Wětošow (SN/mb). Hanzo Wylem-Keł je zapósłanc Serbskeho sejma, předsyda strony „Łužiska alianca“ – a wot najnowšeho kandidat AfD za lětuše wólby měšćanskeje zhromadźizny zapósłancow we Wětošowje. Hač je wón docyła prěni Serb, kotryž za tutu stronu kandiduje, drje njewěmy, znajmjeńša třěšnemu zwjazkej Domowinje žana informacija njepředleži, zo je hdy jónu Serb AfD w někajkim komunalnym parlamenće zastupował. We Wětošowje je strona w zašłych wólbach drje 16,4 procenty docpěła, ale porno SPD (14,9 procentow, 3 mandaty) pobrachowacych kandidatow dla jenož jedne sydło w měšćanskej zhromadźiznje wobsadźiła. Nětko maja dweju kandidatow – jedyn je Wylem-Keł.
Syriska je mnohim ludźom w Němskej derje znata. Wobydlerska wójna a bój přećiwo islamiskemu statej stej powěsće dołho dominowałoj. Štož ludźom mjenje znate, je, zo maja na sewjeru a wuchodźe kraja awtonomnu kónčinu, kotraž móže tež nam w Němskej přikład za tolerancu a runoprawosć nabožinow a splahow być. „Awtonomna administracija demokratiskeho regiona sewjerowuchodna Syriska“ je oficialne pomjenowanje kónčiny, kotraž spyta hižo wot lěta 2014 principije demokratije a prawniskeho stata etablěrować.
Washington (dpa/SN). Po měsacy trajacej ćahańcy je kongres USA z přihłosowanjom Senata miliardy dolarow wopřijacu wojersku pomoc za wot Ruskeje nadpadnjenu Ukrainu schwalił. Naćisk zakonja wobsahuje pomoc we wobjimje 61 miliardow dolarow. Prezident Joe Biden dyrbi jón hišće podpisać. Dom reprezentantow bě naćiskej hižo minjenu sobotu přihłosował, kiž předwidźi tež wojersku pomoc za Israel.
Knježerstwo zwyša renty
Berlin (dpa/SN). Zwjazkowe knježerstwo je dźensa wo w juliju planowanym zwyšenju renty rozsudźiło. Dochody něhdźe 21 milionow rentnarjow chcedźa wo 4,57 procentow zwyšić. Móžno je tole dobreho wuwića mzdow dla. Hinak hač minjene lěta renty zaso spěšnišo stupaja hač inflacija. Nimo toho chcyše kabinet dźensa akciski plan přećiwo problemej bjezdomnosće wobzamknyć.
Amnesty šwika złóstnistwa
Brüssel (dpa/SN). Za humanitarnu pomoc zamołwity komisar EU Janez Lenarčič sej hladajo na katastrofalne połoženje ludźi w Gazaskim pasmje žada, wjele diskutowany pomocny skutk na dobro Palestinjanow UNRWA dale podpěrać. „Namołwjam kraje darićelow, UNRWA pomhać – wažny žiwjenski prud za palestinskich ćěkancow“, piše słowjenski diplomat. Wón wita wčera wozjewjenu rozprawu wo pomocnym skutku, kotraž „systemy organizacije k dodźerženju předpisow k neutraliće“ wuzběhuje.
Pomocny skutk běchu w januaru kritizowali, po tym zo bě Israel twjerdźił, zo běchu so sobudźěłaćerjo UNRWA na masakru Hamas 7. oktobra w Israelu wobdźělili. Na to běchu wjacore kraje, mjez druhim Němska, swoje popłatki za UNRWA přetorhnyli.
USA pomocne srědki přeco hišće blokuja. Społnomócnjeny prezidenta USA Joewa Bidena za humanitarne prašenja David Satterield je wčera znowa před strachom hłodoweje katastrofy warnował a Israel namołwjał, tomu zadźěwać. Biden je tole w telefoniskej rozmołwje z israelskim ministerskim prezidentom Benjaminom Netanjahuwom spočatk apryla wuraznje narěčał.
Budyšin (SN). Tež lětsa chcemy zaso wuznamjenić wosoby abo skupiny, kotrež so čestnohamtsce za zachowanje našeju rěčow a hajenje serbskeje kultury na wosebite wašnje zasadźuja. Hač do 30. junija 2024 móžeće mytowanskemu wuběrkej namjety za wuznamjenjenje z Mytom Domowiny, z Mytom Domowiny za dorost a z Čestnym znamješkom Domowiny zapodać, a to na adresu: Domowina – Zwjazk Łužiskich Serbow z. t., Póstowe naměsto 2/Postplatz 2, 02625 Budyšin. Swój namjet móžeće tež z e-mejlku pósłać na .
Prošu wužiwajće za to formular, kotryž je na webstronje składowany. Tam namakaće tež dalše informacije. Jeli maće prašenja, so rady direktnje na zarjad Domowiny wobroćće: Clemens Škoda, referent za kulturu a wukraj, e-mejlka: , tel. 03591 550208. Mytowanske zarjadowanje wotměje so 18. oktobra 2024 w Budyšinje.
Z Mytom Domowiny počesćimy tych, kotřiž so zaměrnje a wuspěšnje za zachowanje serbskeje rěče a kultury, ale tež za wozrodźenje serbskeho žiwjenja zasadźuja. Zarjad Domowiny
Črije za najwjetšej noze swěta zhotowił je šewc Georg Wessels (71) w Sewjerorynsko-Westfalskej a je nowe črije 28lětnemu Jeisonje Rodriguezej we Venezueli wosobinsce přepodał. Rodriguez chorosće dla spochi dale rosće a trjeba mjeztym črije wulkosće 70 za noze, kotrež stej dlěšej hač 40 centimetrow. Ze swojimi 2,36 metrami ma młody muž přiběracy ćělne bolosće a problemy w bydlenju. Pjenjezy za lěkowanje pak wón nima. Tuž je dale a bóle na pomoc pokazany.
Nócny wulět bobra w zahrodźe w sewjerorynsko-westfalskim Hagenje je so w swětłowym šachće pinčneho wokna skónčił. Wobydlerjo wołachu policiju, kotraž pak njemóžeše pomhać, wšako zwěrjo w šachće kruće tčeše. Wohnjowi wobornicy bobra skónčnje wuswobodźichu a po přepytowanju z dowolnosću skótneho lěkarja w přirodźe zaso wusadźichu.