Krótkopowěsće (13.01.21)

Mittwoch, 13. Januar 2021 geschrieben von:

Incidenca něhdźe konstantna

Budyšin/Zhorjelc. We wokrjesu Budyšin su wčera 164 dalšich z koronawirusom natyknjenych zwěsćili. W chorownjach lěkuja 237 pacientow, 34 z nich na intensiwnej staciji. Štyrjo schorjeni su wčera zemrěli. Incidenca w Budyskim wokrjesu wučinja 480,33. W Zhorjelskim maja tuchwilu 3 011 natyknjenych (+ 124), jědnaće wosobow je zemrěło. Incidenca tam je 436,44.

Statne zrěčenje podpisałoj

Drježdźany/Magdeburg. Ministerskaj prezidentaj Sakskeje a Saksko-Anhaltskeje Michael Kretschmer a Reiner Haseloff (wobaj CDU) staj wčera nowe statne zrě­če­nje za MDR podpisałoj. Durinski premier Bodo Ramelow (Lěwica) bě jemu hižo­ do hód přihłosował. Nětko móža mjez druhim nowu rozhłosowu radu ­zestajeć, jeli parlamenty zrěčenje schwala, zdźěli powěsćernja dpa.

Płomjo znowa online

Krótkopowěsće (12.01.21)

Dienstag, 12. Januar 2021 geschrieben von:

Wčera mjenje natyknjenjow

Budyšin. Wčera, póndźelu, su w Budyskim wokrjesu wo połsta dalšich natyknjenjach z koronawirusom rozprawjeli, z kotrychž bě 33 hišće z kónca tydźenja. Pjeć pacientow w starobje 54 do 95 lět je zemrěło. Z aktualnje 2 196 schorjenych (-81) lěkuja 175 (+11) w chorowni. Incidenca wučinja tu 515,33. W Zhorjelskim wokrjesu zwěsćichu wčera tři nowoinfekcije a 15 smjertnych padow. Indicenca tam je 467,31.

Kamjenicu wobkrućili

Berlin. Konferenca kulturnych minis­trow je wčera Kamjenicu oficialnje za ­Europsku kulturnu stolicu 2025 powołała a wotum europskich ekspertow jednohłósnje wobkrućiła. Hižo loni planowane wobkrućenje titula běchu kritiki na wu­zwolenym procedere dla přesunyli. W rozmołwje z předsydku jury Sylviju Amann móžachu ministrojo „wotewrjene prašenja nastupajo wuzwolenje rozrisać“.

„Łužiska magistrala“ wabi

Krótkopowěsće (11.01.21)

Montag, 11. Januar 2021 geschrieben von:

Natyknjenja njewoteběraja

Budyšin. Wo 499 dalšich natyknjenjach z koronawirusom w Budyskim wokrjesu je krajnoradny zarjad wot pjatka hač do wčerawšeho informował. W samsnym času rozrosće ličba smjertnych padow wo 20 na 372. Schorjenych je 2 277 (-287), z kotrychž 164 w klinice lěkuja (-17). Incidenca wučinja 518,66. W samsnej dobje zwěsći wokrjes Zhorjelc 353 nowoinfekcijow, tam je incidenca 469,68.

Zwaža so na nowozapočatk

Drježdźany. Strona Swobodnych wolerjow w Sakskej chce so po rozestajenjach wo swojim wusměrjenju jako „móc srje­dźi­zny“ na nowozapočatk zwažić. „Teoretikarjo zapřisahańcy a prěkimyslerjo pola nas žane městno nimaja. Tohodla su nas kónc lěta někotři čłonojo zaso wopušćili, kotřiž běchu z hinašimi předstawami zastupili“, rjekny wicepředsydka Denise Wendt powěsćerni dpa. Nětko móža so zaso wěcnemu dźěłu přiwobroćić.

Rozsud znowa rozjimaja

Krótkopowěsće (08.01.21)

Freitag, 08. Januar 2021 geschrieben von:

Dale wjele natyknjenjow

Budyšin. We wokrjesu Budyšin su wčera 300 dalšich koronainfekcijow zwěsćili, šěsć pacientow w starobje 79 do 94 lět je zemrěło. Aktualnje je 2 741 natyknjenych (+233), mjez nimi 163 (+25) w chorowni. Indicenca na 100 000 wobydlerjow wučinja tu 433,3. W Zhorjelskim wokrjesu registrowachu samsny dźeń 231 natyknjenjow, wosom smjertnych padow a indicencu 390,54.

Zetkanje FDP lětsa hinaše

Budyšin. Tradicionalne zetkanje FDP na Třoch kralow w Budyšinje budźe lětsa koronakrizy dla hinaše hač hewak. Dokelž nochcedźa zarjadowanje wupadnyć dać, wotměja lětuše 15. hornjołužiske zetkanje na Třoch kralow zajutřišim, njedźelu, wot 10 do 11.30 hodź. na facebookowej stronje sakskeje FDP, kaž Budyski wokrjesny zwjazk strony informuje.

Južna Čěska swójsce postupuje

Krótkopowěsće (07.01.21)

Donnerstag, 07. Januar 2021 geschrieben von:

Dalše 35 smjertnych padow

Budyšin. Z wčera zwěsćenymi 428 nowymi koronanatyknjenjemi je so incidenca w Budyskim wokrjesu na 440 zwyšiła. Dźesać pacientow w starobje 76 do 88 lět je zemrěło. Aktualnje je 2 508 ludźi inficěrowanych (+326), 138 (+15) z nich w klinice lěkuja. Wokrjes Zhorjelc rozprawješe wčera wo 392 dalšich infekcijach a 25 smjertnych padach w zwisku z koronu. Indicenca tam je 399,64.

CDU zjězd znowa přestorči

Budyšin. Wokrjesny zwjazk CDU Budyšin za sobotu planowany zjězd, na kotrymž chcedźa kandidata za wólby zwjazkoweho sejma nominować, znowa přestorči. To je amtěrowace předsydstwo hromadźe z mandatnymi nošerjemi a předwidźanym kandidatom Rolandom Ermerom wčera rozsudźił, kaž wokrjesny jednaćel CDU Filip Wjerš zdźěli. Přičina je podlěšenje lockdowna.

Seniorojo namołwjeni pisać

Krótkopowěsće (06.01.21)

Mittwoch, 06. Januar 2021 geschrieben von:

Natyknjenja zaso přiběraja

Budyšin. Koronanatyknjenja w Budyskim wokrjesu zaso přiběraja. Wokrjesny strowotniski zarjad informowaše wčera wo dalšich 269 padach, nimale 4,5 króć telko kaž póndźelu. Sydom pacientow w starobje 80 do 99 lět je zemrěło. Incidenca bě wčera 418. 202 nowoinficě­rowaneju, jědnaće smjertnych padow w zwisku z koronu a incidencu 372,34 mějachu w Zhorjelskim wokrjesu.

Platforma znowa njepřistupna

Drježdźany. „Techniske problemy“ su po informacijach sakskeho ministerstwa za kultus přičina mylenjow na kubłanskej platformje LernSax. Wčera njebě strona docyła přistupna a njehodźeše so hač do dźensnišeho připołdnja běžnje wužiwać. LernSax je wosebje tuchwilu wot doma wuknjacym wažna platforma, na a z kotrejž wšědnje přerěznje 80 000 šulerjow dźěła.

Wo Europje jako domiznje

Krótkopowěsće (05.01.21)

Dienstag, 05. Januar 2021 geschrieben von:

Wosom smjertnych padow

Budyšin. W Budyskim wokrjesu su wčera 60 nowych koronanatyknjenjow zwěsćili. Ličba smjertnych padow rozrosće wo wosom na 329. Wot 2 053 (-22) schorjenych lěkuja 115 w klinice (+14). Zhorjelski wokrjes informowaše wčera wo dźewjeć nowych infekcijach. Tamniša incidenca wučinješe 368,78, w Budyskim wokrjesu 401,3.

Za předsydku SŠT

Chrósćicy. Katharina Jurkowa, rěčnica regiona župy Kamjenc „Michał Hórnik“, kandiduje za předsydku Serbskeho šulskeho towarstwa. Wosom požadarjow ­za nowe předsydstwo, z kotrychž staj dwaj z Delnjeje Łužicy, je so na to do­jednało. Na naprašowanje našeho wječornika Jurkowa zdobom wobkrući, zo je Załožba za serbski lud přizwoliła financować dźěłowe městno hłownohamtskeho jednaćela SŠT.

Snadnuški postup sezony dla

Budyšin. W decembrje 2020 bě we wuchodnej Sakskej 18 135 bjezdźěłnych, to je 379 resp. 2,1 procent wjace hač w nowem­brje. Kaž Budyska wotnožka agentury za dźěło dźensa wozjewi, jedna so wo snadnuški postup sezony dla. Po­srědkowarjam agentury je 4 598 socialneho zawěsćenja winowatostnych dźěłowych městnow k dispoziciji. To je 252 mjenje hač w decembrje.

Krótkopowěsće (04.01.21)

Montag, 04. Januar 2021 geschrieben von:

Staw w pokładni zwěsćić

Drježdźany. Sakska ma po słowach ­ministerskeho prezidenta Michaela Kretsch­mera (CDU) po koronapandemiji staw w pokładni zwěsćić. Hdyž su z najhóršeho won, měli sej kóšty wobhladać, rjekny premier Kretschmer powěsćerni dpa w Drježdźanach. Za Zwjazk a kraje dźe wo priority a doby, w kotrychž dołh wróćo płaća, zo njeměli přichodne generacije za to rukować.

CDU najbóle dowěrjeja

Lipsk. Sakscy wolerjo stronje CDU dale najbóle dowěrjeja. Po rozprawje w dźensnišim wudaću Leipziger Volkszeitung by wona při wólbach krajneho sejma 34 procentow docpěła. Jako druha najsylniša slěduje AfD ze 26 procentami. Lěwica by na jědnaće procentow přišła, Zeleni na dźesać a SPD na 7,7. FDP by z pjeć procentami znowa do krajneho sejma zaćahnyła. Knježerstwowa koalicija CDU, SPD a Zelenych by wjetšinu z 51 procentami zakitowała.

Sakscy Zeleni z rekordom čłonow

Krótkopowěsće (30.12.20)

Mittwoch, 30. Dezember 2020 geschrieben von:

Ličby dale na wysokim niwowje

Budyšin/Zhorjelc. Ličba pozitiwnje na koronawirus testowanych wostawa we Hornjej Łužicy dale wysoka. W Budyskim wokrjesu zličichu wčera 219 nowych natyknjenjow, 28 ludźi je zemrěło. Sydom­dnjowska incidenca na 100 000 wobydlerjow wučinja 431. W Zhorjelskim wokrjesu zličichu 193 nowych natyknjenjow, 16 ludźi je zemrěło. Sydomdnjowska incidenca wučinja tam 404.

Najebać pandemiju spokojom

Ochranow. Dobry internetny wustup wobradźi manufakturje Ochranowske hwězdy najebać koronapandemiju dosć dobry wotbytk. Kaž delnjoserbski rozhłós rozprawja, je zawod njehladajcy wupadnjenych adwentych wikow z předanju znatych hwězdow spokojom. W nowembrje su woprawdźity nawal w onlineshopje dožiwili. Hewak wobdźěla so kóždolětnje na 40 wikach.

Kemše w katedrali budu

Krótkopowěsće (29.12.20)

Dienstag, 29. Dezember 2020 geschrieben von:

Infekcije dale přiběraja

Budyšin. Ličba na koronawirus schorjenych w Budyskim wokrjesu je so wčera wo 58 na dohromady 2 181 inficěrowanych zwyšiła. Jedyn pacient je zemrěł, 339 ludźi je so wustrowiło. Incidenca je snadnje woteběrała, na 100 000 wobydlerjow je so 450,66 natyknyło. Zhorjelski wokrjes, hdźež su wčera šćěpić započeli, informuje wo dohromady 4 741 infekcijach (+ 54), incidenca wučinja tam 426,5.

Statnik namołwja k solidariće

Budyšin. Předsyda Domowiny Dawid Statnik w na Youtube-kanalu třěšneho zwjazka přistupnej hodownej narěči k „solidariće z wutrobu a rozumom“ w zwisku z koronapandemiju namołwja. Najpozitiwniši aspekt lěta 2020 je za njeho, zo „njeje to serbske hižo pyšny připlack­, ale zakładny kamjeń zhromadneje regionalneje identity“.

Wobrot jasnje stopnjowali

Žitawa. Zhotowjer tunkadłow Fit je nalěto na naprašowanje Sakskeje produk­ciju desinfekciskich srědkow zahajił. Tele rozšěrjenje sortimenta je předewzaću stopnjowanje lětušeho wobrota wo ně­hdźe 15 procentow wobradźiło, byrnjež wulki dźěl šaržow spočatnje darmotnje na přikład chorownjam dodawali.

Serbska debata

Neuheiten LND