Krótkopowěsće (09.09.15)

Mittwoch, 09. September 2015 geschrieben von:

Dźeniki Havela našli

Praha. Při přehladanju pisomneho zawostajenstwa bywšeho čěskeho prezidenta a spisowaćela Václava Havela su njewočakowano wjacore dotal njeznate dźenikowe zapiski wot njeho našli. Po zdźělenju Michaela Žantovskeho, direktora Václava Haveloweje biblioteki w Praze, měli so namakane teksty klětu znajmjeńša w elektroniskej, po móžnosći pak tež w knižnej formje wozjewić.

Nowiny z arabskej přiłohu

Berlin. Z arabskej přiłohu stej dźensa Berlinsko-braniborske wudaće nowiny Bild kaž tež Berlinski dźenik B.Z. wušłoj. Na štyrjoch stronach dóstawaja ćěkancy po tymle puću mjez druhim informacije wo za nich wažnych zarjadnišćach a orientaciji po měsće. Nimo měšćanskeho plana maja w nowinje tež mały němsko-arabski słownik z wažnymi wobrotami.

Dźeń a wjace ludźi bjerje crystal

Krótkopowěsće (08.09.15)

Dienstag, 08. September 2015 geschrieben von:

Nowe třělby za wójsko

Berlin. Standardna mašinska třělba Zwjazkoweje wobory G36 budźe wumustrowana. Za nju chcedźa nowu bróń wobstarać, zakitowanska ministerka Ursula von der Leyen (CDU) dźensa po rozmołwje z wojerskim nawodnistwom wójska w Berlinje připowědźi. Po 20 lětach chcedźa „nowu generaciju třělbow“ zasadźić. Nadawk za to ma so wupisać.

Hospodarstwo spěšnišo rosće

Luxemburg. Hospodarstwo krajow europasma­ je so prěnje poł lěta lěpje wuwiło­ hač wočakowane. Nutřkokrajny bruttoprodukt wšitkich 19 krajow, w kotrychž­ płaća z eurom, je přerěznje wo 0,4 procenty přiběrało, kaž statistiski zarjad Eurostat zdźěla. Fachowcy běchu 0,3 procenty wočakowali. Španiska ma z jednym procentom wosebje sylny rozrost, Němska přińdźe na 0,4 procenty.

Miliony kopańcu hladali

Hannover. Kwalifikaciska hra němskeho narodneho koparskeho mustwa přećiwo Šotiskej je wčera hobersku ličbu přihladowarjow zajimowała. Nimale dwanaće milionow ludźi w přerězku je dobyće 3:2 chowancow trenarja Joachima Löwa w Glasgowje přećiwo Šotam na sćelaku RTL widźało.

Krótkopowěsće (07.09.15)

Montag, 07. September 2015 geschrieben von:

Myto stawiznarce

Kamjenica. Lětuši Mättigowy stipendij spožča historikarce Arianje Bartkowski. Myto 1 200 eurow ma słužić spisanju jeje doktorskeho dźěła. Studentka Kamjeničanskeje techniskeje uniwersity rozestaja so z wuznamom alchemije za wuwiće towaršnosće w 16. lětstotku. W srjedźišću jeje slědźenjow steji sakski kurwjerchski por Awgust a Hana.

Clemens Hrjehor zapokazany

Kamjenica. We wobłuku swjedźenskeje Božeje mšě su dotalneho Chróšćanskeho wosadneho fararja Clemensa Hrjehorja wčera oficialnje jako noweho propsta w Kamjenicy zapokazali. Na swjatočnosći wobdźěli so tež nahladna ličba serbskich wěriwych, kotrychž Clemens Hrjehor w jich maćeršćinje postrowi. Nadźiju na spomóžne zhromadne dźěło zwuraznichu zastupnicy ewangelskeje cyrkwje a Kamjeničanskeje židowskeje wosady.

Směrnicy wolóžili

Krótkopowěsće (04.09.15)

Freitag, 04. September 2015 geschrieben von:

Zahaja dźeń Saksow

Wurzen. Tradicionalny Dźeń Saksow zahaja dźensa wječor we Wurzenje. Hač do njedźele wotměja w městačku pola Lipska najwjetši ludowy swjedźeń swobodneho stata. Wjace hač 400 towars­twow, iniciatiwow a kulturnych skupin wuhotuje programy z hudźbu, rjemjesłom a gastronomiju. Serbsku kulturu prezentuje muski chór Delany.

Požčonki dróhow dla

Ústí nad Labem. Hladajo na špatny staw dróhow planuje region Ústí nad Labem njewšědnu kročel. Wokrjes chcył sej pola ludźi pjenjezy požčić a jim za to wotpowědne wopisma přepodać. Na te wašnje chcył 350 milionow eurow wu­zbytkować, z kotrymiž móhł porjedźenje dróhow financować. Wuzwolena twarska firma měła zdobom dobry staw dróhow za přichodne 30 lět zaručić.

Stare spušćadło wottorhane

Krótkopowěsće (03.09.15)

Donnerstag, 03. September 2015 geschrieben von:

Młodźi basnicy so zetkaja

Horni Hajnk. Dźěłarničku młodych basnikow zarjaduje Ludowe nakładnistwo Domowina sobotu, 5. septembra, w domje Jurja Brězana w Hornim Hajnku. Na njej wobdźěli so pisacy dorost, kiž ma hižo nazhonjenja při basnjenju. Lyrikarka Róža Domašcyna zeznajomi wobdźělnikow ze zakładami basnjenja.

Lěto pola SŠT

Chrósćicy. Wot spočatka septembra dźěłaja tři młodostne w dobrowólnym socialnym lěće w třoch pěstowarnjach Serbskeho šulskeho towarstwa, w Ralbicach, Chrósćicach a Malešecach. Wone podpěruja kubłarki a kubłarjow při serbskorěčnej zaběrje z dźěćimi wot žłobikoweje staroby hač k šulerjam w horće. SŠT prócuje so na te wašnje zaměrnje wo maćernorěčny kubłarski a wučerski dorost.

Ćěkancy z taksijom přijěli

Bad Schandau. Z čěskimaj taksijomaj je skupina syriskich ćěkancow do Bad Schandauwa w Sakskej Šwicy dojěła. Jednaše so wo třoch muži, štyri dźěći a žonu­. Prjedy hač móžachu z ćahom dale do kraja jěć, pak jich policija zadźerža a dowjeze ćěkancow do prěnjeje přebywarnje w Kamjenicy­. Wobydler bě zastojnikow informował.

Krótkopowěsće (02.09.15)

Mittwoch, 02. September 2015 geschrieben von:

Předpředań jenož mjeńšiny trała

Čorny Chołmc. Runje 24 mjeńšin je wčerawša internetna předpředań zastupnych lisćikow za klětuši Krabatowy festiwal w Čornym Chołmcu trała, potom běchu lisćiki wupředate. W běhu prěnich třoch mjeńšin po połnocy dóńdźe 260 mejlkow na sekundu, kaž zamołwići zdźěleja. Telefoniska předpředań dopoł­dnja bě podobna. Po zdźělenju zamołwitych bě wona kaž orkan.

Pod wliwom drogow stał

Halbe. Muž, kiž je wčera wječor w přebywarni požadarjow azyla w Halbe južnje Berlina popjerjowy spray na ludźi pryskał, steješe pod wliwom drogow. 28lětny twarski dźěłaćer ze Sakskeje bě amfetaminy a metamfetaminy brał, rěčnica policije zdźěli. Wón dźěłaše w ně­hdyšej kasernje. Při nadpadźe ze sprayjom je so 35 požadarjow azyla zraniło.

Njerodźa wo přećahowanje

Krótkopowěsće (01.09.15)

Dienstag, 01. September 2015 geschrieben von:

Za lěpše wuměnjenja

Berlin. Wjetšina wobydlerjow Němskeje wupraja so za wyše mzdy kubłarjam a po wšej republice płaćiwe kwalitne standardy za dźěćace dnjowe přebywanišća. 79 procentow naprašowanych je za wyše mzdy a 77 procentow za to, zo móža wšitke dźěći wot štyrjoch lět darmotnje do pěstowarnje chodźić. Tole zwěsća studija kubłanskeho barometra.

Wěstotu krajow skrućić

Berlin. Pólski statny prezident Andrzej Duda je sej žadał, pólske wójsko modernizować a z NATO wušo hromadźe dźěłać. To ma wón za wužadanje přichoda. Duda wopominaše dźensa 76. róčnicu nadpada Němskeje na Pólsku na Westernplaće w Gdańsku. „Tehdy kaž dźensa njesměmy dopušćić, zo so mjezynarodne prawo łama a suwerenita krajow wobškodźi“, Duda podšmórny.

Dalšich podhladnych zajeli

Krótkopowěsće (31.08.15)

Montag, 31. August 2015 geschrieben von:

Nukstock z nowosćemi

Nuknica. Wjace ludźi hač zašłe lěta – dohromady něhdźe 600 – je kónc tydźenja 17. festiwal Nukstock dožiwiło. Při Nukničanskej skale zahra dźewjeć hudźbnych skupin z kraja a wukraja. Prěni raz su sobotu dźěćacy program organizowali. Dalša nowosć bě, zo su biologisce wottwarjomne nopaški a talerje wužiwali. Lětsa rozdawachu na Nukstocku tohorunja antirasistiske nalěpki.

Pašowarjo ludźi zajeći

Wien. Po zahajenju raznišich kontrololow při madźarskej mjezy je awstriska policija dotal pjeć pozdatnych pašowarjow a wjace hač 200 ćěkancow našła, polici­ja dźensa zdźěli. Cyłkownje 54 zastojnikow je zasadźenych, zo bychu přećiwo pašowarjam ludźi postupowali. Tež bayer­ska policija kontrole zesylnja. Historiski datum wotkryty

Krótkopowěsće (28.08.15)

Freitag, 28. August 2015 geschrieben von:

Knježerstwo přeproša

Berlin. Kanclerski zarjad, nowinarski a informaciski zarjad knježerstwa kaž tež wšitke 14 zwjazkowych ministerstwow w Berlinje su jutře a njedźelu wot 10 do 18 hodź. zjawnosći přistupne, zdźěla knježerstwo. Wotewrjeny je tohorunja sekretariat awtochtonych mjeńšin Němskeje w nutřkownym ministerstwje. Tam chcedźa tež wo Serbach informować.

Dźeń a wjace ćěkancow

Genf. Wot spočatka lěta je so něhdźe 310 000 ćěkancow přez Srjedźne morjo do Europy dóstało, informuje pomocny skutk zjednoćenych narodow UNHCR w Genfje. Je to razny rozrost porno lětu 2014, jako bě 219 000 migrantow Europu po mórskim puću docpěło. Jenož lětsa je něhd­źe 2 500 ludźi při pospyće, z čołmom přijěć, žiwjenje přisadźiło.

Supermoderny hotel

Liberec. W septembru wotewru w Liberecu po wobšěrnej rekonstrukciji Grand Hotel Imperial z lěta 1930. Stwy, wuhotowane wot načolnych čěskich designerow, sčinja z njeho zdobom wosebitu galeriju. Kóžda stwa změje swójsku webstronu, a nastupajo wobjim zatwarjeneje moderneje techniki móžetej so Imperialej jenož dwaj hotelej w USA runać.

Krótkopowěsće (27.08.15)

Donnerstag, 27. August 2015 geschrieben von:

Wurjadne posedźenje zwołane

Drježdźany. Prezident Sakskeho krajneho sejma dr. Matthias Rößler je dźensa čłonow sejma na wurjadne posedźenje přichodnu wutoru, 1. septembra, přeprosył. Na nim chcedźa wo problemje azyla a zaměstnjenja ćěkancow debatować. Připowědźene su stejišćo knježerstwa kaž tež rěčne přinoški opozicije.

Wjelki wowcy zakusali

Konjecy. Na wšě dwaceći wowcow su wjelki zawčerawšim na pastwje w Konjecach zranili a zakusali, byrnjež skoćata přez elektriski płót škitane byli. Po informacijach krajnoradneho zarjada je wobsedźer jědnaće morjenych a dalše zranjene wowcy našoł, kotrež dyrbjachu na to zasparnić.

Trailery filma online

Budyšin. Budyske studijo Sakskeho wukubłanskeho a wuwučowanskeho kanala­ SAEK je dźensa wozjewiło traile­­­ry za nowy synrchonizowany film. Zajimcy móža sej je bórze na internetnej stronje www.serbske-kino.de wobhladać. Trikowy film ma titl „Šmjatańca w raju bajkow“. Projekt Załožby za serbski lud zwoprawdźiło je Serbske filmowe studijo SORABIA­. Hižo w septembru ma DVD wuńć.

Planuja němy protest

Anzeige

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019