Krótkopowěsće (06.04.16)

Mittwoch, 06. April 2016 geschrieben von:

Wulki zajim za wustajeńcu

Budyšin. Wustajeńca z fotografijemi Rolfa Dvoraceka w Budyskim muzeju budźe wulkeho zajima dla­ hač do 26. junija podlěšena. Zdobom wotměje so njedźelu, 17. apryla a 1. meje, přidatne wodźenje po wustajenišću. Žiwjenske­ dźěło Dvoraceka wopřijima wjace hač stotysac negatiwow. W muzeju je něhdźe pjećstow jeho fotow widźeć. Ćežišćo přehladki stej město Budyšin a jeho wuwiće.

Roznošuje póštu zaso z čołmom

Lědy. W Błótach nětko zaso póstownica wódne puće za roznošowanje wužiwa. Wot dźensnišeho je Andrea Bunar na Lědach z čołmom po groblach po puću, kaž Němski póst zdźěla. Hač do oktobra chce wona wobydlerjam listy, karty a pakćiki na te wašnje do domu nosyć. Na něhdźe wosom kilometrow dołhej čarje zastaruje Bunar 65 domjacnosćow.

Festiwal słowjanskeje kultury

Krótkopowěsće (05.04.16)

Dienstag, 05. April 2016 geschrieben von:

Ze Singapura do Łužicy

Wuskidź. Wojacy ze Singapura a Němskeje zwučuja na zwučowanišću Hornja Łužica pola Wuskidźe, třěleć z tankami pod realnymi wuměnjenjemi. Tole zdźěli rěčnik Zwjazkoweje wobory. Při tym zasadźeja 18 tankow. Zwučowanje z 500 wojakami ze Singapura traje hač do kónca apryla. Přichodne lěta chcedźa tajke prawidłownje přewjesć.

Na Ukrainje hrozy hłód

Kijew. Na wuchodźe Ukrainy hrozy po informacijach UNO dwulětneho wójnskeho konflikta dla 1,5 milionam ludźi hłód. Pomocne organizacije ludźi w krizowych kónčinach jeno ćežko docpěwaja, rěčnik Swětoweho zežiwjenskeho programa dźensa informowaše. 300 000 wobydlerjow trjeba hnydomnu pomoc. We wójnje je jich dotal 9 000 zahinyło.

Proces wotpokazany

Duisburg. Njezbožo na Duisburgskej Love paradźe 24. julija 2010 z 21 mortwymi njezměje žane chłostanskoprawniske konsekwency. Krajne sudnistwo je dźensa wotpokazało, chłostanski proces přećiwo dźesać zamołwitym zahajić. Při tym kritizowaše wot statneho rěčnistwa předpołožene dopokazy, předewšěm fachowy posudk britiskeho slědźerja, jako njedosahace.

Krótkopowěsće (04.04.16)

Montag, 04. April 2016 geschrieben von:

Budyski žonop najlěpši

Budyšin. Při šěroko zapołoženym internetnym­ naprašowanju portala „Deutsch­land Test“ bě Budyski žonop hnydom dwójce wuspěšny. Woprašeni za kwalitu jednotliwych markow mějachu ludźo kwalitu žonopa w kategorijomaj „korjeninowe srědki“ a „słódne pomazanki“ za najlěpšu, kaž ze zdźělenki zhotowjerja žonopa wuchadźa.

Něšto mjenje bjezdźěłnych

Luxemburg. Połoženje na dźěłowych wikach europasma je so snadnje polěpšiło. Po informacijach statistikeho zarjada Eurostat je přerězna kwota bjezdźěłnosće w februaru wo 0,1 na nětko 10,3 procenty woteběrała. Rozdźěle pak su wulke: Najmjeńša je bjezdźěłnosć w Němskej (4,3 %) a na Malće (5,1%), najwjetša w Grjekskej (24 %) a Španiskej (20,4 %).

Kolesowarjam alkohol dowolić?

Praha. Po wobchadnym zakonju płaći w Čěskej republice nul promilow alkohola tež na kolesu. Senator strony ČSSD Zdeněk Škromach pak chce w aprylu předpołožić změnu, nastupacu wuwzaće za kolesowarjow. Tući směli na wsach kaž tež na dróhach nišeje kategorije z hač do 0,8 promilemi alkohola w kreji hišće koleso wužiwać směć.

Zjednoća so po hinašim puću

Krótkopowěsće (01.04.16)

Freitag, 01. April 2016 geschrieben von:

Połojca ma křižerki za móžne

Budyšin. Połojca wobdźělnikow na jutrownym naprašowanju Serbskich Nowin online měni, zo přichodnje tež křižerki w serbskich jutrownych procesionach sobu jěchaja, 46 procentow njemóhło sej to předstajić a štyri procenty su njerozsudźene. Tež dźensa nadeńdźeće w interneće pod www.serbske-nowiny.de nowe naprašowanje

Hans-Dietrich Genscher njeboh

Bonn. Wjelelětny wonkowny minister Němskeje Hans-Dietrich Genscher je njeboh. Politikar FDP je minjenu nóc 89lětny na zaprajenje wutroby a krejneho wobtoka zemrěł, jeho běrow w Bonnje zdźěli. Genscher bě wot 1974 hač do 1992 wonkowny minister a jako tajki na procesu zjednoćenja Němskeje na wusahowacym městnje wobdźěleny.

Bombu znješkódnili

Krótkopowěsće (31.03.16)

Donnerstag, 31. März 2016 geschrieben von:

Na kongres pasiona dla

Chrósćicy. Zastupjerjo Chróšćanskeje wosady su so dźensa na 32. mjezynarodny kongres Europasion do pólskeho Cie­szyna podali. Dźesaćwosobowa skupina pod nawodom Jurja Špitanka, kiž lońše pasionske hry w Chrósćicach nawjedowaše, budźe tam hač do njedźele. Styki k druhim, kotřiž tohorunja pasion předstajeja, bě wón minjene lěta nawjazał.

Město filmowcy rady wužiwaja

Liberec. Liberec je mjez filmowcami jara woblubowany, wšako bě motiw w dźesatkach čěskich kaž tež wukrajnych dokumentarnych a hrajnych filmow abo serialow. Přichodnje chcyła tamniša radnica filmowe skupiny hišće wuraznišo a bóle systematisce wabić. Zaměr je, docpěć wot agentury Czech Tourism wupisany titul „Film Friendly Region“.

Šešelj wuwinowany

Krótkopowěsće (30.03.16)

Mittwoch, 30. März 2016 geschrieben von:

Kozel šwika Bombardier

Drježdźany. Zapósłanc Lěwicy w Sakskim krajnym sejmje Hajko Kozel plany koncerna Bombardier, w Budyšinje a Zhorjelcu wjele dźěłowych městnow šmórnyć, raznje šwika. W medijowej zdźělence skedźbnja Kozel na to, zo „je koncern minjene lěta pjeć milionow eurow spěchowanskich srědkow dóstał a nětko ludźi pušća. To je nahrabne a šamałe.“

W Praze bjez čěšćiny

Praha. W „jendźelskorěčnej wjesce Angloville“­ w štwórći Hlubočepy čěskeje stolicy su zajimcy za wučbu jendźelšćiny intensiwnemu imersnemu kubłanju w tutej rěči wustajeni; čěšćina je tule zakazana. W běhu šěsć dnjow absolwuja kursisća 70 hodźin aktiwneje rěčneje komunikacije. Wulku wažnosć kładu zamołwići­ při tym na metodu „1 wobdźělnik na 1 maćernorěčneho“.

Wočakowanja rozdźělne

Krótkopowěsće (29.03.16)

Dienstag, 29. März 2016 geschrieben von:

Serbskaj literataj počesćenaj

Budyšin. Serbskeju literatow Bena Budarja a Dorotheju Šołćinu počesći Mjezynarodna akademija literatury a wuměłstwa Ukrainy z Medalju Nikolaja Gogola „Triumf“ za wuběrne literarne skutko­wanje. Kaž prezident akademije Sergej Dźjuba Zwjazkej serbskich wuměłcow tele­ dny zdźěli, bu wuznamjenjenje jednohłósnje schwalene.

Internet ewangelskich Serbow

Choćebuz. Wotnětka maja Serbja ewangelskeje cyrkwje Berlinsko-braniborsko-šleskeje Hornjeje Łužicy swójski portal w interneće, kaž Choćebuski ewangelski cyrkwinski kruh pisa. Pod www.serby-ekbo.de namakaš tam informacije wo dźěle skupiny Serbska namša, Spěchowanskeho towarstwa za serbsku rěč w cyrkwi a planowaneho Zwjazka serbskich křesćanow w EKBO.

Strategiske partnerstwo

Krótkopowěsće (24.03.16)

Donnerstag, 24. März 2016 geschrieben von:

Dźěćacu agresiwitu rozumić

Budyšin. Lětsa steji w srjedźišću hornjoserbskich Staršiskich listow Serbskeho šulskeho towarstwa wašnje wobchadźenja mjez dźěćimi, kubłarjemi a staršimi. K tomu čitaće přinošk prof. dr. Barbary Wolf z Wysokeje šule Mittweida. W delnjoserbskim wudaću rozprawja dr. Jana Markowa wo tym, što chore dźěćo trjeba. We woběmaj wudaćomaj zhoniće wo 25lětnym skutkowanju SŠT.

Dwurěčnosć spěšnišo přesadźić

Praha. Dwurěčne mjena dróhow a napisy móža mjeńšiny w Čěskej republice přichodnje spěšnišo přesadźić. Mjeztym zo dyrbjachu dotal gmejnski wuběrk za narodne mjeńšiny załožić, dosaha nětko žadanje znajmjeńša pjeć lět wobstejacych towarstwow. Wuměnjenje je, zo ma mjeńšina dźesaćprocentowski podźěl na wobydlerstwje gmejny.

Změny pola maltezow

Krótkopowěsće (23.03.16)

Mittwoch, 23. März 2016 geschrieben von:

Zeleni podpěruja zajimy Serbow

Drježdźany. Na přeprošenje frakcije Zelenych w krajnym sejmje wotmě Franziska Schubert (Zeleni) wčera w Drježdźanach fachowu rozmołwu z kubłansko politiskej rěčnicu Petru Zais a z předsydku SŠT Ludmilu Budarjowej. Hłowne temy běchu zwoprawdźenje koncepcije 2plus, wučerski dorost a transport maćernorěčnych šulerjow do serbskich šulow. Dale zaběrachu so z naćiskom no­wele šulskeho zakonja w Sakskej.

Nowy šef rjemjeslnikow

Budyšin. Zwjazk rjemjeslnikow Budyskeho wokrjesa ma noweho předsydu. Čłonojo wuzwolichu Budyskeho elektromištra Franka Scholzu do zastojnstwa, kaž ze zdźělenki zwjazka wuchadźa. Wón naslěduje třěchikryjerskeho mištra Joachima Wintera, kiž bě zwjazk 15 lět nawjedował. Scholze wjedźe swój zawod wot lěta 1993 a ma dźewjeć přistajenych.

Schlierenzauer ćežko zranjeny

Krótkopowěsće (22.03.16)

Dienstag, 22. März 2016 geschrieben von:

Spožča medalju krajneho sejma

Podstupim. Nawodnicy Šule za delnjoserbsku rěč a kulturu Choćebuz Mari Elikowskej-Winklerowej spožča Medalju Krajneho sejma Braniborskeje. Prezidentka braniborskeho parlamenta Britta Stark (SPD) ma počesćenje Elikowskeje-Winkleroweje za znamjo připóznaća a dźaka­ za jeje wurjadne zasłužby wo zhromadnosć w towaršnosći.

Serbska poetka w antologiji

Wrócław. Pod titulom „Přewodnik po zaminowanym terenje“ je we Wrócławju, lětušej europskej kulturnej stolicy, wušła antologija basnjow a tekstow. Na 511 stronach su basnje w pólskim originalu abo přełožku wozjewjene. Něhdźe 80 basnikow z wjacorych krajow je w antologiji zastupjenych. Mjez poetami z Němskeje je tež Róža Domašcyna.

Hospodarstwo derje startowało

Anzeige