Krótkopowěsće (25.05.21)

Dienstag, 25. Mai 2021 geschrieben von:

Stabilnje pod marku 100

Budyšin. Wot pjatka hač do wčerawšeje swjatkowneje póndźele zwěsćichu w Budyskim wokrjesu 173 natyknjenjow z koronawirusom. Ličba smjertnych padow je wo šěsć na 890 rozrostła. Roberta Kochowy institut mjenowaše dźensa incidencu 74,4. W Zhorjelskim wokrjesu běštej hač do wčerawšeho dwě nowej infekciji. Incidenca je po RKI tam dźensa 49,9, prěni raz pod marku 50.

Nowy tachantski kantor

Budyšin. Nowy tachantski kantor Budyskeje wosady swjateho Pětra budźe wot 1. awgusta Kamil Maksymilian Kulawik. Pólski cyrkwinski hudźbnik skutkuje tuchwilu hišće w Stuttgarće a je sej jako nadarjeny improwizator kaž tež seriozny interpret klasiskeje pišćeloweje hudźby dobre mjeno zdobył. Wón naslěduje wulce zasłužbneho cyrkwinskeho hudźbneho direktora Friedemanna Böhmy, kiž bě so hižo loni na wuměnk podał.

Serbske zynki w Złym Komorowje

Krótkopowěsće (21.05.21)

Freitag, 21. Mai 2021 geschrieben von:

Incidenca nimale konstantna

Budyšin. W Budyskim wokrjesu zwěsćichu hač do wčerawšeho 58 dalšich natyknjenjow z koronawirusom. Ličba zemrětych powjetši so wo jednoho na 884. Po tysac wobydlerjach tuchwilu najbóle po­trjechenej gmejnje stej Hodźij a Worklecy. Incidenca po RKI je dźensa 75,4. Wokrjes Zhorjelc informowaše wčera wo 34 nowoinfekcijach a štyrjoch smjertnych padach wot 4. apryla do 12. meje. Incidenca po RKI je tam dźensa 94,6.

Nahubnik wotpokazali

Bukecy. Z eklatom je so wčerawše posedźenje Bukečanskeje gmejnskeje rady zahajiło. Pjeć radźićelow – třo wot AfD, jedyn wot CDU a dalši wot Swobodnych wolerjow – nochcyše za čas posedźenja nahubnik wužiwać. Dokelž nichtó z nich lěkarski atest njeměješe, pak njesmědźachu so na posedźenju wobdźělić a dyrbjachu žurlu wopušćić. Tamni sedmjo běchu přiwšěm hišće wobzamknjenja­kmani.

Historiski pomjatk wuchować

Krótkopowěsće (20.05.21)

Donnerstag, 20. Mai 2021 geschrieben von:

Serbske pjenjezy schwalene

Drježdźany. Sakski krajny sejm je wčera nawječor etat statneho ministerstwa za wědomosć, kulturu a turizm 2021/ 2022 wobzamknył. Po tym je „serbski“ hornc swobodneho stata lětsa z 8,492 milionami eurow a klětu z 8,015 milionami pjelnjeny. Su to srědki Załožbje za serbski lud, za inwesticije a lětuše Zejlerjowe myto. Dwójny etat je parlament dźensa dopołdnja doskónčnje schwalił.

Druhi dźeń pod hódnotu 100

Budyšin. Budyski wokrjes je wčera wo 144 nowych natyknjenjach z koronawirusom informował, mjez nimi je 72 dodatnych přizjewjenjow PCR-testow minjenych dnjow. Tudyša incidenca wučinja po RKI dźensa 75,4. Budyski wo­krjes je tuž druhi dźeń za sobu pod hódnotu 100. W Zhorjelskim wokrjesu wozjewichu wčera ličbu 78 infekcijow, šěsć zwisuje z korekturu statistiki. Incidenca tam je po RKI dźensa 93,0.

Žana nóc bajow

Krótkopowěsće (19.05.21)

Mittwoch, 19. Mai 2021 geschrieben von:

Ministerka Giffey wotstupiła

Berlin. Po diskusijach wo móžnym wotpóznaću doktorskeho titula je zwjazkowa swójbna ministerka Franziska ­Giffey dźensa wotstupiła. Kaž jeje ministerstwo zdźěli, bě Giffey zwjazkowu kanclerku Angelu Merkel (CDU) prosyła, ju ze zastojnstwa pušćić. Giffey je wot lěta 2018 swójbna ministerka a wot lońšeho předsydka Berlinskeje SPD. Wona kandiduje za wyšu měšćanostku stolicy.

Wot jutřišeho click & meet

Budyšin. Podkročeneje ekstremneje hódnoty koronainfekcijow dla smědźa w Budyskim wokrjesu wot jutřišeho štwórtka dotal zawrjene wobchody zaso za kupcow z terminom a dnjowoaktualnym negatiwnym testom (click & meet) wotewrěć. We wokrjesu zličichu hač do wčerawšeho jědnaće natyknjenjow a jedyn smjertny pad. Incidenca po RKI je dźensa 58,0. Wokrjes Zhorjelc rozprawješe wčera wo 88 infekcijach a štyrjoch zemrětych, incidenca tam je dźensa 102,1.

Nowy blog Domowiny

Krótkopowěsće (18.05.21)

Dienstag, 18. Mai 2021 geschrieben von:

Wot štwórtka wolóženja

Budyšin. Incidenca po Roberta Kochowym instituće je dźensa w Budyskim wokrjesu ze 97,1 sedmy dźeń za sobu pod 165. Tak smědźa wot štwórtka dźěćace dnjowe přebywarnje z krutymi skupinami a wosobami zaso wotewrěć a šule prezencnu wučbu poskićeć. Hač do wčera­wšeho zwěsćichu tu 14 natyknjenjow z koronu a dwaj smjertnej padaj. Zhorjelski wokrjes rozprawješe wo pjeć nowoinfekcijach a wo třoch smjertnych padach. Incidenca po RKI je tam dźensa 91,4.

Pytaneho dwójnika popadnyli

Drježdźany/Berlin. Nimale połdra lěta po spektakularnym padustwje juwelow ze Zeleneho wjelba w Drježdźanach su nětko wšitkich njeskutka podhladnych popadnyli. Na raciji je policija wčera wječor pytaneho dwójnika ze znateho clana arabskeho pochada w bydlenju w Berlinje-Neukölnje zajała. 22lětny je mjeztym w Drježdźanach, hdźež měješe sudnik dźensa wo jatbje rozsudźić.

Rěčny docent dźěło nastupił

Krótkopowěsće (17.05.21)

Montag, 17. Mai 2021 geschrieben von:

Dźeń a mjenje schorjenych

Budyšin/Zhorjelc. Ličby na koronawirus schorjenych tež w serbskich gmejnach dale woteběra. W Ralbicach-Róžeńće nimaja wot minjeneho pjatka žanoho schorjeneho. Najwjac mějachu jich z 43 w Malešanskej gmejnje. W Budyskim wokrjesu bě kónc tydźenja 125 nowo­inficěrowanych, šěsć ludźi je zemrěło. Po RKI wučinješe tu incidenca 108,1. W Zhorjelskim wokrjesu zwěsćichu wčera 13 dalšich infekcijow, incidenca je 133.

Sotra z nowymi funkcijemi

Budyšin. Přełožowanski program „sotra“ ma nowej funkciji, informuje Rěčny centrum WITAJ. Z e-mailku je nětko móžno wothłós na program dać. Dale móža wužiwarjo dowolić přełožk składować, zo móhli w RCW słowny skład rozšěrjeć ­a zmylki wotstronjeć. Přełožki wobsa­huja za RCW wažne informacije, mjez druhim, kotre zmylki „sotra“ hišće wora a kotre słowa w składźe pobrachuja.

Cyrkwinski zjězd zakónčeny

Krótkopowěsće (14.05.21)

Freitag, 14. Mai 2021 geschrieben von:

Incidenca dale spaduje

Budyšin/Zhorjelc. Ličba sydomdnjowskeje incidency dale woteběra. Srjedu a wče­ra zličichu w Budyskim wokrjesu 181 nowoinficěrowanych. Kaž RKI zdźěli je incidenca dźensa ze 129,1 třeći dźeń pod hranicu 165. Tak móhli w Budyskim wo­krjesu najzašo srjedu šule a pěstowarnje wotewrěć. W Zhorjelskim wokrjesu zličichu wčera 75 nowych infekcijow, štyri wosoby su zemrěli. Incidenca wučinja 158,7.

3. ekumeniski cyrkwinski dźeń

Frankfurt n. M. Z ekumeniskej Božej mšu, wuhotowanej mjez druhim wot priora Taizéskeho zhromadźenstwa Frérea Aloisa, bu wčera 3. ekumeniski cyrkwinski dźeń we Frankfurće nad Mohanom zahajeny. Hesło lětsa přewažnje ryzy digitalnje zarjadowaneho zetkanja je „Hlejće sem!“ Ćežišća diskusijow a dźěłarničkow budu hač do njedźele nabožna wjelorakosć a runoprawosć w cyrkwjach.

Dalše wudaće Płomjenja je online

Krótkopowěsće (12.05.21)

Mittwoch, 12. Mai 2021 geschrieben von:

Sebjetesty jenož pod dohladom

Budyšin. Sebjetest na koronawirus wotnětka jeno připóznawaja, hdyž bu pod dohladom přewjedźeny. Nowe rjadowanje Zwjazka nětko tež w Sakskej nałožuja. Test ze swójsce podpisanym wobkrućenjom z interneta wjace njepłaći. W Budyskim wo­krjesu bě hač do wčerawšeho 23 natyknjenjow z koronu a jedyn smjertny pad. Incidenca po RKI wučinja tu dźensa 125,1. Zhorjelski wokrjes rozprawješe wo 87 infekcijach. Incidenca po RKI je tam dźensa 156,3.

W Starym ludźe filmowali

Dešno. Team 2. programa španiskeje telewizije RTVE je wčera w srjedźowěkowskim sydlišću Stary lud Dešnjanskeho domizniskeho muzeja wjerćał. Muzejowe mustwo je drastu, rěč a dźensniše žiwjenje po słowjanskim wobsydlenju regiona předstajiło. Španiscy telewiznicy su po cyłej Němskej po puću. Dešno słuša k nahrawanjam w Błótach.

Kubłanski park abo kič?

Krótkopowěsće (11.05.21)

Dienstag, 11. Mai 2021 geschrieben von:

Tydźenska incidenca pod 200

Budyšin. Tydźenska incidenca wobeju hornjołužiskeju wokrjesow korony dla je po Roberta Kochowym instituće dźensa pod 200, w Budyskim 187,5 a w Zhorjelskim 167,0. Budyski wokrjes informowaše wčera wo 26 natyknjenjach, za njedźelu mjenowaše 100. Dalšej wosobje stej w zwisku z koronu zemrěłoj. Zhorjelski wo­krjes poda wčera jědnaće infekcijow.

Lessingowe dny dale přestorča

Kamjenc. Aktualneho połoženja pandemije dla Lessingowe dny hišće raz přestorča. Hižo spočatk lěta běchu zarjadowanja wot februara na meju a junij přepołožili. Nětko chcedźa 53. Kamjenske Lessingowe dny kaž tež spožčenje Lessingoweho myta nazymu wotměć, a to pod hesłom „Zmocowanje, přesćěhanje, zawjedźenje – literatura a wuměłstwo w Třećim reichu“.

Z kulturnym wuběrkom

Krótkopowěsće (10.05.21)

Montag, 10. Mai 2021 geschrieben von:

Farar Clemens Hrjehor zemrěł

Kamjenc. Wčera nawječor je w Kamjenskej chorowni maltezow swj. Jana serbski měšnik Clemens Hrjehor zemrěł. 1953 rodźeny Hrjehor bě z kapłanom w Chrósćicach a Radworju, hdźež sta so 1984 z fararjom. 1997 wróći so do ród­neje Chróšćanskeje wosady jako farar. Zdobom skutkowaše jako Budyski dekan. W lětomaj 1999 a 2000 bě wón předsyda rady Załožby za serbski lud. Wot 2015 hač do me­je 2020 wukonješe farar Hrjehor w Kamjenicy nadawki propsta.

Incidenca dale wokoło 200

Budyšin. W Budyskim wokrjesu su minje­ny pjatk a sobotu wo 188 natyk­njenjach z koronawirusom rozprawjeli. Techniskich dźěłow dla wčera žanoho wozjewjenja njebě, kaž z krajnoradneho zarjada rěka. Tydźenska incidenca po RKI wučinja tu dźensa 211,8. Ličba inficěrowanych je so w Zhorjelskim wokrjesu wčera wo 29 powjetšiła. Tamniša incidenca po RKI je dźensa 193,1.

Herbst načolny kandidat

Serbska debata

Neuheiten LND