncerna Magnus Hall dźensa ze Stockholma zdźěli. „Hospodarske połoženje wostanje niskich płaćinow miliny dla dale jara wobćežne“, wón rjekny. Hall chcył łužisku brunicowu wotnožku ručež móžno čěskemu koncernej EPH předać.

Spěchowanske srědki přepodała

Běła Woda. Sakska ministerka za socialne a škit přetrjebarjow Barbara Klepsch (CDU) je dźensa Běłowodźanskej wokrjesnej chorowni přizwolenje spěchowanskch srědkow nimale 1,5 milionow eurow za ponowjenje tamnišeje intensiwneje stacije přepodała. Twarske a techniske njedostatki wobstejaceje stacije maja so wotstronić.

Z truskalcami spokojom

Drježdźany. Sakscy ratarjo móža lětsa na dobre žně truskalcow zhladować. „Smy spokojom z kwalitu a mnóstwom“, měni předsyda krajneho ratarskeho zwjazka Sakski sad Gerd Kalbitz. Zliwki njejsu truskalcam tyli, přiwšěm bilanca spokojo. Kalbitz liči za Saksku z wunoškom něhdźe 3 000 tonow.

Krótkopowěsće (20.07.16)

Mittwoch, 20. Juli 2016 geschrieben von:

Wo imersiji so wobhonił

Pančicy-Kukow. Na swojim wčerawšim wopyće w klóštrje Marijinej hwězdźe zetka so šef sakskeje statneje kenclije dr. Fritz Jaeckel (CDU) z Janom Bartom. Jaeckel wobhoni so wo nazhonjenjach a wuspěchach dwurěčneho kubłanja po koncepće imersije, kiž bě Jan Bart před lětami na wusahowace wašnje nastorčił a kotryž dźensa wuspěšnje nałožuja.

Žane dowolowe lěty

Moskwa. Najwjetša lětanska towaršnosć Ruskeje Aeroflot je předań lisćikow za lěty do Istanbula a Antalyje přetor­h­nyła. Ruski lětanski zarjad bě to wu­kazał, dokelž ma połoženje w Turkowskej po wojerskim puču za njewěste. Lěty wottam do Ruskeje su porno tomu hišće móžne. Minjeny kónc tydźenja bě so 2 000 ruskich­ dowolnikow z Turkowskeje wróćiło.

Do jastwa na čas žiwjenja

Krótkopowěsće (19.07.16)

Dienstag, 19. Juli 2016 geschrieben von:

Biografija Brězana jako e-book

Budyšin. K 100. posmjertnym narodninam Jurja Brězana bě Ludowe nakładnistwo Domowina prěnju wobšěrnu biografiju wo jeho žiwjenju a tworjenju pod hesłom „Jurij Brězan – Leben und Werk“ wudało. Kniha prof. dr. Dietricha Šołty předleži mjeztym tež jako e-book. Skazać móža sej jón zajimcy we wotpowědnych internetnych wobchodach.

Čěska literatura ćežišćo

Lipsk/Praha. Awtorojo a nakładnistwa z Čěskeje maja na Lipšćanskich knižnych wikach 2019 w srjedźišću stać. Na to staj so čěski minister za kulturu Daniel Herman­ a direktor Lipšćanskich wikow Oliver Zille wčera w Praze dojednałoj. Wo detailach chcedźa hišće jednać, zrěčenje ma so klětu podpisać. Klětu budźe Litawska, lěto pozdźišo Rumunska ćežišćo Lipšćanskich knižnych wikow.

Zakoń tyje zahrodkarjam

Krótkopowěsće (18.07.16)

Montag, 18. Juli 2016 geschrieben von:

Teslu do Kamjenca wabić

Palo Alto/Kamjenc. Sakska chce Teslu wabić, w Kamjencu zawod baterijowych bańkow twarić. Dokelž chce ameriski twarc elektroawtow w Europje inwestować, bě jemu sakski statny sekretar Hartmut Mangold při rozmołwach w Kaliforniskej Kamjenc namjetował, rozprawja MDR. Zasydlenje móhła Sakska z hač do 15 procentami spěchować. Tesla zhotowja jako jenički zawod e-awta z dosahom (Reich­weite) wjac hač 400 kilometrow.

Literarne myto Drježdźanjance

Drježdźany. Sakske literarne myto 2016 dóstanje Drježdźanska spisowaćelka Franziska Gerstenberg. 5 500 eurow hódne myto spožča 37lětnej za socialnokritisku twórbu „Tak dołho po tym – dawno hižo njewěrne“. To zdźěla ministerstwo za wuměłstwo w Drježdźanach. Gerstenberg běchu hižo wospjet wuznamjenili, mjez druhim lěta 2013 ze Lessingowym spěchowanskim mytom.

18 awtow wobškodźenych

Anzeige