Krótkopowěsće (19.11.15)

Donnerstag, 19. November 2015 geschrieben von:

Dóstanu wjac spěchowanja

Berlin/Flensburg. Federalistisku uniju europskich narodnych mjeńšin (FUEN) spěchuje Zwjazk wot klětušeho z poł milionom eurow. Zyšenje wo 400 000 eurow je etatowy wuběrk zwjazkoweho sejma wobzamknył, zdźěli FUEN. Prezident FUEN Hans-Heinrich Hansen ma to za wysoke hódnoćenje mjeńšin a za wuslědk prócowanjow mnohich podpěraćelow.

Rozsud přestorčili

Radwor. Na posedźenju zawčerawšim su Radworscy gmejnscy radźićeljo rozsud wo zjednoćenju stawnistwow na teritoriju gmejny do jednotneho w Malešecach přestorčili. Wobzamknychu ponowjenje dróhi při Lodowej pincy w Lutobču. Dale počesćichu štyrjoch kameradow wohnjoweje wobory z rjadom pomocnikow při wulkej wodźe 2013.

Informuja tež wo Serbach

Krótkopowěsće (17.11.15)

Dienstag, 17. November 2015 geschrieben von:

Za karjeru we Łužicy

Lipsk. W Lipsku wotměchu so dźensa srjedźoněmske wiki absolwentow. Pod hesłom „Přichod Łužica – karjera na spočatku Němskeje“ předstajichu tam Marketingowa towaršnosć Hornja Łužica-Delnja Šleska a měsće Budyšin a Žitawa předewzaća hospodarskeho regiona jako atraktiwnych dźěłodawarjow a wabjachu z wobšěrnymi informacijemi za karjeru w Hornjej Łužicy.

Při wulkej wodźe spěšnje jednać

Drježdźany. Nowy system k warnowanju před wulkej wodu w Sakskej bu wčera w Drježdźanach přepodaty. Wón zapřija nětko dźewjeć rěčnišćow. Nowy system warnuje tam, hdźež ma so nuznje jednać. Wažne powěsće njepřenjesu so telefonisce, ale z pomocu SMS, rěčneho dialoga abo přez internet.

Kermušerjo w muzeju

Njeswačidło. Wjace hač 750 zajimcow wopyta zawčerawšim zakónčenu wustajeńcu w Njeswačanskim domizniskim muzeju wo bojach nalěto 1945 we wsy a wokolinje, kotruž běchu 7. junija wotewrěli. Posledni dźeń wobhlada sej hišće něhdźe 60 ludźi, mjez nimi Pawlikec kermušerjo z Radworja a časowi swědkojo ze Šešowa a Noweje Wsy, powučnu pokazku.

Krótkopowěsće (16.11.15)

Montag, 16. November 2015 geschrieben von:

Nowe puće kročić

Drježdźany. Zwjazk sakskich rjemjeslnikow informowaše dźensa wo nowych pućach při wukubłanju wučomnikow. Hladajo na demografisku změnu ma so wo tym diskutować, kak móža sej małe a srjedźne zawody při wukubłanju nowe skupiny zajimcow wotkrywać. Při tym měli so w sylnišej měrje tež abiturienća a akademikarjo narěčeć.

Přeco hišće njeje kónc

Drježdźany. W Sakskej su lětsa dotal wjac hač 2,1 milionu D-markow na euro zaměnili. Wotnožki Němskeje banki su zličili 7 500 přeměnjenskich akcijow. Jedna so při tym wo mnóstwa někotrych pjenježkow hač do někotrych tysacow D-markow. Pjenjezy namakaja ludźo často při přehladanju namrěwstwa, w starych drastach abo zbožopřejnych kartach.

Nowy mějićel piwarnje

Plzeň. Najwjetša piwarnja swěta, AB InBev, je za 107 miliardow dolarow konkurencny koncern SABMiller kupiła. K njemu słuša tež Plzeňský Prazdroj z družinami Pilsner Urquell, Gambrinus, Radegast a Velkopopovický Kozel. Wočakuje so, zo so z fuziju pozicija čěskeho piwa na swětowych wikach zesylni.

Kleiner srjedźoněmska mišterka

Krótkopowěsće (13.11.15)

Freitag, 13. November 2015 geschrieben von:

Přidatne srědki Serbam

Berlin. Hospodarski wuběrk zwjazkoweho sejma je dźensa rano w zakónčacej rozmołwje wo klětušim hospodarskim planje na próstwu stronow CDU, CSU a SPD přidatne srědki we wobjimje 756 000 eurow za spěchowanje serbskeje rěče w digitalnych medijach přizwolił. Za to zarjaduje zwjazkowe nutřkowne ministerstwo nowy hospodarski titul.

Nowa šefredaktorka za Rozhlad

Budyšin. Šefredaktorstwo kulturneho časopisa Rozhlada přewozmje 1. januara 2016 Sara Mičkec. Rodźena Worklečanka je na Lipšćanskej uniwersiće masterski studij linguistiki wotzamknyła. 25lětna Serbowka naslěduje dr. Viktora Zakara, kiž přewozmje potom nawodnistwo delnjoserb­skeje wotnožki Rěčneho centruma WITAJ w Choćebuzu.

Z busom do wulkeho swěta

Berlin. Němski poskićowar dalnobusowych jězbow MeinFernbus-FlixBus budźe wot 26. nowembra na čarje mjez Zhorjelcom a Berlinom tež w Budyšinje, Małym Wjelkowje, Njeswačidle, Rakecach, Wulkich Ždźarach, Mučowje, Wojerecach a Grodku zastawać. Jězba ze Zhorjelca do Berlina płaći 11 eurow. Bus pojědźe hač do štyri króć wob dźeń.

Krótkopowěsće (12.11.15)

Donnerstag, 12. November 2015 geschrieben von:

Nowa móc na čole frakcije

Drježdźany. Hornjołužičanka Franziska Schubert zesylnja nawod frakcije Zelenych w Sakskim krajnym sejmje. Wčera su ju w druhim wólbnym přeběhu za nowu městopředsydku wuzwolili, rěka z frakcije. 33lětna z Habrachćic-Neugersdorfa bě hakle loni nazymu do krajneho sejma jako naslědna kandidatka přišła.

Wo přichodźe brunicoweje jamy

Choćebuz. Braniborski brunicowy wuběrk je dopołdnja w Choćebuzu planowane rozšěrjenje dweju wuhloweju jamow w Delnjej Łužicy rozjimował. Mjez druhim jedna so tež wo Janšojsku jamu. Čłonojo gremija chcychu sej zdobyć přehlad wo aktualnym stawje. Planowaneje předanje brunicoweje sparty koncerna Vattenfalla dla njeje wěste, hač budźetej jamje dale rozšěrjenej.

Dalši ćěkancy přińdu

Drježdźany. Hač do kónca lěta maja wokrjesy w Sakskej po informaciji krajneje direkcije hišće 37 000 ćěkancow při­wzać. To je 3 700 mjenje hač planowane. Dokelž pak dotal hišće wšitcy dóšli njejsu, wočakuja wo­krjesy nětko w sylnišej měrje ćěkancow. Budyski wokrjes ma hišće­ něhdźe 1 400 ćěkancow přiwzać, Zhorjelski 1 100.

Krótkopowěsće (11.11.15)

Mittwoch, 11. November 2015 geschrieben von:

Přewjedu fachowu konferencu

Bukowc. Agresijam dźěći chcedźa so kubłarki a kubłarjo, wučerjo a starši na fachowej­ konferency sobotu w Bukowcu wěnować. To zdźěla předsydka Serbskeho šulskeho towarstwa Ludmila Budarjowa. SŠT přewjedźe dalekubłanje zhromadnje z kubłanskim srjedźišćom LIPA. Wědomostnica prof. dr. Barbara Wolf z Wysokeje šule Mittweida přednošuje na temu „Agresije pola šěsćlětnych“.

Lěpši zwisk do Čěskeje

Šluknov. W čěskim Šluknovskim wuběžku su nětko za nadróžny wobchad ponowjenej pućej ze Šluknova do Rumburka a z Varnsdorfa do Krásneje Lípy přepodali. Jedna so wo jednu z etapow, wotležanu kónčinu wozrodźić. Wosebje prěni z mjenowaneju pućow móža tež łužiscy wulětnikarjo na jězbach do Čěskeje přez Załom derje wužiwać.

Zeleni zakoń zapodali

Krótkopowěsće (10.11.15)

Dienstag, 10. November 2015 geschrieben von:

Bydlenja za ćěkancow trěbne

Berlin. Němska trjeba za ćěkancow, kotřiž­ su lětsa do Němskeje přišli, hač do 160 000 přidatnych bydlenjow. To je Zwjazk bydlenskeho hospodarstwa wuličił. Kaž prezident zwjazka Axel Ge­daschko dźensa zdźěli, wón wočakuje, zo hač do 400 000 ludźi dołhodobnje w Němskej wostanje a deficit bydlenjow na 800 000 přiběra. Stat dyrbjał twar nowych bydlenjow pjenježnje podpěrać.

Pozběh w sakskim rjemjesle

Budyšin. Nazymska analyza Drježdźanskeje rjemjeslniskeje komory zwěsća tež pola wjetšiny rjemjeslnikow Budyskeho wokrjesa pozběh. Tak leži indeks wobchodneje klimy komorneho wobwoda Drježdźany pola 45 dypkow porno lońšim 41. Budyski wokrjes wostanje drje z 36 dypkami na kóncu lisćiny komory, indeks pak leži hižo wo dźewjeć dypkow wyše hač loni.

Češa pilni zběrarjo

Krótkopowěsće (09.11.15)

Montag, 09. November 2015 geschrieben von:

Malinkowa promowowała

Jena. Cyrkwinska historikarka Lubina Malinkowa je minjeny pjatk swoje zakónčace promociske pruwowanje na Friedricha Schillerowej uniwersiće w Jenje złožiła. Tema disertacije bě „Friedrich Caspar hrabja von Gersdorff a Serbja – přepytowanje ke kulturnemu transferej w dobje pietizma“. Dźěło ma w nakładnistwje Evangelische Verlagsanstalt wuńć.

Budyšance wustajatej

Budyšin. „W dialogu“, rěka nowa wustajeńca Budyskeju wuměłčow Almut Zielonka a Borbory Wiesnerec, kotruž su minjeny pjatk w galeriji Budissin na Hrodowej 19 wotewrěli. Drježdźanska wuměłstwowa historikarka dr. Jördis Lademann poda zawodne słowa k twórbam molerki a rězbarki. Přehladka je hač do 5. decembra přistupna.

Róčnicu wopominali

Krótkopowěsće (06.11.15)

Freitag, 06. November 2015 geschrieben von:

Zakónča spěchowanje

Berlin. Zwjazkowy minister za hospodarstwo Sigmar Gabriel (SPD) chcył spěchowanje składowakow solarneje ener­gije kónc lěta zakónčić. Tole wuchadźa ze spisa hospodarskemu wuběrkej zwjazkoweho sejma. Lěta 2013 zahajeny spěchowanski program je swój nadawk spjelnił a njeje hižo trěbny, Gabriel piše. Solarne hospodarstwo a Zeleni rozsud raznje kritizuja.

Stronje AfD so spjećować

Berlin. Lěwicarske skupiny chcedźa jutřišu demonstraciju strony AfD w Berlinje z blokadami zadźeržeć. K tomu namołwja zwjazk Stopp AfD. Zhromadnje z Lěwicu tež SPD, CDU a Zeleni k napřećiwnej demonstraciji namołwjeja. AfD je něhdźe 5 000 wobdźělnikow přizjewiła, přećiwni demonstranća chcedźa runje telko ludźi mobilizować.

Synoda EKD so schadźuje

Krótkopowěsće (05.11.15)

Donnerstag, 05. November 2015 geschrieben von:

Serbski koncert so wotměł

Greifswald. Komorny koncert „Žadosć za dalinu“ z hudźbu Hinca Roja, Detlefa Kobjele, Jura Mětška a Jana Cyža je wčera na Greifwaldskej uniwersiće zaklinčał. Hižo minjeny štwórtk bě samsny koncerta w Rostocku widźeć a słyšeć. Po informaciji iniciatora projekta Malte Hübnera ma so wón klětu w Wojerecach, Lipsku a Budyšinje wospjetować.

Policija přećiwo prawicarjam

Drježdźany. Policija a statne rěčnistwo stej dźensa w Freitalskej kónčinje přećiwo pozdatnej prawicarskej skupinje postupowałoj. Po informacijach sakskeho nutřkowneho ministra Markusa Ulbiga (CDU) bě to akcija decernata za politisku kriminalitu. Při tym su pječa nawodu prawicarskeje Freitalskeje Wobydlerskeje wobory zajeli, medije rozprawjeja.

Gott so za dobre přeća dźakował

Anzeige